ក្រុមហ៊ុនដ៏ធំរបស់អាមេរិក គឺក្រុមហ៊ុន Google បោះទុនវិនិយោគក្នុងទំហំទឹកប្រាក់ប្រមាណ ១ពាន់លានដុល្លារអាមេរិក ដើម្បីបង្កើតមជ្ឈមណ្ឌលស្តុកទិន្នន័យដ៏ធំ (Cloud Data Centre) នៅក្នុងខេត្តឈុនបុរី ប្រទេសថៃ។
ប្រធាន និងជានាយកវិនិយោគរបស់ក្រុមហ៊ុន Google អ្នកស្រី Ruth Porat បញ្ជាក់ទៅកាន់នាយករដ្ឋមន្ត្រីថៃ អ្នកស្រី ផែថងថាន ស៊ីណាវ៉ាត្រា (Paetongtarn Shinawatra) នៅក្រៅវេទិកាសេដ្ឋកិច្ចពិភពលោក (WEF) នាទីក្រុង Davos ប្រទេសស្វីស កាលពីថ្ងៃពុធ ទី២២ មករា នេះថា ក្រុមហ៊ុន Google កំពុងសាងសង់មជ្ឈមណ្ឌលស្តុកទិន្នន័យលើបណ្ដាញអ៊ីនធឺណិត ដែលគេហៅថា Cloud Data Centre នៅខេត្តឈុនបុរី ហើយនឹងរួចរាល់សម្រាប់ប្រតិបត្តិការក្នុងរយៈពេលប្រហែល ២ឆ្នាំបន្ទាប់។
តាមរយៈសារព័ត៌មាន រ៉យទ័រ (Reuters) ចុះផ្សាយកាលពីថ្ងៃទី៣០ ខែកញ្ញា ឆ្នាំ២០២៤ ឱ្យដឹងថា ក្រុមហ៊ុន Google នឹងវិនិយោគ ១ពាន់លានដុល្លារនៅក្នុងប្រទេសថៃ ដើម្បីបង្កើតមជ្ឈមណ្ឌលទិន្នន័យ ដើម្បីបំពេញតម្រូវការដែលកំពុងកើនឡើង និងគាំទ្រផ្នែកបញ្ញាសិប្បនិម្មិតនៅអាស៊ីអាគ្នេយ៍ ដែលនឹងបង្កើតការងារជាមធ្យមចំនួន ១៤០០០ការងារក្នុងមួយឆ្នាំរហូតដល់ឆ្នាំ២០២៩។
នៅចំពោះមុខនាយករដ្ឋមន្ត្រីថៃ អ្នកស្រី Ruth Porat អះអាងថានឹងរក្សាការគាំទ្ររបស់ខ្លួនដល់រដ្ឋាភិបាលថៃ រួមទាំងក្រសួងអប់រំរបស់ថៃ តាមរយៈអនុស្សរណៈយោគយល់គ្នាលើការបណ្ដុះបណ្ដាលជំនាញវិជ្ជាជីវៈផ្នែកឌីជីថល។ អ្នកស្រីបន្តថា ក្រុមហ៊ុនក៏នឹងបន្តជួយគាំទ្រធុរកិច្ចខ្នាតតូច និងមធ្យមតាមរយៈការផ្ដល់ជាកម្មវិធីអភិវឌ្ឍន៍ជំនាញផងដែរ។
ទោះយ៉ាងណា អ្នកស្រី ផែថងថាន ស៊ីណាវ៉ាត្រា បង្ហាញក្ដីសង្ឃឹមទៅកាន់អ្នកស្រី Ruth Porat ថាក្រុមហ៊ុន Google នឹងពិចារណាជ្រើសរើសប្រទេសថៃ ធ្វើជាមូលដ្ឋានផលិតកម្មចម្បងរបស់ខ្លួន។ អ្នកស្រីនាយករដ្ឋមន្ត្រីបញ្ជាក់ថា រដ្ឋាភិបាលថៃ ត្រៀមខ្លួនរួចជាស្រេចដើម្បីគាំទ្រដល់ការពង្រីកអាជីវកម្មរបស់ក្រុមហ៊ុន Google នៅក្នុងទឹកដីថៃ។
មជ្ឈមណ្ឌលទិន្នន័យដំបូងបង្អស់របស់ក្រុមហ៊ុន Google នៅអាស៊ីអាគ្នេយ៍ គឺនៅប្រទេសសិង្ហបុរី ដែលក្រុមហ៊ុននេះប្រកាសសាងសង់នៅចុងឆ្នាំ២០១១ លើទំហំផ្ទៃដីប្រមាណ ២,៤៥ហិកតា និងរួចរាល់សម្រាប់ដំណើរការនៅចុងឆ្នាំ២០១៣ សម្រាប់បម្រើដល់អ្នកប្រើប្រាស់ទូទាំងតំបន់ ដែលសរុបទឹកប្រាក់វិនិយោគប្រមាណ ៨៥០លានដុល្លារអាមេរិក៕
 នៅក្នុងខេត្តឈុនបុរី ប្រទេសថៃ។){kind=link}