ក្រុមហ៊ុន Twitter ប្រកាសឲ្យអ្នកប្រើប្រាស់សេវាកម្មរបស់ខ្លួនទាំងអស់ ប្រញាប់ផ្លាស់ប្ដូរលេខកូដសម្ងាត់ (password) គណនី Twitter របស់ពួកគេ។
សេចក្ដីប្រកាសនេះ បន្ទាប់ពីក្រុមហ៊ុន Twitter រកឃើញថា មានកំហុសឆ្គងក្នុងការរក្សាលេខកូដសម្ងាត់របស់អ្នកប្រើប្រាស់ដែលគេអាចអានលេខកូដសម្ងាត់បាន (readable text password) នៅក្នុងប្រព័ន្ធកុំព្យូទ័រដោយមិនដឹងមូលហេតុ។
បើតាមសេចក្ដីប្រកាសរបស់ Twitter Support នៃក្រុមហ៊ុនបណ្ដាញសង្គមមួយនេះ នៅថ្ងៃព្រហស្បតិ៍ ទី៣ ខែឧសភា ឆ្នាំ២០១៨ បានឲ្យដឹងទៀតថា ភ្លាមៗបន្ទាប់ពីរកឃើញកំហុសឆ្គងនៃការរក្សាទុកលេខកូដសម្ងាត់របស់អ្នកប្រើប្រាស់បណ្ដាញសង្គមរបស់ខ្លួន ក្រុមហ៊ុនបានជួសជុលបញ្ហានេះរួចរាល់ហើយ។ ម្យ៉ាងទៀត ការស៊ើបអង្កេតរបស់ក្រុមហ៊ុន មិនបានរកឃើញថាមានការបែកធ្លាយ ឬក៏មានការវាយប្រហារដោយនរណាម្នាក់នោះទេ។
បច្ចុប្បន្ន អ្នកប្រើប្រាស់សេវាកម្ម Twitter សរុបទាំងអស់ចំនួនប្រមាណ ៣៣០លានគណនី។ ក្រុមហ៊ុន Twitter ក៏បានណែនាំឲ្យអ្នកប្រើប្រាស់ទាំងនេះ ផ្លាស់ប្ដូរលេខកូដសម្ងាត់របស់ខ្លួន ដើម្បីជៀសវាងហានិភ័យណាមួយកើតឡើង។
យោងតាម Twitter CTO លោក Parag Agrawal បានបង្ហាញថា Twitter ប្រើប្រាស់បច្ចេកទេសដែលពេញនិយមមួយ គឺមានឈ្មោះថា bcrypt ដែលប្ដូរលេខកូដពិតប្រាកដរបស់អ្នកប្រើប្រាស់ទៅជាសំណុំលេខ និងអក្សរចៃដន្យ (random) មុននឹងរក្សាទុកនៅក្នុងក្រុមហ៊ុន។ ការធ្វើរបៀបនេះ ដើម្បីការពារលេខកូដសម្ងាត់របស់អ្នកប្រើប្រាស់មិនឲ្យនរណាម្នាក់អាចមើលឃើញ សូម្បីតែបុគ្គលិករបស់ក្រុមហ៊ុន Twitter។
ទោះយ៉ាងណាក៏ដោយ លោក Parag Agrawal បានបន្ថែមទៀតថា «យើង (Twitter) បានរកឃើញកំហុសនេះដោយខ្លួនឯង ហើយយើងនឹងអនុវត្តគម្រោងការពារបញ្ហានេះមិនឲ្យកើតឡើងម្ដងទៀតនោះទេ»។ លោកបន្ថែមទៀតថា «យើងពិតជាសុំទោសចំពោះបញ្ហាដែលកើតឡើង។ យើងទទួលស្គាល់ពីកំហុស និងពេញចិត្តចំពោះការជឿទុកចិត្តមកលើយើង ហើយយើងប្ដេជ្ញាធ្វើឲ្យមានការជឿជាក់នេះកាន់តែកើនឡើងជារៀងរាល់ថ្ងៃ»។
របៀបប្ដូរលេខកូដសម្ងាត់គណនី Twitter (How to Reset Twitter Password)
ដើម្បីផ្លាស់ប្ដូរលេខកូដសម្ងាត់របស់លោកអ្នកនៅលើ Website Twitter សូមអនុវត្តដូចខាងក្រោម៖
- ចុចលើរូប Profile Picture នៅខាងលើផ្នែកខាងស្ដាំដៃ
- ចុចលើពាក្យ Settings and Privacy
- ចុចលើពាក្យ Password នៅផ្នែកខាងឆ្វេងដៃ រួចបញ្ចូលលេខកូដសម្ងាត់ចាស់ និងលេខសម្ងាត់ថ្មីដែលខ្លាំង (strong password) បន្ទាប់មកចុច Save changes ជាការស្រេច។
ដើម្បីផ្លាស់ប្ដូរលេខកូដសម្ងាត់នៅលើ iOS និង Android App សូមអនុវត្តតាមខាងក្រោម៖
- ចុចលើរូប Profile Picture នៅខាងលើផ្នែកខាងឆ្វេងដៃ
- ចុចលើពាក្យ Settings and Privacy
- ចុចលើពាក្យ Account
- ចុចលើពាក្យ Change Password (“Password” នៅលើ Android) រួចបញ្ចូលលេខកូដសម្ងាត់ថ្មីដែលខ្លាំង បន្ទាប់មកចុចប៊ូតុង CHANGE PASSWORD ជាការស្រេច។
សូមចែករំលែកដំណឹងនេះទៅកាន់មិត្តភ័ក្ដិរបស់លោកអ្នកឲ្យបានដឹងអំពីព័ត៌មាននេះផង។ សូមអរគុណ!
កំណត់ចំណាំ៖ ហាមយកអត្ថបទពីគេហទំព័រ www.www.techkhmer.net ទៅចុះផ្សាយដោយគ្មានការអនុញ្ញាត៕