ព្រឹត្តិការណ៍បារខែម (BarCamp) ឬហៅថាសន្និបាតបច្ចេកវិទ្យា ការចាប់ផ្ដើមអាជីវកម្ម និងពិព័រណ៍ការងារ នឹងប្រារព្ធនៅខេត្តបន្ទាយមានជ័យ ក្នុងបរិវេណសកលវិទ្យាល័យមានជ័យ។
ព្រឹត្តិការណ៍បារខែមបន្ទាយមានជ័យនេះមានរយៈពេលពីរថ្ងៃ គឺថ្ងៃទី២៥ ខែឧសភា ឆ្នាំ២០១៨ ចាប់ពីម៉ោង ១រសៀលដល់ម៉ោង ៥ល្ងាច ចំណែកឯថ្ងៃទី២៦ ខែឧសភា ឆ្នាំ២០១៨ ចាប់ពីម៉ោង ៨ព្រឹកដល់ម៉ោង ៥ល្ងាច។
លោកអ្នកដែលមានចំណាប់អារម្មណ៍ ជាពិសេសអ្នកនៅខេត្តបន្ទាយមានជ័យ អាចចូលរួមកម្មវិធីបារខែមនេះដោយសេរី និងមិនគិតថ្លៃឡើយ។ ជាងនេះទៀត លោកអ្នកអាចនឹងទទួលបានអាវយឺតដ៏ស្រស់ស្អាតផងដែរ ប្រសិនបើលោកអ្នកបានចុះឈ្មោះចូលរួមតាមរយៈតំណភ្ជាប់នេះ និងបានទៅដល់កន្លែងប្រារព្ធកម្មវិធីមុនគេ ពីព្រោះអាវយឺតមានកំណត់។ ដូច្នេះអ្នកទៅមុន នឹងទទួលបានអាវយឺតមុន។
តើព្រឹត្តិការណ៍បារខែមជាអ្វី?
ព្រឹត្តិការណ៍បារខែម ឬហៅថាសន្និបាតបច្ចេកវិទ្យា ការចាប់ផ្ដើមអាជីវកម្ម និងពិព័រណ៍ការងារ គឺជាព្រឹត្តិការណ៍ប្រចាំឆ្នាំ។ ព្រឹត្តិការណ៍នេះមានគោលបំណងផ្ដល់ឱកាសឲ្យអ្នកចូលរួមទាំងអស់ចែករំលែកចំណេះដឹង បទពិសោធន៍ និងកសាងទំនាក់ទំនងរវាងអ្នកចូលរួម និងអ្នកធ្វើបទបង្ហាញទាំងនៅក្នុងប្រទេសកម្ពុជា និងនៅក្នុងតំបន់ទាំងមូល។ ម្យ៉ាងវិញទៀត ព្រឹត្តិការណ៍នេះក៏ជាព្រឹត្តិការណ៍ជួបជុំរវាងសហគ្រិនវ័យក្មេង អ្នកជំនាញខាងបច្ចេកវិទ្យា សាស្ត្រាចារ្យ និងសិស្សនិស្សិត ដើម្បីចែករំលែកចំណេះដឹងបច្ចេកវិទ្យា សហគ្រិនភាព ទេសចរណ៍ បដិសណ្ឋារកិច្ច ការចាប់ផ្ដើមជំនួញ អ៊ីនធឺណិត អាជីពការងារ រចនា និងច្នៃប្រឌិតសម្រាប់ការសិក្សា ការងារ ជាដើម។
លើសពីនេះទៀត ព្រឹត្តិការណ៍នេះក៏អាចឲ្យពួកគេស្វែងយល់ពីការជ្រើសរើសគំនិតអាជីវកម្ម ស្វែងយល់ពីការបង្កើតគំរូអាជីវកម្ម ស្វែងយល់អំពីអតិថិជន ការផលិតផលិតផល និងសេវាកម្ម ផ្សព្វផ្សាយនិមិត្តសញ្ញាអាជីវកម្ម ទីផ្សារ និងការរៀបចំគម្រោងចំណាយចាប់ផ្ដើមអាជីវកម្ម។ល។
តើអ្នកចូលរួមបារខែមបន្ទាយមានជ័យ (BarCamp Banteaymeanchey) នឹងទទួលបានអត្ថប្រយោជន៍អ្វីខ្លះ?
- លោកអ្នកនឹងទទួលបានចំណេះដឹងថ្មីៗ គំនិតថ្មីៗ និងបានជួបអ្នកនិយមបច្ចេកវិទ្យា អ្នកទីផ្សារ អ្នកធ្វើអាជីវកម្ម អ្នកប្រើប្រាស់អ៊ីនធឺណិតធ្វើអាជីវកម្មជាដើម
- លោកអ្នកនឹងទទួលបានអាវយឺតដ៏ស្រស់ស្អាត (អាវមានកំណត់)
- លោកអ្នកនឹងឱកាសភ្ជាប់ទំនាក់ទំនងជាមួយវាគ្មិន និងអ្នកចូលរួមដទៃទៀតសម្រាប់អាជីវកម្ម និងបណ្ដាញការងារទៅថ្ងៃខាងមុខ
- លោកអ្នកអាចសិក្សារៀនសូត្រ និងយកបទពិសោធន៍ពីវាគ្មិនដែលបានចូលរួមកម្មវិធី
- លោកអ្នកមានឱកាសជួបអ្នកមានបទពិសោធន៍ធ្វើជំនួញ និងអ្នកបច្ចេកវិទ្យា
- លោកអ្នកមានឱកាសរៀនសូត្រពីអ្នកស្ម័គ្រចិត្ត និងអ្នករៀបចំព្រឹត្តិការណ៍បារខែមក្នុងការរៀបចំព្រឹត្តិការណ៍បច្ចេកវិទ្យាថ្មីៗ។
ព្រឹត្តិការណ៍បារខែមចុងក្រោយដែលប្រារព្ធធ្វើនៅឆ្នាំ២០១៨ គឺនៅសាកលវិទ្យាល័យសៅស៍អ៊ីសថ៍ អេយសៀ (University of South-East Asia) ក្នុងខេត្តសៀមរាប ដែលមានឈ្មោះថា បារខែមអង្គរ ២០១៨ (BarCamp Angkor 2018) កាលពីថ្ងៃទី២៣ និងថ្ងៃទី២៤ ខែមីនា ឆ្នាំ២០១៨។
ព្រឹត្តិការណ៍បារខែមបន្ទាយមានជ័យ ២០១៨ មានការគាំទ្រពីក្រសួងអប់រំ យុវជន និងកីឡា និងសាកលវិទ្យាល័យមានជ័យ ព្រមទាំងឧបត្ថម្ភដោយក្រុមហ៊ុនផ្ដល់សេវាទូរស័ព្ទស្មាត (Smart Axiata) និងក្រុមហ៊ុនផ្ដល់សេវាអ៊ីនធឺណិត EZECOM ព្រមទាំងរៀបចំដោយអ្នកស្ម័គ្រចិត្តមិនស្វែងរកប្រាក់ចំណេញមួយក្រុមដែលមានទស្សនៈវិស័យរួមគ្នា។
សូមចែករំលែកដំណឹងនេះទៅកាន់មិត្តភ័ក្ដិរបស់លោកអ្នកឲ្យដឹងផង។ សូមអរគុណ!
កំណត់ចំណាំ៖ ហាមយកអត្ថបទពីគេហទំព័រ www.www.techkhmer.net ទៅចុះផ្សាយដោយគ្មានការអនុញ្ញាត៕