BFF មិនបញ្ជាក់អំពីសុវត្ថិភាពគណនីហ្វេសប៊ុកនោះទេ

ឫទ្ធិស័ក្តិ

6 ឆ្នាំ ago

ក្នុងរយៈពេលថ្មីៗនេះ មានពាក្យចចាមអារ៉ាមមួយនៅលើបណ្ដាញសង្គមហ្វេសប៊ុក (Facebook) ដែលបំផុសឲ្យវាយពាក្យ BFF នៅក្នុង Comment ដើម្បីឆែកមើលសុវត្ថិភាពគណនីហ្វេសប៊ុក ថាមានសុវត្ថិភាពឬអត់នោះ។ ពាក្យចចាមអារ៉ាមនេះ គឺជាការមិនពិតនោះទេ។

ពាក្យចចាមអារ៉ាមដែលត្រូវបានគេចែករំលែកតៗគ្នានោះ គឺបានបំផុសថា បើវាយពាក្យ BFF ហើយប្រែជាពណ៌បៃតង នោះបញ្ជាក់ថាគណនីហ្វេសប៊ុកមានសុវត្ថិភាព ប៉ុន្តែបើមិនប្រែពណ៌វិញ នោះមានន័យថាគណនីហ្វេសប៊ុកងាយនឹងត្រូវគេលួច (Hack) ឬមិនមានសុវត្ថិភាព ជាដើម។

តាមពិត ហ្វេសប៊ុក (Facebook) បានសាកល្បងជ្រើសរើសពាក្យមួយចំនួនដើម្បីអនុញ្ញាតឲ្យអ្នកប្រើប្រាស់បណ្ដាញសង្គមរបស់ខ្លួន ប្រើប្រាស់សម្រាប់អបអរសាទរចំពោះមិត្តភ័ក្ដិ ឬក្រុមគ្រួសារ។ ពាក្យដែលត្រូវជ្រើសរើសដាក់ឲ្យប្រើប្រាស់នៅក្នុងបណ្ដាញសង្គមទាំងនោះ នឹងប្រែជាពណ៌ផ្សេងៗគ្នា និងបង្ហាញសកម្មភាពផ្សេងៗគ្នាផងដែរនៅលើកញ្ចក់ទូរស័ព្ទរបស់លោកអ្នក។

បើតាមការសង្កេត គឺមានម្ចាស់ផេកហ្វេសប៊ុក (Page owner) មួយចំនួន បានឆ្លៀតឱកាសបំផុសពាក្យចចាមអារ៉ាមអំពីសុវត្ថិភាពគណនីហ្វេសប៊ុក ដោយគ្រាន់តែវាយពាក្យ BFF នៅក្នុង Comment ក្នុងផុស (post) របស់ខ្លួន ក្នុងគោលបំណងដើម្បីចំណេញផលប្រយោជន៍ផ្ទាល់ខ្លួន ដូចជាធ្វើឲ្យផុសរបស់ខ្លួនមានអ្នក Like ច្រើន អ្នក Comment ច្រើន អ្នកចែករំលែកច្រើន ដែលនាំឲ្យផេករបស់ពួកគេមាន activity កើនឡើង និងឆាប់ល្បីតែប៉ុណ្ណោះទេ។