ក្រុមហ៊ុនហ្វេសប៊ុក (Facebook) ប្រកាសនៅថ្ងៃទី១៩ ខែធ្នូ ឆ្នាំ២០១៨ នេះថា ខ្លួនបានលុបចោលទំព័រហ្វេសប៊ុក និងគណនីហ្វេសប៊ុករាប់រយនៅប្រទេសមីយ៉ាន់ម៉ា (Myanmar) ដែលមានភ្ជាប់ទៅកាន់ក្រុមយោធានៃប្រទេសនេះ។
ការលុបចោលទំព័រហ្វេសប៊ុក និងគណនីហ្វេសប៊ុករាប់រយនេះ គឺស្របពេលដែលក្រុមហ៊ុននេះប្រឹងប្រែងឆ្លើយតបទៅនឹងការរិះគន់លើការបរាជ័យក្នុងការគ្រប់គ្រងលើការនិយាយរើសអើង និងព័ត៌មានមិនពិតនៅលើបណ្ដាញសង្គមរបស់ខ្លួន។
ទំព័រហ្វេសប៊ុកចំនួន ៤២៥ទំព័រ ១៧ក្រុម (Group) គណនីហ្វេសប៊ុកចំនួន ១៣៥គណនី និងគណនី Instagram ចំនួន ១៥គណនី ត្រូវបានក្រុមហ៊ុនហ្វេសប៊ុកលុបចោល។ ទំព័រ និងគណនីទាំងនេះ ត្រូវបានគេបង្កើតជាទំព័រលក្ខណៈព័ត៌មានឯករាជ្យ ទំព័រកម្សាន្ត ទំព័រសម្រស់ និងជីវិត ប៉ុន្តែធាតុពិតនោះ ទំព័រទាំងនេះបានភ្ជាប់ទៅកាន់ក្រុមយោធា ឬទំព័រហ្វេសប៊ុកដែលត្រូវបានលុបចោលកាលពីលើកមុន។ នេះបើតាមការចុះផ្សាយរបស់សារព័ត៌មាន Channel News Asia នៅថ្ងៃទី១៩ ធ្នូ នេះ។
នេះជាលើកទី៣ ហើយដែលក្រុមហ៊ុនហ្វេសប៊ុកបានលុបទំព័រ និងគណនីហ្វេសប៊ុកនៅប្រទេសមីយ៉ាន់ម៉ា បន្ទាប់ពីការលុបចោលទំព័រ និងគណនីហ្វេសប៊ុកកាលពីខែសីហា និងក្នុងខែតុលា។
បញ្ហាដែលឈានដល់កម្រិតបន្ទាន់កាលពីឆ្នាំមុន ដោយសារតែយោធាមីយ៉ាន់ម៉ា បានដឹកជនជាតិរ៉ូហ៊ីងយ៉ា (Rohingya) ជាង ៧២ម៉ឺននាក់ (៧២០,០០០នាក់) ទៅកាន់ប្រទេសបង់ក្លាដេស (Bangladesh)។
ក្រុមហ៊ុនហ្វេសប៊ុកបញ្ជាក់ថា ក្រុមហ៊ុនមិនចង់ឲ្យមនុស្ស ឬអង្គភាពណាមួយបង្កើតបណ្ដាញនៃគណនីដើម្បីបំភាន់ (បោក) អ្នកដទៃ អំពីតើពួកគេជានរណា? ឬអ្វីដែលពួកគេកំពុងធ្វើនោះទេ?
សូមចែករំលែកដំណឹងនេះទៅកាន់មិត្តភ័ក្ដិរបស់លោកអ្នកឲ្យបានដឹងផង។ សូមអរគុណ..!
កំណត់ចំណាំ៖ ហាមយកអត្ថបទពីគេហទំព័រ www.www.techkhmer.net ទៅចុះផ្សាយដោយគ្មានការអនុញ្ញាត៕