Google និង Facebook ចូលរួមអបអរសាទរទិវាបុណ្យឯករាជ្យជាតិរបស់កម្ពុជា ដោយក្រុមហ៊ុន Google បានដាក់ទង់ជាតិកម្ពុជា នៅលើ Google Doodle នៃគេហទំព័រស្វែងរករបស់ខ្លួន ចំណែកឯក្រុមហ៊ុន Facebook បានបង្ហោះផ្ទាំងរូបភាពមួយនៅលើ News Feed របស់អ្នកប្រើប្រាស់ហ្វេសប៊ុក។
ថ្ងៃទី៩ ខែវិច្ឆិកា ឆ្នាំ២០១៧ ដែលជាខួបលើកទី៦៤ ដែលកម្ពុជា ទាមទារឯករាជ្យបានពីបារាំង កាលពីថ្ងៃទី៩ ខែវិច្ឆិកា ឆ្នាំ១៩៥៣។
ទង់ជាតិកម្ពុជា នៅក្នុងរង្វង់មូលធំជាងគេដែលតំណាងឲ្យអក្សរ O ទីពីរនៃឈ្មោះក្រុមហ៊ុនរុករក (Google Search Engine) ដ៏ធំនៅលើពិភពលោកនោះ មានផ្ទៃពពកនៅពីក្រោយផង។ នៅពេលលោកអ្នកចុចលើ Google Doodle នោះ Google នឹងបង្ហាញរាល់ព័ត៌មានទាំងអស់ដែលទាក់ទងនឹងទិវាបុណ្យឯករាជ្យជាតិរបស់កម្ពុជា។
ចំណែកក្រុមហ៊ុនហ្វេសប៊ុក (Facebook) វិញ ក៏បានចូលរួមអបអរសាទរទិវាបុណ្យឯករាជ្យជាតិរបស់កម្ពុជា ដែរ ដោយបានបង្ហាញផ្ទាំងរូបភាពមួយមានរូបវិមានឯករាជ្យ និងការបង្ហោះប៉េងប៉ោងនៅលើ News Feed របស់អ្នកប្រើប្រាស់ហ្វេសប៊ុកនៅថ្ងៃនេះផងដែរ។ នៅក្នុងផ្ទាំងរូបភាពនោះ Facebook បានសរសេរសារយ៉ាងខ្លីថា “យើងទាំងអស់គ្នានៅក្រុមហ៊ុនហ្វេសប៊ុក សូមជូនពរអ្នកក្នុងថ្ងៃដ៏អស្ចារ្យមួយដែលប្រារព្ធនៅកម្ពុជា ជាមួយមិត្តភ័ក្ដិ និងក្រុមគ្រួសារ“។
កំណត់ចំណាំ៖ ហាមយកអត្ថបទពីគេហទំព័រ www.www.techkhmer.net ទៅចុះផ្សាយដោយគ្មានការអនុញ្ញាត៕