ឆ្នាំ២០១៨ គឺជាខួបអនុស្សាវរីយ៍ ៦៥ឆ្នាំនៃការបង្កើតទំនាក់ទំនងការទូតរវាងប្រទេសជប៉ុន និងប្រទេសកម្ពុជា។ ដើម្បីអបអរសាទរខួបនៃទំនាក់ទំនងមិត្តភាពនេះ ស្ថានទូតជប៉ុន ប្រចាំនៅកម្ពុជា នឹងបង្កើតកម្មវិធីប្រឡងប្រជែងបង្កើតឡូហ្គោ (Logo) ដែលពិពណ៌នាអំពីទំនាក់ទំនងមិត្តភាពរវាងជប៉ុន និងកម្ពុជា ហើយឡូហ្គោនេះត្រូវមានលក្ខណៈសមស្របសម្រាប់ប្រើប្រាស់នៅក្នុងការផ្សព្វផ្សាយ ឬក៏ប្រើប្រាស់ក្នុងវិស័យសារព័ត៌មានផ្សេងៗទៀត។
សេចក្ដីប្រកាសព័ត៌មានរបស់ស្ថានទូតជប៉ុន ប្រចាំនៅកម្ពុជា ឲ្យដឹងថា បេក្ខជនដែលចាប់អារម្មណ៍ អាចចូលរួមកម្មវិធីប្រឡងប្រជែងបង្កើតឡូហ្គោនេះដោយសេរី ដោយមិនមានកំណត់អំពីសញ្ជាតិ អាយុ ភេទ និងមុខរបរឡើយ។ ចំណែកឯថ្ងៃផុតកំណត់ឈប់ទទួលពាក្យចូលរួមកម្មវិធី គឺនៅថ្ងៃព្រហស្បតិ៍ ទី១៣ ខែវិច្ឆិកា ឆ្នាំ២០១៧។
ការជ្រើសរើស ឬការវាយតម្លៃ នឹងត្រូវធ្វើឡើងយ៉ាងល្អិតល្អន់ដោយគណៈកម្មការរៀបចំខួប ៦៥ឆ្នាំនៃទំនាក់ទំនងមិត្តភាពរវាងកម្ពុជា និងជប៉ុន។ ជ័យលាភីតែម្នាក់គត់ នឹងត្រូវជ្រើសរើស និងត្រូវប្រកាសលទ្ធផលនៅលើគេហទំព័រ (website) និងហ្វេសប៊ុក (facebook) របស់ស្ថានទូតជប៉ុន ប្រចាំនៅកម្ពុជា។
សេចក្ដីប្រកាសព័ត៌មានរបស់ស្ថានទូតជប៉ុន ដដែល ឲ្យដឹងបន្ថែមថា ខួប ៦៥ឆ្នាំនៃទំនាក់ទំនងជាមិត្តភាពរវាងជប៉ុន និងកម្ពុជា នឹងប្រព្រឹត្តទៅចាប់ពីថ្ងៃទី១ ខែមករា ឆ្នាំ២០១៨ រហូតដល់ថ្ងៃទី៣១ ខែធ្នូ ឆ្នាំ២០១៨។
លក្ខខណ្ឌនៃការរចនាឡូហ្គោ (Logo)
- ត្រូវប្រើក្រដាសបញ្ឈរដែលមានផ្ទៃពណ៌សទំហំ A4
- ផ្ញើឡូហ្គោជាពីរប្រភេទ គឺប្រភេទស–ខ្មៅ និងប្រភេទមានពណ៌
- ផ្ញើប្រភេទទិន្នន័យឡូហ្គោជា JPEG, GIF, Illustrator និង Photoshop (អាចនឹងមានការស្នើសុំផ្លាស់ប្ដូរប្រភេទទិន្នន័យ)
- ការរចនាមិនកំណត់អំពីការលាយពណ៌ ឬការប្រើពណ៌ប្រដេញនោះទេ
- បេក្ខជនម្នាក់អាចដាក់ពាក្យចូលរួមប្រកួតបានច្រើនឡូហ្គោ ប៉ុន្តែត្រូវបំពេញពាក្យសុំមួយសម្រាប់ឡូហ្គោមួយ
- រាល់ឯកសារដែលដាក់ពាក្យរួច មិនអាចដកវិញបានទេ។
របៀបនៃការដាក់ពាក្យ
បេក្ខជនដែលចាប់អារម្មណ៍ចូលរួមប្រកួតប្រជែងបង្កើតឡូហ្គោ អាចដាក់ពាក្យស្នើសុំតាមរយៈអ៊ីមែល ដោយដាក់ចំណងជើងអ៊ីមែលថា “ការដាក់ពាក្យសុំចូលរួមបង្កើតឡូហ្គោសម្រាប់ប្រារព្ធខួប ៦៥ឆ្នាំនៃទំនាក់ទំនងមិត្តភាពរវាងជប៉ុន និងកម្ពុជា” និងផ្ដល់ព័ត៌មានទីមួយដូចជា ឈ្មោះ ភេទ អាយុ សញ្ជាតិ មុខរបរ អាសយដ្ឋាន អ៊ីមែល និងលេខទូរស័ព្ទ។ ចំពោះព័ត៌មានផ្ទាល់ខ្លួនដូចជាឈ្មោះ និងមុខរបររបស់បេក្ខជនជ័យលាភី នឹងត្រូវផ្សព្វផ្សាយជាសាធារណៈ។
ចំណែកព័ត៌មានទីពីរដែលបេក្ខជនត្រូវផ្ដល់តាមរយៈពាក្យស្នើសុំនេះ គឺត្រូវពន្យល់អត្ថន័យនៃការរចនាឡូហ្គោប្រមាណជា ៣ជួរអក្សរ ហើយអត្ថន័យនៃឡូហ្គោនេះ ក៏នឹងត្រូវផ្សព្វផ្សាយជាសាធារណៈដែរ។ ចំពោះទិន្នន័យដើមរបស់ឡូហ្គោ ត្រូវផ្ញើភ្ជាប់ជាមួយនឹងអ៊ីមែល (ទំហំអ៊ីមែលត្រូវតែតូចជាង 500KB)។
កម្មសិទ្ធិបញ្ញា
- រាល់ស្នាដៃទាំងអស់ បេក្ខជនត្រូវធ្វើដោយខ្លួនឯងផ្ទាល់ និងមិនទាន់បានបោះពុម្ព ឬប្រើប្រាស់
- ស្នាដៃដែលផ្ទុយពីសណ្ដាប់ធ្នាប់សង្គម ឬរំលោភទៅលើច្បាប់ និងនីតិវិធី រួមទាំងការបង្ខូចកេរ្តិ៍ឈ្មោះ និងរំលោភលើកម្មសិទ្ធិបញ្ញារបស់ភាគីទី៣ នឹងមិនអាចចូលរួមប្រកួតបានទេ
- រាល់ស្នាដៃដែលបានបង្កើតឡើង នឹងក្លាយជាកម្មសិទ្ធិរបស់ស្ថានទូតជប៉ុន ប្រចាំនៅកម្ពុជា
- ការប្រើប្រាស់ឡូហ្គោជាផ្លូវការសម្រាប់ខួបអនុស្សាវរីយ៍ នឹងត្រូវធ្វើការសម្រេចដោយស្ថានទូតជប៉ុន ប្រចាំកម្ពុជា និងរាជរដ្ឋាភិបាលកម្ពុជា
- មិនអនុញ្ញាតឲ្យមានការកែប្រែទំហំ និងពណ៌ដើមរបស់ឡូហ្គោនោះទេ។
បើបេក្ខជនមានសំណួរ ឬចង់ដឹងព័ត៌មានបន្ថែម សូមទាក់ទងទៅកាន់ផ្នែកវប្បធម៌ និងព័ត៌មាននៃស្ថានទូតជប៉ុន ប្រចាំកម្ពុជា តាមរយៈទូរស័ព្ទលេខ ០២៣ ២១៧ ១៦១ (#១១២២) ឬអ៊ីមែល
ខាងក្រោមជាគំរូនៃពាក្យស្នើសុំចូលរួមប្រកួត (ចុចត្រង់នេះដើម្បីទាញយកពាក្យស្នើសុំ)
កំណត់ចំណាំ៖ ហាមយកអត្ថបទពីគេហទំព័រ www.www.techkhmer.net ទៅចុះផ្សាយដោយគ្មានការអនុញាត៕