វៀតណាម នឹងចេញលក់ទូរស័ព្ទឆ្លាតវៃ (smartphone) ដំបូងបង្អស់របស់ខ្លួនចំនួន ៤ម៉ូដែល នៅថ្ងៃទី១៤ ខែធ្នូ ឆ្នាំ២០១៨។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ (Reuters)។
ក្រុមហ៊ុន Vingroup ដែលជាក្រុមហ៊ុនវៀតណាម និងមានតម្លៃទីផ្សារធំបំផុតនៅវៀតណាម ត្រូវបានទីភ្នាក់ងារសារព័ត៌មានរ៉យទ័រ (Reuters) ដកស្រង់សេចក្ដីប្រកាសរបស់ក្រុមហ៊ុននេះនៅថ្ងៃច័ន្ទ ទី៣ ខែធ្នូ ឆ្នាំ២០១៨ ថា Vingroup នឹងបញ្ចេញស្មាតហ្វូនដំបូងបង្អស់ចំនួន ៤ម៉ូដែលក្រោមយីហោឈ្មោះថា “Vsmart”។ កាលពី ២ខែមុន ក្រុមហ៊ុននេះក៏បានប្រកាសជាផ្លូវការនូវរថយន្តផលិតក្នុងស្រុកលើកដំបូងដែលមានម៉ាកយីហោ VinFast ផងដែរ។
រោងចក្រដែលផលិតស្មាតហ្វូននេះ ស្ថិតនៅទីក្រុង Haiphong ភាគខាងជើងនៃប្រទេសវៀតណាម ដែលមានសមត្ថភាពផលិតស្មាតហ្វូនចំនួន ៥លានគ្រឿងក្នុងមួយឆ្នាំក្នុងដំណាក់កាលទីមួយ។ ក្រុមហ៊ុន Vingroup និយាយនៅក្នុងសេចក្ដីប្រកាសនោះថា ខ្លួនមានភាគហ៊ុន ៥១ភាគរយនៅក្រុមហ៊ុនបច្ចេកវិទ្យាអេស្ប៉ាញ BQ ហើយខ្លួននឹងប្រើប្រាស់អ្នកជំនាញអេស្ប៉ាញ ដើម្បីអភិវឌ្ឍស្មាតហ្វូនរបស់ខ្លួន។
ប្រទេសវៀតណាម ជាមូលដ្ឋានផលិតស្មាតហ្វូនធំបំផុតសម្រាប់ក្រុមហ៊ុន Samsung ហើយក្រុមហ៊ុន Vingroup នឹងក្លាយជាគូប្រកួតប្រជែងជាមួយក្រុមហ៊ុន Samsung និង Apple នៅវៀតណាម ដែលមានប្រជាជន ៩៥លាននាក់។
Vingroup ក៏បានបញ្ជាក់ដែរថា ក្រុមហ៊ុនខ្លួននឹងផលិត Smart TV និងផលិតផលឆ្លាតវៃផ្សេងៗទៀតផងដែរនៅពេលខាងមុខ។
សូមចែករំលែកដំណឹងនេះទៅកាន់មិត្តភ័ក្ដិរបស់អ្នកឲ្យបានដឹងផង។ សូមអរគុណ..!
កំណត់ចំណាំ៖ ហាមយកអត្ថបទពីគេហទំព័រ www.www.techkhmer.net ទៅចុះផ្សាយដោយគ្មានការអនុញ្ញាត៕