កម្លាំងនគរបាលខណ្ឌចំការមន ឃាត់ខ្លួនបុរសម្នាក់ពាក់ព័ន្ធនឹងករណីលួចកាន់កាប់គណនីហ្វេសប៊ុក (Facebook Account) អ្នកដទៃដោយគ្មានការអនុញ្ញាត និងបង្ហោះរូបភាពអាក្រាតបរិហារកេរ្តិ៍ម្ចាស់គណនីហ្វេសប៊ុក។
នាយកដ្ឋានប្រឆាំងបទល្មើសបច្ចេកវិទ្យា ផ្សព្វផ្សាយលើទំព័រហ្វេសប៊ុកផ្លូវការរបស់ខ្លួននៅយប់ថ្ងៃទី០៤ ខែមេសា ឆ្នាំ២០១៩ ឲ្យដឹងថា នាយកដ្ឋានប្រឆាំងបទល្មើសបច្ចេកវិទ្យា សហការជាមួយនឹងសមត្ថកិច្ចនៃកម្លាំងអធិការដ្ឋាននគរបាលខណ្ឌចំការមន បានឃាត់ខ្លួនជនសង្ស័យម្នាក់ឈ្មោះ លី សុខផេង នៅថ្ងៃទី០៣ ខែមេសា ពាក់ព័ន្ធនឹងករណីលួចកាន់កាប់គណនីហ្វេសប៊ុកអ្នកដទៃដោយគ្មានការអនុញ្ញាត និងបានបង្ហោះរូបភាពអាក្រាតបរិហារកេរ្តិ៍ម្ចាស់គណនីហ្វេសប៊ុក។
នាយកដ្ឋានឲ្យដឹងទៀតថា ការឈានដល់ឃាត់ខ្លួនជនសង្ស័យម្នាក់ខាងលើ បន្ទាប់ពីមានការឯកភាពពីព្រះរាជអាជ្ញារងអមសាលាដំបូងរាជធានីភ្នំពេញ លោក រៀល សុភិន និងមានការចង្អុលបង្ហាញពីដើមបណ្ដឹងអំពីការលួចកាន់កាប់គណនីហ្វេសប៊ុក និងបង្ហោះរូបភាពអាក្រាតរបស់ម្ចាស់គណនីហ្វេសប៊ុក។
រហូតដល់រសៀលថ្ងៃទី០៤ ខែមេសា នាយកដ្ឋានប្រឆាំងបទល្មើសបច្ចេកវិទ្យាបានបញ្ជូនសំណុំរឿង និងជនសង្ស័យទៅសាលាដំបូងរាជធានីភ្នំពេញ ដើម្បីចាត់ការតាមនីតិវិធី។
កាលពីថ្ងៃទី២៦ ខែមីនា ឆ្នាំ២០១៩ បុរសម្នាក់ឈ្មោះ វឿន គឹមលន់ អាយុ ២៤ឆ្នាំ ក៏ត្រូវបានឃាត់ខ្លួននៅខេត្តបន្ទាយមានជ័យ ពាក់ព័ន្ធនឹងករណីបង្ហោះព័ត៌មានមិនពិតនៅលើបណ្ដាញសង្គមហ្វេសប៊ុក (Facebook) និងបណ្ដាញសង្គមយូធូប (YouTube) ក្នុងគោលបំណងរកប្រាក់ចំណូលពីបណ្ដាញសង្គមទាំងនេះ។ ចំណែកឯកាលពីខែវិច្ឆិកា ឆ្នាំ២០១៨ នាយកដ្ឋានក៏បានឃាត់ខ្លួនជនសង្ស័យម្នាក់ដែលគំរាមយកប្រាក់ពីជនរងគ្រោះ ដោយព្រមានបង្ហោះរូបភាព និងវីដេអូអាក្រាតរបស់ជនរងគ្រោះនៅលើបណ្ដាញសង្គម បន្ទាប់ពីជនសង្ស័យបោកប្រាស់បានពីជនរងគ្រោះ។
សូមចែករំលែកដំណឹងនេះទៅកាន់មិត្តភ័ក្ដិរបស់លោកអ្នកឲ្យបានដឹងអំពីព័ត៌មាននេះផង។ សូមអរគុណ!
កំណត់ចំណាំ៖ ហាមយកអត្ថបទពីគេហទំព័រ www.www.techkhmer.netទៅចុះផ្សាយដោយគ្មានការអនុញ្ញាត៕