ក្រុមហ៊ុនហ្វេសប៊ុក (Facebook) ទើបតែដាក់បញ្ចូលមុខងារថ្មីមួយទៅក្នុងកម្មវិធីផ្ញើសារ Messenger ដែលអនុញ្ញាតឲ្យអ្នកផ្ញើសារ អាចលុបសាររបស់ខ្លួនចេញវិញបានសម្រាប់គ្រប់ភាគីទាំងអស់ ប្រសិនបើគិតថាផ្ញើច្រឡំ ឬវាយអក្សរខុស។
សេចក្ដីប្រកាសព័ត៌មាននៅលើវេបសាយ (website) របស់ក្រុមហ៊ុនហ្វេសប៊ុក ថ្ងៃទី៥ ខែកុម្ភៈ ឆ្នាំ២០១៩ ឲ្យដឹងថា ក្រុមហ៊ុនបានដាក់ចេញនូវមុខងារថ្មីមួយបន្ថែមទៅក្នុងកម្មវិធី Messenger។ មុខងារថ្មីនេះ គឺអនុញ្ញាតឲ្យអ្នកប្រើប្រាស់កម្មវិធី Messenger អាចលុបសារជាអក្សរ រូបភាព និងវីដេអូចេញពីប្រអប់សារវិញ ប្រសិនបើគិតថាផ្ញើសារច្រឡំ ឬសរសេរអក្សរខុសជាដើម ប៉ុន្តែមិនឲ្យលើសពីរយៈពេល ១០នាទីឡើយ បន្ទាប់ពីបានផ្ញើសារចេញទៅកាន់ភាគីម្ខាងទៀត។
សេចក្ដីប្រកាសដដែលឲ្យដឹងទៀតថា សារដែលត្រូវបានលុបចេញវិញនោះ នឹងត្រូវជំនួសមកវិញនូវឃ្លាមួយបញ្ជាក់ថា សារត្រូវបានលុបចោល ដើម្បីប្រាប់ដំណឹងដល់ភាគីម្ខាងទៀត ឬអ្នករាល់គ្នានៅក្នុងក្រុម (Group Chat)។
កាលពីមុន អ្នកប្រើ Messenger អាចលុបសារបានតែសម្រាប់ខ្លួនឯងប៉ុណ្ណោះ ហើយភាគីម្ខាងទៀតនៅតែអាចមើលសាររបស់អ្នកបានដដែល។ បន្ទាប់ពីមុខងារលុបសារសម្រាប់គ្រប់ភាគីមាននៅលើគណនីរបស់លោក Mark Zuckerberg អគ្គនាយកក្រុមហ៊ុនហ្វេសប៊ុកកាលពីឆ្នាំមុន ក្រុមហ៊ុនក៏បានសន្យាដាក់បញ្ចូលមុខងារនេះសម្រាប់អ្នកប្រើប្រាស់ Messenger ទាំងអស់ផងដែរ។ រហូតដល់ថ្ងៃទី៥ ខែកុម្ភៈ នេះ ក្រុមហ៊ុនក៏បានបន្ថែមមុខងារថ្មីនេះទៅក្នុងកម្មវិធី Messenger។
អានអត្ថបទផ្សេងទៀត
ទោះយ៉ាងណាក៏ដោយ មុខងារថ្មីនេះមិនមែនមានន័យថាសារដែលផ្ញើទៅហើយ គ្មានអ្នកមើលឃើញនោះទេ ប្រសិនបើអ្នកទទួលបានបើកមើលសារនោះមុនអ្នកលុបចោល។ ដូច្នេះ អ្នកត្រូវរហ័សលុបសារចោលវិញភ្លាមៗ ប្រសិនបើដឹងថាច្រឡំ ឬសរសេរខុសអ្វីមួយនោះ។
ដើម្បីប្រើប្រាស់មុខងារថ្មីលុបសារសម្រាប់ភាគីទាំងអស់នេះបាន លោកអ្នកត្រូវធ្វើបច្ចុប្បន្នភាពកម្មវិធី Messenger (Update messenger app to latest version) ទៅកាន់ជំនាន់ចុងក្រោយបង្អស់ទាំងទូរស័ព្ទប្រើប្រព័ន្ធប្រតិបត្តិការ iOS និងទូរស័ព្ទប្រើប្រព័ន្ធប្រតិបត្តិការ Android។
របៀបប្រើមុខងារថ្មីលុបសារសម្រាប់គ្រប់ភាគីទាំងអស់
- ចុចឲ្យយូរលើសារដែលអ្នកចង់លុប (Long press)
- ចុចលើពាក្យ Remove នៅផ្នែកខាងក្រោម
- ជ្រើសរើសយកពាក្យ Remove for Everyone
- ចុចប៊ូតុង Remove ដើម្បីបញ្ជាក់ថាអ្នកចង់លុបសារនោះពិតមែន ជាការស្រេច។
សូមចែករំលែកដំណឹងនេះទៅកាន់មិត្តភ័ក្ដិរបស់លោកអ្នកឲ្យបានដឹងអំពីព័ត៌មាននេះផង។ សូមអរគុណ!
កំណត់ចំណាំ៖ ហាមយកអត្ថបទពីគេហទំព័រ www.www.techkhmer.net ទៅចុះផ្សាយដោយគ្មានការអនុញ្ញាត៕