Telegram ចេញមុខងារថ្មីជួយសម្រួលដល់អ្នកប្រើប្រាស់អាចទាញយកសារឆ្លើយឆ្លង (Importing Messages) របស់ពួកគេពីកម្មវិធី WhatsApp ចូលទៅក្នុងកម្មវិធី Telegram បាន។
ការបង្កើតមុខងារថ្មីនេះឡើង ស្របពេលដែលកម្មវិធី WhatsApp ដែលជាកម្មវិធីមួយរបស់ក្រុមហ៊ុនហ្វេសប៊ុក (Facebook) ត្រូវបានប្ដូរគោលការណ៍ប្រមូលយកទិន្នន័យពីអ្នកប្រើប្រាស់ និងមើលឃើញពីការកើនឡើងនៃចំនួនអ្នកប្រើប្រាស់កម្មវិធី Telegram ប្រមាណ ១០០លានគណនីនៅក្នុងខែមករា នេះ។
មុខងារថ្មី Importing Message របស់ Telegram អនុញ្ញាតឱ្យអ្នកប្រើប្រាស់ទាញយកសារអក្សរ រូបភាព ឯកសារ និងវីដេអូពីកម្មវិធីមួយចំនួនដូចជាកម្មវិធី WhatsApp កម្មវិធី Line និងកម្មវិធី KakaoTalk។ មុខងារនេះអាចប្រើបានទាំងសារឯកជន និងសារជាក្រុម។
ខាងក្រោមនេះ គឺជាវិធីទាញយកសារពីកម្មវិធី WhatsApp ទាំងនៅលើ iOS និង Android ទៅរក្សាទុកក្នុងកម្មវិធី Telegram។
របៀបទាញយកសារពី WhatsApp នៅលើទូរស័ព្ទប្រើប្រព័ន្ធប្រតិបត្តិការ iOS
ជំហានទី១៖ ដំណើរការកម្មវិធី WhatsApp
ជំហានទី២៖ ចុចលើ Contact info ឬ Group info ណាមួយដែលអ្នកចង់បាន
ជំហានទី៣៖ ចុចលើឃ្លា Export Chat
ជំហានទី៤៖ ជ្រើសយកកម្មវិធី Telegram ដែលមាននៅក្នុង Share menu
ជំហានទី៥៖ ជ្រើសរើស Chat ឬ Group ដែលអ្នកចង់ដាក់
ជំហានទី៦៖ ជ្រើសរើសយកពាក្យ Import
ជំហានទី៧៖ រង់ចាំរហូតដល់ការ import ចប់ជាការស្រេច។
របៀបទាញយកសារពី WhatsApp នៅលើទូរស័ព្ទប្រើប្រព័ន្ធប្រតិបត្តិការ Android
ជំហានទី១៖ ដំណើរការកម្មវិធី WhatsApp
ជំហានទី២៖ ចុចលើ Chat ឬ Group ណាមួយដែលអ្នកចង់បាន
ជំហានទី៣៖ ចុចលើសញ្ញាចុចបីបញ្ឈរ
ជំហានទី៤៖ ជ្រើសរើសយក More
ជំហានទី៥៖ ជ្រើសយកឃ្លា Export Chat
ជំហានទី៦៖ ជ្រើសរើសយកកម្មវិធី Telegram នៅក្នុង Share menu
ជំហានទី៧៖ ជ្រើសរើស Chat ឬ Group ដែលអ្នកចង់ដាក់សារ
ជំហានទី៨៖ រង់ចាំរហូតដំណើរការចប់ជាការស្រេច។
សារ (Message) ដែលអ្នកបាន Import នឹងត្រូវដាក់បញ្ចូលក្នុងថ្ងៃដែលអ្នកទាញយក ប៉ុន្តែវានឹងបន្ថែមនូវថ្ងៃខែឆ្នាំនិងម៉ោងរបស់សារនោះនៅក្នុងសារដែលអ្នកបាន import ផងដែរ៕