នាយកដ្ឋានប្រឆាំងបទល្មើសបច្ចេកវិទ្យា ប្រកាសជូនដំណឹងដល់អ្នកជួបប្រទះបញ្ហាដូចជា ការលួចយកគណនីហ្វេសប៊ុក (Hack Facebook Account) ឬការបោកប្រាស់តាមប្រព័ន្ធបណ្ដាញសង្គមផ្សេងៗ អាចដាក់ពាក្យបណ្តឹងទៅនគរបាលប្រឆាំងបទល្មើសបច្ចេកវិទ្យា (Anti Cyber Crime Police, ACCP) រៀងរាល់ម៉ោងធ្វើការចាប់ពីម៉ោង ៨ព្រឹក–៥រសៀល។
ការប្រកាសរបស់នាយកដ្ឋានប្រឆាំងបទល្មើសបច្ចេកវិទ្យា តាមរយៈការបង្ហោះសារនៅលើបណ្ដាញសង្គមហ្វេសប៊ុក (Anti Cyber Crime Facebook Page) នៅពេលនេះ ក្រោយពីឃើញមានគណនីហ្វេសប៊ុក (Facebook Account) និងគណនីអ៊ីមែល (Email Account) របស់បុគ្គលល្បីៗមួយចំនួន រួមទាំង Facebook Page របស់ពួកគាត់ផង ត្រូវបានជនមិនស្គាល់មុខ ឬហៅថាក្រុមហែកឃឺ (Hackers) លួចយកទៅកាន់កាប់ និងបង្ហោះព័ត៌មានផ្សេងៗដើម្បីគោលបំណងណាមួយរបស់ពួកគេ។
ការផ្ញើសារនេះ ក៏ជាការរំឭកផងដែរទៅកាន់អ្នកប្រើប្រាស់បណ្ដាញសង្គម និងប្រើប្រាស់គណនីនៅអ៊ីនធឺណិតទាំងអស់ ឲ្យមានការប្រុងប្រយ័ត្នខ្ពស់អំពីសុវត្ថិភាពនៃការប្រើប្រាស់អ៊ីនធឺណិត។ លើសពីនេះទៀត អ្នកប្រើប្រាស់អ៊ីនធឺណិតទាំងអស់ ក៏ត្រូវពិចារណាឲ្យបានម៉ត់ចត់មុននឹងជឿលើបុគ្គលណាមួយ ដែលផ្ញើសារឲ្យលោកអ្នកធ្វើអ្វីមួយដើម្បីពួកគេ ឧទាហរណ៍ដូចជា ជនខិលខូចបន្លំឲ្យលោកអ្នកផ្ញើលេខកូដសម្ងាត់នៃគណនីអនឡាញណាមួយ (Online) ឬក៏ស្នើឲ្យលោកអ្នកផ្ញើប្រាក់ឲ្យពួកគេជាដើម។
ចុចអានអត្ថបទផ្សេងទៀត៖
- ចាក់សោ facebook ថែមមួយជាន់ទៀតមិនឲ្យ Hackers លួចបាន
- Authy App កម្មវិធីបង្កើនសុវត្ថិភាពសម្រាប់គណនីលើអនឡាញ
- ចាក់សោ Gmail Account ថែមមួយជាន់ទៀតជាមួយ Authy 2FA App
- របៀបឆែកមើលថាតើមានគេលួចចូលមើលគណនីហ្វេសប៊ុកឬអត់
នាយកដ្ឋានប្រឆាំងបទល្មើសបច្ចេកវិទ្យា (Anti Cyber Crime Department) មានតួនាទីធ្វើជាសេនាធិការសិក្សារៀបចំគោលការណ៍ គោលនយោបាយ យុទ្ធសាស្ត្រ ផែនការសកម្មភាពលើការងារទប់ស្កាត់ សំដៅរួមចំណែកការពារសន្តិសុខជាតិ រក្សាសណ្ដាប់ធ្នាប់សាធារណៈ សុវត្ថិភាពសង្គម ដែលមានភារកិច្ចដូចខាងក្រោម៖
- សិក្សារៀបចំគោលការណ៍ វិធានការ យុទ្ធសាស្ត្រ និងផែនការសកម្មភាពលើការបង្ការ ទប់ស្កាត់ ស្រាវជ្រាវ ស៊ើបអង្កេត និងបង្ក្រាបបទល្មើសបច្ចេកវិទ្យា
- សហការជាមួយបណ្តាស្ថាប័នរដ្ឋ និងឯកជនដែលផ្គត់ផ្គង់សេវាបច្ចេកវិទ្យា និងទូរគមនាគមន៍គ្រប់ប្រភេទ ដើម្បីគ្រប់គ្រងលិខិតបទដ្ឋានជួលជាវសេវាទូរគមនាគមន៍បម្រើឲ្យការស្រាវជ្រាវ ស៊ើបអង្កេត ប្រមូលភស្តុតាង និងបង្ក្រាបបទល្មើសតាមប្រព័ន្ធបច្ចេកវិទ្យា ដែលធ្វើឲ្យប៉ះពាល់ដល់សន្តិសុខសណ្ដាប់ធ្នាប់សាធារណៈ និងសុវត្ថិភាពសង្គម
- សហការជាមួយបណ្តាស្ថាប័នរដ្ឋ និងឯកជនដែលពាក់ព័ន្ធ ដើម្បីផ្លាស់ប្ដូរបទពិសោធន៍ និងការងារបណ្តុះបណ្តាលដើម្បីលើកកម្ពស់សមត្ថភាពចំណេះដឹងលើកិច្ចប្រតិបត្តិការ ប្រយុទ្ធប្រឆាំងបទល្មើសបច្ចេកវិទ្យា
- ប្រមូល និងវិភាគទិន្នន័យប្រព័ន្ធទូរគមនាគមន៍ សំដៅរកឲ្យឃើញបទល្មើស និងការគំរាមកំហែងដល់សន្តិសុខជាតិ ដើម្បីចាត់វិធានការតាមច្បាប់ ស៊ើបអង្កេត និងចាត់វិធានការតាមច្បាប់ចំពោះសកម្មភាពញុះញង់ ជេរប្រមាថ រើសអើងពូជសាសន៍បង្កចលាចលក្នុងសង្គមតាមប្រព័ន្ធអ៊ីនធឺណិត
- ស្រាវជ្រាវ ស៊ើបអង្កេត និងបង្ក្រាបការជ្រៀតជ្រែកចូល និងបំផ្លិចបំផ្លាញប្រព័ន្ធព័ត៌មានវិទ្យា ការបង្កើតមេរោគកុំព្យូទ័របំផ្លាញឯកសារ ឬបង្កការរំខានដល់ដំណើរការប្រព័ន្ធបច្ចេកវិទ្យា និងការធ្វើចារកម្មទិន្នន័យ
- ស្រាវជ្រាវ ស៊ើបអង្កេត និងបង្ក្រាបការបើកល្បែងស៊ីសងខុសច្បាប់តាមប្រព័ន្ធបំផ្លិចបំផ្លាញនៅក្នុងព្រះរាជាណាចក្រកម្ពុជា
- ស្រាវជ្រាវ ស៊ើបអង្កេត និងបង្ក្រាបបទល្មើសក្លែងបន្លំលួចប្រាក់តាមប្រព័ន្ធធនាគារ
- ស្រាវជ្រាវធ្វើកោសល្យវិច័យ និងវិភាគទិន្នន័យក្នុងឧបករណ៍បច្ចេកទេស សំដៅរកឃើញភស្តុតាងសម្រាប់បម្រើផ្លូវច្បាប់
- សហការផ្តល់ជំនួយផ្នែកបច្ចេកទេសកោសល្យវិច័យបច្ចេកវិទ្យាដល់ស្ថាប័ន ដែលមានសមត្ថកិច្ចពាក់ព័ន្ធសម្រាប់បម្រើនីតិវិធីច្បាប់
- សហប្រតិបត្តិការជាមួយស្ថាប័នជាតិ និងអន្តរជាតិដែលពាក់ព័ន្ធ ដើម្បីផ្លាស់ប្ដូរព័ត៌មានចារកម្ម សំដៅមានវិធានការទាន់ពេលវេលា
- ធ្វើការងាររដ្ឋបាលបុគ្គលិក បណ្តុះបណ្តាល និងការងារភស្តុតាងគណនេយ្យរបស់នាយដ្ឋាន
- ធ្វើរបាយការណ៍បូកសរុបលទ្ធផលការងារ និងទិសដៅបន្តរបស់នាយកដ្ឋានប្រឆាំងបទល្មើសបច្ចេកវិទ្យាតាមការកំណត់
- ទទួលអនុវត្តភារកិច្ច និងសិទ្ធិផ្សេងៗទៀតដែលប្រធាននាយដ្ឋានកណ្តាលសន្តិសុខប្រគល់ឲ្យនាយដ្ឋានប្រឆាំងបទល្មើសបច្ចេកវិទ្យា ដឹកនាំដោយប្រធានមួយរូប និងមានអនុប្រធានមួយចំនួនតាមការកំណត់។
អាស្រ័យដូចនេះ បើសិនជាលោកអ្នកជួបបញ្ហាមានការលួចយកគណនីហ្វេសប៊ុក ឬការបោកប្រាស់តាមអ៊ីនធឺណិតណាមួយ លោកអ្នកអាចទាក់ទងទៅកាន់ទូរស័ព្ទលេខ ០២៣ ៧២៦ ៨២២ ឬទាក់ទងលេខទូរស័ព្ទទាន់ហេតុការណ៍របស់អគ្គស្នងការនគរបាលជាតិ គឺលេខ ១១៧ ឬ ១១៨ ក៏បាន។
ក្រៅពីផ្ដល់ដំណឹងតាមរយៈទូរស័ព្ទ លោកអ្នកក៏អាចទាក់ទងទៅកាន់នាយកដ្ឋានប្រឆាំងបទល្មើសបច្ចេកវិទ្យា (Anti Cyber Crime Department) ដោយផ្ទាល់ ដែលមានអាសយដ្ឋាននៅក្នុងក្រសួងមហាផ្ទៃ អគារ L តាមបណ្ដោយមហាវិថីព្រះនរោត្តម ខណ្ឌចំការមន រាជធានីភ្នំពេញ។
សូមចែករំលែកអត្ថបទទៅកាន់មិត្តភ័ក្ដិរបស់លោកអ្នកផង។ សូមអរគុណ!
កំណត់ចំណាំ៖ ហាមយកអត្ថបទពីគេហទំព័រ www.www.techkhmer.net ទៅចុះផ្សាយដោយគ្មានការអនុញ្ញាត៕