Edward Snowden អតីត​មន្ត្រី​ចារកម្ម​អាមេរិក​ត្រូវ​បាន​ផ្ដល់​សញ្ជាតិ​រុស្ស៊ី

714
លោក Edward Snowden អតីត​មន្ត្រី​នៃ​ទីភ្នាក់ងារ​សន្តិសុខ​ជាតិ​សហរដ្ឋ​អាមេរិក (National Security Agency, NSA)

លោក Edward Snowden អតីត​មន្ត្រី​នៃ​ទីភ្នាក់ងារ​សន្តិសុខ​ជាតិ​សហរដ្ឋ​អាមេរិក (National Security Agency, NSA) ត្រូវ​បាន​ផ្ដល់​សញ្ជាតិ​រុស្ស៊ី។ នេះ​បើ​តាម​ការ​ចុះផ្សាយ​នៅ​លើ​សារព័ត៌មាន CNN។

ចូលរួម Telegram របស់ Techkhmer.net ដើម្បី​ទទួល​បាន​គន្លឹះ និង​ដំណឹង​ថ្មីៗ!

Loading...

សារព័ត៌មាន​ដដែល​នេះ​បាន​ដកស្រង់​សេចក្ដី​សម្រេច​មួយ​ចេញ​ផ្សាយ​ដោយ​រដ្ឋាភិបាល​រុស្ស៊ី កាលពី​ថ្ងៃ​ចន្ទ ទី​២៦ កញ្ញា មក​ចុះផ្សាយ​ឱ្យ​ដឹង​ថា ប្រធានាធិបតី​រុស្ស៊ី លោក វ៉្លាឌីមៀរ ពូទីន (Vladimir Putin) សម្រេច​ផ្ដល់​សញ្ជាតិ​រុស្ស៊ី​ដល់​អតីត​មន្ត្រី​ទីភ្នាក់ងារ​សន្តិសុខ​ជាតិ​អាមេរិក​ឈ្មោះ Edward Snowden បន្ទាប់ពី​លោក និង​ភរិយា​របស់​លោក​ដាក់​ពាក្យ​ស្នើសុំ​សញ្ជាតិ​រុស្ស៊ី កាលពី​អំឡុង​ខែ​វិច្ឆិកា ឆ្នាំ​២០២០។

លោក Edward Snowden ត្រូវ​បាន​ចោទ​ប្រកាន់​ពី​បទ​បញ្ចេញ​ឯកសារ​សម្ងាត់​របស់​ទីភ្នាក់ងារ​សន្តិសុខ​ជាតិ​អាមេរិក​កាលពី ៩​ឆ្នាំ​មុន គឺ​ក្នុង​ឆ្នាំ​២០១៣ ស្ដីពី​ការ​ស៊ើបការណ៍​សម្ងាត់​របស់​អាមេរិក និង​កម្មវិធី​ឃ្លាំមើល​មេដឹកនាំ​ពិភពលោក​សំខាន់ៗ​ដែល​ធ្វើឡើង​ដោយ NSA ជា​កន្លែង​ដែល​លោក​ធ្លាប់​ធ្វើការ។

បន្ទាប់​ពី​មាន​ការ​រក​ឃើញ​ថា​លោក Snowden បាន​ទម្លាយ​ឯកសារ​សម្ងាត់​នេះ លោក​ក៏​រត់​ភៀស​ខ្លួន​ទៅ​រស់នៅ​និរទេស​ខ្លួន​ក្នុង​ទីក្រុង​មូស្គូ ប្រទេស​រុស្ស៊ី។ ទោះជាយ៉ាងណា អាជ្ញាធរ​អាមេរិក​តែងតែ​ទទូច​ឱ្យ​រុស្ស៊ី ធ្វើ​បត្យាប័ន​លោក Snowden ត្រឡប់​ទៅ​សហរដ្ឋ​អាមេរិក​វិញ ដើម្បី​ប្រឈមមុខ​នឹង​ផ្លូវច្បាប់​ដែល​នឹង​ត្រូវ​ជាប់​ពន្ធនាគារ​រហូត​ដល់ ៣០​ឆ្នាំ។

គេ​សង្កេត​ឃើញ​ថា ការ​ផ្ដល់​សញ្ជាតិ​រុស្ស៊ី​ដល់​លោក Edward Snowden ដែល​ជា​អតីត​មន្ត្រី​ចារកម្ម​របស់​សហរដ្ឋ​អាមេរិក និង​បុគ្គល​ដើម​កំណើត​បរទេស​ចំនួន ៧១​នាក់​ទៀត​នោះ គឺ​ស្ថិត​នៅ​ក្នុង​ស្ថានការណ៍​ដែល​ប្រទេស​រុស្ស៊ី និង​សហរដ្ឋ​អាមេរិក​កំពុង​មាន​ភាព​តានតឹង​នឹង​គ្នា។

លោក Snowden អាយុ ៣៩​ឆ្នាំ។ លោក​បាន​រៀប​ការ​ជាមួយ​ភរិយា​របស់​លោក​ឈ្មោះ Lindsay Mills ក្នុង​ឆ្នាំ​២០១៧។ បច្ចុប្បន្ន លោក​មាន​កូន​ពីរ​នាក់៕

Comments

 ឫទ្ធិស័ក្តិ
លោក ឫទ្ធិ ស័ក្ដិ គឺ​ជា​អ្នក​សរសេរ​អត្ថបទ​ផ្នែក​បច្ចេកវិទ្យា និង​គន្លឹះ​ថ្មីៗ​ក្នុង​ការ​ប្រើប្រាស់​ប្រចាំ​ថ្ងៃ​នៅ​ក្នុង​បច្ចេកវិទ្យា។ ស័ក្ដិ ចូលរួម​ចែក​រំលែក​ដំណឹង​ល្អៗ​អំពី​បច្ចេកវិទ្យា​ចាប់​តាំង​ពី​វេបសាយ​មួយ​នេះ​ត្រូវ​បាន​បង្កើត​ឡើង។ គាត់​ចង់​ឱ្យ​ប្រជាជន​ខ្មែរ​កាន់​តែ​ច្រើន​យល់​ដឹង​អំពី​បច្ចេកវិទ្យា​ឱ្យ​ទូលំទូលាយ ពីព្រោះ​បច្ចេកវិទ្យា​អាច​ជួយ​ឱ្យ​ជីវភាព​រស់នៅ​របស់​យើង​កាន់​តែ​ទំនើប​ស្រប​ទៅ​នឹង​ការ​វិវឌ្ឍ​នៃ​សម័យ​កាល។