លេខ​ក្បាល +370 និង +381 Missed call កុំ​តេ​ត្រឡប់​ទៅ​វិញ

1821
លេខ​ទូរស័ព្ទ​ប្រភេទ​បោកប្រាស់ (Scam)
លេខ​ទូរស័ព្ទ​ប្រភេទ​បោកប្រាស់ (Scam)

នាយកដ្ឋាន​ប្រឆាំង​បទល្មើស​បច្ចេកវិទ្យា​នៃ​ក្រសួង​មហាផ្ទៃ ជូន​ដំណឹង​ដល់​ពលរដ្ឋ​ទាំងអស់​កុំ​ឱ្យ​ហៅ​ត្រឡប់​ទៅ​កាន់​លេខ​ទូរស័ព្ទ​ក្រៅ​ប្រទេស​ដែល​មាន​ក្បាល​លេខ +370 និង +381 ដែល​អ្នក​មិន​ស្គាល់​ឱ្យ​សោះ។

ចូលរួម Telegram របស់ Techkhmer.net ដើម្បី​ទទួល​បាន​គន្លឹះ និង​ដំណឹង​ថ្មីៗ!

Loading...

នាយកដ្ឋាន​ជំនាញ​ផ្នែក​បច្ចេកវិទ្យា​នេះ​ពន្យល់​នៅ​លើ​ទំព័រ​ហ្វេសប៊ុក​របស់​ខ្លួន​ថា ប្រសិន​បើ​អ្នក​យក​លេខ​ទូរស័ព្ទ​របស់​ខ្លួន​អ្នក​តេ​ត្រឡប់​ទៅ​កាន់​លេខ​ក្រៅ​ប្រទេស​ដែល​មាន​ក្បាល​លេខ​ដូច​ខាង​លើ នោះ​អ្នក​នឹង​ត្រូវ​ខាតបង់​ប្រាក់​ដ៏​ច្រើន​ពី​គណនី​ទូរស័ព្ទ​របស់​អ្នក​ភ្លាមៗ ដោយសារ​តម្លៃ​នៃ​សេវា​ហៅ​ចេញ​ទៅ​កាន់​លេខ​ទាំងនោះ​មាន​តម្លៃ​ថ្លៃ។

ការ​បញ្ជាក់​របស់​នាយកដ្ឋាន​នេះ គឺ​បន្ទាប់​ពី​រក​ឃើញ​ថា នៅ​ពេល​ថ្មីៗ​នេះ ពលរដ្ឋ​កម្ពុជា​ជាច្រើន​បាន​ទទួល​ការ​ហៅ​ចូល​ពី​លេខ​ក្រៅ​ប្រទេស​ដែល​មាន​ក្បាល​លេខ +370 និង +381 ហើយ​ការ​ហៅ​ចូល​នេះ​គឺ​គ្រាន់​តែ​តេ​ចូល​ភ្លាម​ដាក់​ចុះ​វិញ​ភ្លាម។ ការណ៍​នេះ ត្រូវ​បាន​នាយកដ្ឋាន​ប្រឆាំង​បទល្មើស​បច្ចេកវិទ្យា​ស្រាវជ្រាវ​ជា​បឋម ហើយ​ចាត់ទុក​ថា​ជា​ប្រភេទ​បោកប្រាស់ (Scam) ស្រដៀង​គ្នា​នឹង​ការ​បោកប្រាស់ Call Back ដែល​ទាមទារ​ឱ្យ​អ្នក​ទទួល​បាន​ការ​ហៅ​ចូល យក​លេខ​ទូរស័ព្ទ​ផ្ទាល់​ខ្លួន​តេ​ត្រឡប់​ទៅ​វិញ។

ករណី​របៀប​នេះ ក៏​ធ្លាប់​កើត​ឡើង​រួច​មក​ហើយ​ដែរ​នៅ​ក្នុង​ប្រទេស​កម្ពុជា។ កាល​ពី​ដើម​ឆ្នាំ​២០២០ អ្នក​ប្រើប្រាស់​បណ្ដាញ​សង្គម​ហ្វេសប៊ុក​ជាច្រើន​នាំ​គ្នា​បង្ហោះ និង​ចែក​រំលែក​តៗ​គ្នា​នូវ​លេខ​ទូរស័ព្ទ​ក្រៅ​ប្រទេស​ដែល​មាន​ក្បាល​លេខ +685 តេ​ចូល​មក​លេខ​ទូរស័ព្ទ​ដៃ​ភ្លាម​ហើយ​ក៏​ដាក់​ចុះ​វិញ​ភ្លាម​ដែរ។ ចំណែក​នៅ​ឆ្នាំ​២០១៧ ក៏​មាន​ករណី​ស្រដៀង​គ្នា​នេះ​ដែរ។

ទោះជាយ៉ាងណា នាយកដ្ឋាន​ប្រឆាំង​បទល្មើស​បច្ចេកវិទ្យា អំពាវនាវ​ដល់​ពលរដ្ឋ​ទាំងអស់​កុំ​តេ​ត្រឡប់​ទៅ​លេខ​ក្រៅ​ប្រទេស​ដែល​អ្នក​មិន​ស្គាល់​ឱ្យ​សោះ ជាពិសេស​ប្រសិនបើ​អ្នក​ទទួល​បាន​សារ​ឈ្នះ​រង្វាន់ សារ​លក់​ទំនិញ​ថោក​ក្រោម​តម្លៃ​ទីផ្សារ​ជាដើម សូម​អ្នក​កុំ​ឆ្លើយតប ឬ​ធ្វើ​តាម​ការ​ណែនាំ​នៅ​ក្នុង​សារ​នោះ​ឱ្យ​សោះ ពីព្រោះ​វា​គឺ​ជា​បោក​បញ្ឆោត​តែ​ប៉ុណ្ណោះ៕

Comments

លោក ឫទ្ធិ ស័ក្ដិ គឺ​ជា​អ្នក​សរសេរ​អត្ថបទ​ផ្នែក​បច្ចេកវិទ្យា និង​គន្លឹះ​ថ្មីៗ​ក្នុង​ការ​ប្រើប្រាស់​ប្រចាំ​ថ្ងៃ​នៅ​ក្នុង​បច្ចេកវិទ្យា។ ស័ក្ដិ ចូលរួម​ចែក​រំលែក​ដំណឹង​ល្អៗ​អំពី​បច្ចេកវិទ្យា​ចាប់​តាំង​ពី​វេបសាយ​មួយ​នេះ​ត្រូវ​បាន​បង្កើត​ឡើង។ គាត់​ចង់​ឱ្យ​ប្រជាជន​ខ្មែរ​កាន់​តែ​ច្រើន​យល់​ដឹង​អំពី​បច្ចេកវិទ្យា​ឱ្យ​ទូលំទូលាយ ពីព្រោះ​បច្ចេកវិទ្យា​អាច​ជួយ​ឱ្យ​ជីវភាព​រស់នៅ​របស់​យើង​កាន់​តែ​ទំនើប​ស្រប​ទៅ​នឹង​ការ​វិវឌ្ឍ​នៃ​សម័យ​កាល។