នារីៗវ័យក្មេងជាច្រើនដែលប្រើផលិតផល Apple ដូចជា iPhone និង iPad ជាដើម ហើយផ្ទុករូបភាព និងវីដេអូនៅលើសេវាកម្ម iCloud ត្រូវបានបុរសម្នាក់លួចចូលទាញយកបានប្រមាណ ៦២ម៉ឺនរូបភាព ក្នុងគោលបំណងស្វែងរករូបភាពអាសអាភាស។
នាយកដ្ឋានប្រឆាំងបទល្មើសបច្ចេកវិទ្យាចុះផ្សាយលើបណ្ដាញទំនាក់ទំនងសង្គមហ្វេសប៊ុក (facebook) នៅថ្ងៃទី២៥ សីហា ឱ្យដឹងថា បុរសម្នាក់ដែលរស់នៅក្រុង Los Angeles រដ្ឋ California សហរដ្ឋអាមេរិក បានលួចចូលទៅក្នុងគណនី iCloud របស់នារីៗវ័យក្មេងជាច្រើនក្នុងគោលបំណងស្វែងរករូបភាព និងវីដេអូអាសអាភាសរបស់នារីៗទាំងនោះ។ បុរសរូបនេះបានទាញយករូបថតប្រមាណ ៦២ម៉ឺនសន្លឹកពីគណនី iCloud ទាំងនោះ។
ចំពោះវិធីសាស្ត្រលួចចូលគណនី iCloud នេះ បុរសរូបនេះបានសារភាពថា គាត់បានបន្លំធ្វើជាបុគ្គលិករបស់ក្រុមហ៊ុន Apple ហើយលួងលោមជនរងគ្រោះ (social engineering) ឱ្យផ្ដល់លេខសម្ងាត់គណនី iCloud តាមរយៈអ៊ីមែល “applebackupicloud” និង “backupagenticloud”។ ទោះជាយ៉ាងណា អាជ្ញាធរបានរកឃើញអ៊ីមែលប្រមាណ ៥០ម៉ឺនអ៊ីមែលដែលក្នុងនោះអ៊ីមែលចំនួន ៤៧០០អ៊ីមែលមានផ្ទុកលេខសម្ងាត់សម្រាប់គណនី iCloud។
ជុំវិញការលួចចូលគណនី iCloud របស់នារីៗវ័យក្មេងនេះ នាយកដ្ឋានប្រឆាំងបទល្មើសបច្ចេកវិទ្យាក្រើនរំឭកដល់អ្នកប្រើប្រាស់គណនីអនឡាញទាំងអស់ឱ្យមានការប្រុងប្រយ័ត្ននៅពេលដែលទទួលបានសារ ឬអ៊ីមែលណាមួយដែលទាមទារឱ្យផ្ដល់លេខសម្ងាត់។ ប្រសិនបើអ្នកទទួលបានសារដូចនេះ អ្នកគួរតែទំនាក់ទំនងទៅក្រុមហ៊ុនដោយផ្ទាល់ ដើម្បីទទួលបានព័ត៌មានលម្អិត ជៀសវាងធ្វើតាមការណែនាំដែលមាននៅក្នុងសាររបស់ក្រុមជនខិលខូច។
បច្ចុប្បន្ន ប្រព័ន្ធអនឡាញរបស់ក្រុមហ៊ុនល្បីៗស្ទើរតែទាំងអស់ហើយបានដាក់បញ្ចូលនូវការផ្ទៀងផ្ទាត់ពីរកត្តា ឬគេហៅថា two-factor authentication (2FA) ឬ Two-step verification ដើម្បីការពារគណនីអនឡាញរបស់អ្នកប្រើប្រាស់ពីការជ្រៀតចូលពីជនខិលខូច មានដូចជាការជ្រៀតដោយប្រើបច្ចេកទេស Phishing ដើម្បីលួចយកគណនីជាដើម។ ដូច្នេះ អ្នកគួរតែបើកមុខងារ 2FA នេះដើម្បីសុវត្ថិភាពគណនីរបស់អ្នក៕
