ទិន្នន័យ​ជាង ១​ពាន់​លាន​នាក់​របស់​គេហទំព័រ​លក់​ទំនិញ​ចិន Taobao ត្រូវ​បាន​ទាញ​យក

1612
ក្រុមហ៊ុន Taobao
ក្រុមហ៊ុន Taobao

អ្នក​អភិវឌ្ឍន៍​សូហ្វវែរ​ចិន​ម្នាក់​បាន​បង្កើត​កម្មវិធី​ប្រភេទ web crawling លួច​ទាញ​យក​ទិន្នន័យ​អ្នក​ប្រើប្រាស់​ពី​គេហទំព័រ​លក់​ទំនិញ​ដ៏​មាន​ប្រជាប្រិយ​របស់​ចិន Taobao ជាង ១១០០​លាន​នាក់​ក្នុង​រយៈពេល​តែ ៨​ខែ​ប៉ុណ្ណោះ។

ចូលរួម Telegram របស់ Techkhmer.net ដើម្បី​ទទួល​បាន​គន្លឹះ និង​ដំណឹង​ថ្មីៗ!

Loading...

សារព័ត៌មាន​អាមេរិក The Wall Street Journal ចុះផ្សាយ​នៅ​ថ្ងៃ​ទី​១៥ ខែ​មិថុនា (ម៉ោង​នៅ​អាមេរិក) ដោយ​ដកស្រង់​ពី​សាលក្រម​របស់​តុលាការ​ស្រុក​មួយ​ក្នុង​ខេត្ត​ហឺណាន (Henan) ភាគ​កណ្ដាល​ប្រទេស​ចិន បង្ហាញ​ថា អ្នក​អភិវឌ្ឍន៍​សូហ្វវែរ​នោះ​ចាប់ផ្ដើម​ប្រមូល​ទិន្នន័យ​អ្នក​ប្រើប្រាស់​គេហទំព័រ Taobao ដែល​ជា​ផ្នែក​មួយ​របស់​ក្រុមហ៊ុន Alibaba ចាប់ពី​ខែ​វិច្ឆិកា ឆ្នាំ​២០១៩ តាមរយៈ​កម្មវិធី​ដែល​គេ​បាន​បង្កើត​ជា​ប្រភេទ Web-crawling។ ទិន្នន័យ​ដែល​គេ​បាន​ទាញ​យក​នោះ​មាន​ដូចជា ឈ្មោះ​សម្គាល់​អ្នកប្រើប្រាស់ លេខ​ទូរស័ព្ទ មតិ​របស់​អតិថិជន និង​ព័ត៌មាន​ជាច្រើន​ទៀត​ទាក់ទង​នឹង​ការប្រើប្រាស់​គេហទំព័រ​លក់​ទំនិញ​អនឡាញ​មួយ​នេះ។

Web crawling ឬ Web crawler ជា​ប្រភេទ​កម្មវិធី​ដែល​ត្រូវ​បាន​បង្កើត​ឡើង​ក្នុង​គោលបំណង​រៀន​ពី​អ្វីៗ​ទាំងអស់​ដែល​មាន​នៅ​លើ​វែបសាយ​នៅ​លើ​អ៊ីនធឺណិត ដើម្បី​អាច​ទាញ​យក​ព័ត៌មាន​ទាំងនោះ​ដោយ​ស្វ័យប្រវត្តិ។


ទោះជាយ៉ាងណាក៏ដោយ ក្រុមហ៊ុន Taobao បាន​បញ្ជាក់​ថា ព័ត៌មាន​សំខាន់ៗ​ដូចជា​ពាក្យ​សម្ងាត់​របស់​អ្នក​ប្រើប្រាស់ មិន​ត្រូវ​បាន​ទាញ​យក​នោះ​ទេ ប៉ុន្តែ​ក្រុមហ៊ុន​មិន​បាន​បញ្ជាក់​លម្អិត​អំពី​ចំនួន​អ្នក​ប្រើប្រាស់​ដែល​បាន​រងគ្រោះ​នោះ​ទេ។ លើស​ពី​នេះ ក្រុមហ៊ុន​បន្ថែម​ថា មិន​មាន​ព័ត៌មាន​របស់​អ្នក​ប្រើប្រាស់​ត្រូវ​បាន​លក់​ទៅ​ឱ្យ​ភាគី​ទី​បី​នោះ​ទេ ហើយ​ក៏​មិន​មាន​ការ​ខាតបង់​ផ្នែក​សេដ្ឋកិច្ច​ដែរ។

Taobao ដែល​ជា​គេហទំព័រ​លក់​សម្ភារៈ​រាយ​អនឡាញ​ដ៏​ធំ និង​ពេញ​និយម​មួយ​របស់​ក្រុមហ៊ុន Alibaba និង​មាន​អ្នក​ចូល​ប្រើប្រាស់​ប្រមាណ ៩២៥​លាន​នាក់​ក្នុង​មួយ​ខែៗ។

អ្នក​អភិវឌ្ឍន៍​សូហ្វវែរ​ចិន​ម្នាក់​នោះ​ដែល​មាន​ត្រកូល «លូ» បាន​បញ្ជូន​លេខ​ទូរស័ព្ទ​ដែល​គាត់​ប្រមូល​បាន​ទៅ​ឱ្យ​ថៅកែ​របស់​គាត់។ ថៅកែ​ដែល​ដំណើរការ​ក្រុមហ៊ុន​ប្រូម៉ូសិន​សម្រាប់​អ្នក​លក់​នៅ​លើ​វែបសាយ Taobao បាន​ប្រើ​ព័ត៌មាន​ទាំងនោះ​ដើម្បី​កំណត់​គោលដៅ​អតិថិជន។ អ្នក​ទាំងពីរ​ត្រូវ​បាន​កាត់ទោស​ឱ្យ​ជាប់​ពន្ធនាគារ​ម្នាក់ៗ​ជាង ៣​ឆ្នាំ៕

Comments

លោក ឫទ្ធិ ស័ក្ដិ គឺ​ជា​អ្នក​សរសេរ​អត្ថបទ​ផ្នែក​បច្ចេកវិទ្យា និង​គន្លឹះ​ថ្មីៗ​ក្នុង​ការ​ប្រើប្រាស់​ប្រចាំ​ថ្ងៃ​នៅ​ក្នុង​បច្ចេកវិទ្យា។ ស័ក្ដិ ចូលរួម​ចែក​រំលែក​ដំណឹង​ល្អៗ​អំពី​បច្ចេកវិទ្យា​ចាប់​តាំង​ពី​វេបសាយ​មួយ​នេះ​ត្រូវ​បាន​បង្កើត​ឡើង។ គាត់​ចង់​ឱ្យ​ប្រជាជន​ខ្មែរ​កាន់​តែ​ច្រើន​យល់​ដឹង​អំពី​បច្ចេកវិទ្យា​ឱ្យ​ទូលំទូលាយ ពីព្រោះ​បច្ចេកវិទ្យា​អាច​ជួយ​ឱ្យ​ជីវភាព​រស់នៅ​របស់​យើង​កាន់​តែ​ទំនើប​ស្រប​ទៅ​នឹង​ការ​វិវឌ្ឍ​នៃ​សម័យ​កាល។