YouTube ទើបតែបញ្ចេញរបាយការណ៍រយៈពេលបីខែរបស់ខ្លួនដែលបង្ហាញពីរបៀបដែល YouTube ដោះស្រាយបញ្ហាវីដេអូដែលរំលោភទៅលើការប្រើប្រាស់នៅលើ platform របស់ខ្លួន។
របាយការណ៍ដែលមានចំណងជើងថា YouTube Community Guidelines Enforcement Report ដែលមានន័យជាភាសាខ្មែរថា របាយការណ៍អនុវត្តគោលការណ៍ណែនាំសហគមន៍ YouTube បានបង្ហាញថា ចាប់ពីខែតុលា ដល់ខែធ្នូ ឆ្នាំ២០១៧ YouTube បានលុបវីដេអូជាង ៨លានវីដេអូចេញពី YouTube។ ភាគច្រើននៃវីដេអូដែលបានលុបចេញនេះ គឺជាប្រភេទវីដេអូ spam ឬជាវីដេអូប្រភេទមនុស្សពេញវ័យ។
អ្វីដែលគួរឲ្យចាប់អារម្មណ៍នោះ វីដេអូចំនួន ៦,៧លានវីដេអូ ត្រូវបានកំណត់សម្រាប់ធ្វើការត្រួតពិនិត្យឡើងវិញដោយម៉ាស៊ីន ហើយ ៧៦% នៃវីដេអូទាំងនេះ ត្រូវបានលុបចេញមុនពេលដែលវីដេអូមិនទាន់ត្រូវបានគេមើល (view)។
អ្នកនាំពាក្យ YouTube បានសរសេរនៅក្នុង blog ថា «ជាឧទាហរណ៍ នៅដើមឆ្នាំ២០១៧ វីដេអូ ៨% នៃវីដេអូដែលបានកំណត់ និងលុបចេញ ដោយសារតែភាពជ្រុលនិយមនៃហិង្សា និងមានអ្នកមើលតិចជាង ១០»។ អ្នកនាំពាក្យសរសេរទៀតថា «យើង (YouTube) បានណែនាំ machine learning នៅខែមិថុនា ឆ្នាំ២០១៧។ បច្ចុប្បន្ន មានវីដេអូជាងពាក់កណ្ដាលដែលយើងបានលុបចេញដោយសារភាពជ្រុលនិយមហិង្សា គឺមានអ្នកមើលតិចជាង ១០»។
អ្នកនាំពាក្យ YouTube បន្ថែមទៀតថា «ប្រព័ន្ធរបស់យើង គឺពឹងផ្អែកលើមនុស្សជាអ្នកត្រួតពិនិត្យដើម្បីវាយតម្លៃថាតើវីដេអូណាជាប្រភេទវីដេអូដែលប្រាសចាកពីគោលការណ៍របស់យើង»។
នៅឆ្នាំ២០១៧ ក្រុមហ៊ុន Google ដែលជាម្ចាស់ YouTube បានប្ដេជ្ញាដាក់មនុស្សរហូតដល់ ១ម៉ឺននាក់ដើម្បីធ្វើការដោះស្រាយបញ្ហាវីដេអូដែលរំលោភបំពានគោលការណ៍របស់ខ្លួន។
សូមចែករំលែកដំណឹងនេះទៅកាន់មិត្តភ័ក្ដិរបស់លោកអ្នកឲ្យបានដឹងអំពីព័ត៌មាននេះផង។ សូមអរគុណ!
កំណត់ចំណាំ៖ ហាមយកអត្ថបទពីគេហទំព័រ www.www.techkhmer.net ទៅចុះផ្សាយដោយគ្មានការអនុញ្ញាត៕
