ទីបំផុត ក្រុមហ៊ុន Apple ព្រមឲ្យក្រុមហ៊ុន Telegram ធ្វើបច្ចុប្បន្នភាពកម្មវិធីផ្ញើសារ Telegram (Telegram update app) នៅលើហាង App Store វិញហើយ នៅបន្ទាប់ពីមួយថ្ងៃក្រោយ Telegram បានចោទ Apple ថាបានរារាំងមិនឲ្យធ្វើបច្ចុប្បន្នភាពកម្មវិធីសម្រាប់អ្នកប្រើប្រាស់ iPhone ជុំវិញពិភពលោករយៈពេល ១ខែកន្លះមកហើយ។
នាយកប្រតិបត្តិក្រុមហ៊ុន Telegram លោក Pavel Durov បានប្រកាសនៅលើគណនី Twitter និង Telegram Channel របស់លោកនៅថ្ងៃសុក្រ ទី២ ខែមិថុនា នេះ ដោយអរគុណក្រុមហ៊ុន Apple និងនាយកប្រតិបត្តិ Apple លោក Tim Cook ដែលអនុញ្ញាតឲ្យ Telegram ធ្វើបច្ចុប្បន្នភាពកម្មវិធីរបស់ខ្លួនទៅកាន់ជំនាន់ចុងក្រោយ (latest version)។
កាលពីថ្ងៃព្រហស្បតិ៍ លោក Pavel Durov បានសរសេរសារនៅលើគណនី Twitter របស់លោកថា Apple បានបិទ (block) មិនឲ្យ Telegram ធ្វើបច្ចុប្បន្នភាពកម្មវិធីទូទាំងពិភពលោក ខណៈដែលរុស្ស៊ី កាលពីចុងខែឧសភា ទើបតែទុកពេលឲ្យក្រុមហ៊ុន Apple រយៈពេល ១ខែក្នុងការលុបកម្មវិធី Telegram ចេញពី store ហើយថា Apple អាចប្រឈមមុខនឹងផលវិបាក ប្រសិនបើក្រុមហ៊ុននេះមិនព្រមធ្វើតាមសំណើរបស់ខ្លួន។
ប្រសិនបើកម្មវិធី Telegram មិនបាន update ទេ នោះមុខងារមួយចំនួនដូចជា stickers នឹងមិនដំណើរការល្អនៅលើជំនាន់ iOS 11.4 ដែលក្រុមហ៊ុន Apple ទើបតែដាក់ឲ្យប្រើប្រាស់ជាផ្លូវការនោះទេ។ ម្យ៉ាងទៀត ការមិនបានធ្វើបច្ចុប្បន្នភាពកម្មវិធី គឺមានន័យថា Telegram ក៏មិនមានលទ្ធភាពអនុវត្តពេញលេញនូវច្បាប់ GDPR (General Data Protection Regulation) ឲ្យបានមុនថ្ងៃទី២៥ ខែឧសភា ឆ្នាំ២០១៨ ដែរ។
ទោះបីជាយ៉ាងណាក៏ដោយ កាលពីម្សិលមិញ នាយកប្រតិបត្តិ Telegram លោក Durov បានសរសេរថា ក្រុមហ៊ុន Apple កំពុងតែរឹតត្បិតការធ្វើបច្ចុប្បន្នភាពសម្រាប់អ្នកប្រើប្រាស់កម្មវិធី Telegram ជុំវិញពិភពលោកចាប់តាំងពីពាក់កណ្ដាលខែមេសា ឆ្នាំ២០១៨ ខណៈប្រទេសរុស្ស៊ី មានត្រឹមតែ ៧% នៃអ្នកប្រើប្រាស់ Telegram ប៉ុណ្ណោះ។
អានអត្ថបទផ្សេងទៀត៖
- Telegram ថា Apple លែងឲ្យ update app នៅលើ app store
- រុស្ស៊ីទុកពេលមួយខែឲ្យ Apple ក្នុងការលុបកម្មវិធី Telegram ចេញពីហាង app store
- រុស្ស៊ី ស្នើឲ្យលុបកម្មវិធី Telegram ចេញពី Google និង Apple Store
និយតករទូរគមនាគមន៍រដ្ឋរបស់រុស្ស៊ី កាលពីថ្ងៃអង្គារ ទី១៧ ខែមេសា ឆ្នាំ២០១៨ បានបញ្ជូនសំណើទៅក្រុមហ៊ុនធំៗពីរ គឺក្រុមហ៊ុន Apple និងក្រុមហ៊ុន Google ឲ្យលុបកម្មវិធី Telegram ចេញពីហាងបន្ទាប់ពីតុលាការរុស្ស៊ី បានចេញសេចក្ដីសម្រេចឲ្យបិទសេវាកម្មរបស់ក្រុមហ៊ុន Telegram ចេញពីប្រទេសរបស់ខ្លួន ដោយសារតែក្រុមហ៊ុននេះមិនព្រមឲ្យអ្នកជំនាញផ្នែកសុវត្ថិភាពរុស្ស៊ី ចូលទៅឆែកមើលសារសម្ងាត់របស់អ្នកប្រើប្រាស់ Telegram។
បច្ចុប្បន្ន Telegram មានអ្នកប្រើប្រាស់ទូទាំងសកលលោកជាង ២០០លាននាក់ និងត្រូវបានចាត់ថ្នាក់ជាកម្មវិធីផ្ញើសារដ៏ពេញនិយមបំផុតទី៩ លើពិភពលោក។
Telegram គឺជាកម្មវិធីផ្ញើ និងទទួលសារតាមរយៈអ៊ីនធឺណិតដោយផ្ដោតសំខាន់លើល្បឿន និងសុវត្ថិភាពរបស់អ្នកប្រើប្រាស់កម្មវិធី។ កម្មវិធី Telegram ត្រូវបានដាក់ឲ្យដំណើរការនៅឆ្នាំ២០១៣ និងគាំទ្រផ្នែកហិរញ្ញវត្ថុដោយសហគ្រិនបងប្អូនជនជាតិរុស្ស៊ី គឺលោក Pavel Valerievich Durov និងលោក Nikolai Durov។ បច្ចុប្បន្ន ក្រុមអ្នកបង្កើតកម្មវិធី Telegram គឺមានទីតាំងនៅទីក្រុង Dubai បន្ទាប់ពីពួកគេត្រូវចាកចេញពីប្រទេសរុស្ស៊ី ដោយសារតែច្បាប់គ្រប់គ្រងព័ត៌មានវិទ្យា (IT regulations)។
សូមចែករំលែកដំណឹងនេះទៅកាន់មិត្តភ័ក្ដិរបស់លោកអ្នកឲ្យបានដឹងអំពីព័ត៌មាននេះផង។ សូមអរគុណ!
កំណត់ចំណាំ៖ ហាមយកអត្ថបទពីគេហទំព័រ www.www.techkhmer.net ទៅចុះផ្សាយដោយគ្មានការអនុញ្ញាត៕
។){kind=link}