ក្រុមហ៊ុន Apple ប្រកាសឲ្យអតិថិជនរបស់ខ្លួនឈប់ប្រើដុំសាកថ្មជើងបីជាបន្ទាន់ ដើម្បីសុវត្ថិភាពជៀសវាងការឆក់ និងឆ្លងចរន្តអគ្គិសនីនៅពេលប៉ះដុំសាកថ្មប្រភេទនេះកំពុងដោតសាកថ្មទៅនឹងអគ្គិសនី។
ក្រុមហ៊ុនដ៏ធំរបស់អាមេរិកមួយនេះ ចេញសេចក្ដីថ្លែងការណ៍នៅលើវេបសាយ (website) របស់ខ្លួននៅថ្ងៃទី២៥ ខែមេសា ឆ្នាំ២០១៩ ឱ្យដឹងថា ដុំសាកថ្មជើងបីដែលក្រុមហ៊ុនប្រកាសឲ្យអតិថិជនឈប់ប្រើជាបន្ទាន់នេះ គឺត្រូវបានលក់សម្រាប់ឲ្យអតិថិជននៅចក្រភពអង់គ្លេស ប្រទេសសិង្ហបុរី និងហុងកុង។ ក្រុមហ៊ុនបញ្ជាក់ថា ដុំសាកថ្មជើងបីនេះត្រូវបានដាក់ឲ្យប្រើប្រាស់ជាមួយកុំព្យូទ័រ Mac និងឧបករណ៍ iOS ជំនាន់ឆ្នាំ២០០៣ ដល់ឆ្នាំ២០១០។
ហេតុដូចនេះ លោកអ្នកដែលប្រើប្រាស់ដុំសាកថ្មជើងបីដែលមានលក្ខណៈដូចបានរៀបរាប់ខាងលើ ត្រូវបញ្ឈប់ការប្រើប្រាស់ជាបន្ទាន់ និងប្រញាប់យកទៅប្ដូរដុំសាកថ្មថ្មីដោយឥតគិតថ្លៃនៅតាមហាងបម្រើសេវាកម្មរបស់ក្រុមហ៊ុន Apple។ លេខ serial របស់កុំព្យូទ័រ Mac, iPad, iPhone ឬ iPod របស់អ្នក នឹងត្រូវផ្ទៀងផ្ទាត់ មុននឹងក្រុមហ៊ុនធ្វើការផ្លាស់ប្ដូរជូនលោកអ្នកនូវឧបករណ៍សាកថ្មថ្មី។
ក្នុងសេចក្ដីប្រកាសរបស់ក្រុមហ៊ុន Apple ដដែលបានរៀបរាប់អំពីរបៀបពិនិត្យមើលឧបករណ៍សាកថ្មជើងបីរបស់អ្នក តើវាស្ថិតនៅក្នុងឧបករណ៍ដែលក្រុមហ៊ុនជូនដំណឹងដែរឬអត់។ ដំបូង សូមលោកអ្នកប្រៀបធៀបឧបករណ៍សាកថ្មជើងបីរបស់អ្នកទៅនឹងរូបភាពខាងក្រោម។ ក្រុមហ៊ុនបញ្ជាក់ថា ដុំសាកថ្មជើងបីដែលមានបញ្ហា គឺមានពណ៌ស អត់មានអក្សរនៅក្នុងប្រលោះភ្ជាប់ទៅខ្សែ។ ចំណែកឯដុំសាកថ្មជើងបីថ្មី គឺមានពណ៌សលាយប្រផេះ និងមានអក្សរនៅលើប្រលោះដែលភ្ជាប់ទៅខ្សែ។ (សូមមើលរូបភាពខាងក្រោម)
ទោះយ៉ាងណា ក្រុមហ៊ុនប្រាប់ថា ឧបករណ៍សាកថ្មប្រភេទ USB មិនមានផលប៉ះពាល់នោះទេ។
កាលពីឆ្នាំ២០១៦ ក៏ធ្លាប់កើតមានករណីស្រដៀងគ្នានេះដែរ។ កាលណោះ ក្រុមហ៊ុន Apple ក៏បានប្រកាសឲ្យអតិថិជនរបស់ខ្លួននៅទ្វីបអឺរ៉ុប ប្រទេសអូស្ត្រាលី នូវែលសេឡង់ (New Zealand) កូរ៉េ អាហ្សង់ទីន និងប្រេស៊ីល ឈប់ប្រើប្រាស់ឧបករណ៍សាកថ្មជើងពីរ ដោយសារអាចឆក់ និងឆ្លងចរន្តអគ្គិសនី។ ឧបករណ៍សាកថ្មនោះគឺប្រើប្រាស់ជាមួយកុំព្យូទ័រ Mac និងឧបករណ៍ iOS ជំនាន់ឆ្នាំ២០០៣ ដល់ឆ្នាំ២០១៥៕
