រដ្ឋមន្ត្រីក្រសួងព័ត៌មាននៃប្រទេសវៀតណាម ស្នើបង្កើតបណ្ដាញសង្គម និងប្រព័ន្ធស្វែងរក (search engines) ជំនួសឱ្យបណ្ដាញសង្គមហ្វេសប៊ុក (Facebook) និងហ្គូហ្គល (Google)។ នេះបើតាមការចុះផ្សាយរបស់សារព័ត៌មាន VN Express។
នៅក្នុងកិច្ចប្រជុំស្ដីពីឧស្សាហកម្មបច្ចេកវិទ្យាព័ត៌មាន ក្នុងទីក្រុងហូជីមិញ នៅថ្ងៃទី១៥ ខែកក្កដា ឆ្នាំ២០១៩ រដ្ឋមន្ត្រីក្រសួងព័ត៌មាន និងគមនាគមន៍ប្រទេសវៀតណាម លោក Nguyen Manh Hung លើកឡើងថា៖ «ពេលវេលាមកដល់ហើយសម្រាប់យើងដើម្បីបង្កើតបណ្ដាញសង្គមថ្មីមួយ និងប្រព័ន្ធស្វែងរកថ្មីមួយដែលផ្ដោតច្រើនទៅលើអ្នកប្រើ និងធ្វើឱ្យវាមានគុណតម្លៃជាង។»
លោកបន្ថែមថា ពិភពលោកត្រូវការវិធីសាស្ត្រថ្មីមួយដើម្បីទំនាក់ទំនងសង្គម ដែលអ្នកប្រើទទួលបានផលប្រយោជន៍ពីបណ្ដាញសង្គមនេះ។ លោកថា ពួកគេត្រូវតែចូលរួមនៅក្នុងការបង្កើតច្បាប់សម្រាប់វេទិកានេះ ហើយការពារវា។
លោកនិយាយថា បណ្ដាញសង្គម គឺជាសង្គម ដូច្នេះហើយគួរគោរពតម្លៃសីលធម៌ជាមូលដ្ឋាន និងគោរពតាមច្បាប់។
រដ្ឋមន្ត្រីរូបនេះថ្លែងថា៖ «ហេតុអ្វីបានជាយើងមិនបង្កើតបណ្ដាញសង្គមថ្មីមួយជំនួសឱ្យហ្វេសប៊ុក ពីព្រោះទស្សនវិជ្ជារបស់ហ្វេសប៊ុកលែងស័ក្ដិសមសម្រាប់ពិភពលោកទៀតហើយ? យើងត្រូវការបណ្ដាញសង្គមមួយដែលតម្លៃបង្កើតឡើងដោយសហគមន៍ត្រូវបានចែករំលែក មិនមែនសម្រាប់មនុស្សម្នាក់នោះទេ។»
ក្រៅពីចង់បង្កើតបណ្ដាញសង្គមដើម្បីជំនួសហ្វេសប៊ុក រដ្ឋមន្ត្រីវៀតណាមរូបនេះក៏បានស្នើឱ្យបង្កើតប្រព័ន្ធស្វែងរកមួយដែលចម្លើយអាចទុកចិត្តបានដើម្បីជួយដល់អ្នកស្វែងរកដែលមិនមានជំនាញ តាមរយៈចម្លើយដ៏ច្រើនដែលត្រូវបានបង្កើតឡើងនៅពេលស្វែងរក។
លោកនិយាយបន្តថា វប្បធម៌សម្របខ្លួន រៀន បង្កើត និងអនុវត្តអ្វីថ្មីមួយបានយ៉ាងឆាប់រហ័សរបស់វៀតណាម គឺជាគុណសម្បត្តិមួយនៅក្នុងដំណើរការបដិវត្តន៍ឌីជីថល។
រដ្ឋាភិបាលវៀតណាម រំពឹងថា នៅឆ្នាំ២០២៥ អាជីវកម្ម ៥០% នៃអាជីវកម្មទាំងអស់នឹងដំណើរការដោយប្រព័ន្ធឌីជីថល ហើយសេដ្ឋកិច្ចឌីជីថលនឹងមាន ២០% នៃផលិតផលក្នុងស្រុកសរុប (GDP)។ ចំណែក ៨០% នៃទំនាក់ទំនងរបស់ខ្លួនជាមួយសាធារណៈ និងជាមួយអាជីវកម្ម ធ្វើឡើងដោយឌីជីថលនៅក្នុងឆ្នាំនោះដែរ។
សូមចែករំលែកដំណឹងនេះទៅកាន់មិត្តភ័ក្ដិរបស់អ្នកផង។ សូមអរគុណ..!
កំណត់ចំណាំ៖ ហាមយកអត្ថបទពីគេហទំព័រ www.www.techkhmer.netទៅចុះផ្សាយដោយគ្មានការអនុញ្ញាត៕
 ជំនួសឱ្យបណ្ដាញសង្គមហ្វេសប៊ុក (Facebook) និងហ្គូហ្គល (Google)។ នេះបើតាមការចុះផ្សាយរបស់សារព័ត៌មាន VN Express។){kind=link}