ក្រុមហ៊ុនហ្វេសប៊ុក (Facebook) ចាប់ផ្ដើមផ្ញើសារទៅកាន់អ្នកប្រើប្រាស់បណ្ដាញសង្គមរបស់ខ្លួនរាប់លាននាក់ ដែលរងគ្រោះក្នុងរឿងអាស្រូវបែកធ្លាយទិន្នន័យផ្ទាល់ខ្លួនទៅឲ្យក្រុមហ៊ុន Cambridge Analytica កាលពីពេលថ្មីៗនេះ។
ការផ្ញើសារជូនដំណឹងដល់ម្ចាស់គណនីដែលរងគ្រោះនេះ បន្ទាប់ពីអ្នកប្រើប្រាស់ហ្វេសប៊ុកប្រមាណ ៨៧លាននាក់ ត្រូវបានក្រុមហ៊ុន Cambridge Analytica ទាញយកទិន្នន័យផ្ទាល់ខ្លួនយកទៅប្រើប្រាស់ និងមិនបានជូនដំណឹងដល់ម្ចាស់គណនីទាំងអស់នោះទេ។
ផ្ទាំងសារដែល Facebook ផ្ញើនៅកន្លែងណា?
Facebook នឹងបង្ហាញផ្ទាំងសារមួយនៅលើ News Feed របស់អ្នកប្រើប្រាស់ដែលធ្លាប់រងគ្រោះដោយការលួចយកទិន្នន័យផ្ទាល់ខ្លួន ដើម្បីជូនដំណឹងដល់អ្នកប្រើប្រាស់ឲ្យលុបចោល apps ទាំងឡាយណាដែលពួកគេលែងត្រូវការ។ ផ្ទាំងជូនដំណឹងនេះ ត្រូវបានដាក់ឲ្យដំណើរការនៅថ្ងៃនេះ (ថ្ងៃទី៩ ខែមេសា ឆ្នាំ២០១៧ ពេលវេលានៅសហរដ្ឋអាមេរិក)។ នេះបើតាមអ្នកនាំពាក្យរបស់ក្រុមហ៊ុនហ្វេសប៊ុកបានប្រាប់សារព័ត៌មាន The Verge។
លើសពីនេះទៀត ប្រសិនបើទិន្នន័យផ្ទាល់ខ្លួនរបស់អ្នកត្រូវបានទាញយកដោយមិនត្រឹមត្រូវណាមួយ នោះហ្វេសប៊ុកនឹងចែករំលែកដល់អ្នកនូវតំណភ្ជាប់មួយ (link) ប្រាប់ពីរបៀបដែលទិន្នន័យរបស់អ្នកត្រូវរងគ្រោះ និងពន្យល់ពីហេតុផលដែលគេអាចលួចយកព័ត៌មានពីហ្វេសប៊ុកទៅចែករំលែកជាមួយនឹងក្រុមហ៊ុន Cambridge Analytica។
ដូច្នេះ ប្រសិនបើអ្នកមិនបានទទួលសារដែលបានរៀបរាប់ដូចខាងលើទេ នោះបញ្ជាក់ថា លោកអ្នកមិនត្រូវបានក្រុមហ៊ុន Cambridge Analytica ទាញយកទិន្នន័យផ្ទាល់ខ្លួនរបស់អ្នកទៅប្រើប្រាស់ដោយគ្មានការអនុញ្ញាតនោះទេ។
ទោះយ៉ាងណា នៅពេលនេះ ក្រុមហ៊ុនហ្វេសប៊ុកកំពុងតែធ្វើការផ្លាស់ប្ដូរទម្រង់ជាច្រើន ដើម្បីការពារកុំឲ្យកើតមានរឿងអាស្រូវរបៀបនេះម្ដងទៀតនៅពេលខាងមុខ។
សូមចែករំលែកដំណឹងនេះទៅកាន់មិត្តភ័ក្ដិរបស់លោកអ្នកឲ្យបានដឹងអំពីព័ត៌មាននេះផង។ សូមអរគុណ!
កំណត់ចំណាំ៖ ហាមយកអត្ថបទពីគេហទំព័រ www.www.techkhmer.net ទៅចុះផ្សាយដោយគ្មានការអនុញ្ញាត៕
