នៅក្នុងខែកុម្ភៈ នេះ ក្រុមហ៊ុន Mozilla ចេញផ្សាយនូវចំណុចខ្សោយធ្ងន់ធ្ងរមួយដែលទាមទារឱ្យអ្នកប្រើប្រាស់កម្មវិធីរុករក Firefox និង Firefox ESR ត្រូវធ្វើបច្ចុប្បន្នភាពកម្មវិធីរបស់ខ្លួនជាបន្ទាន់។
ចំណុចខ្សោយធ្ងន់ធ្ងរនេះ ត្រូវបានរកឃើញ និងរាយការណ៍ដោយក្រុមអ្នកស្រាវជ្រាវសន្តិសុខបច្ចេកវិទ្យាមកពី Trend Micro Zero Day Initiative ពីរនាក់ គឺលោក Abraruddin Khan និងលោក Omair កាលពីពេលថ្មីៗនេះ និងត្រូវបានផ្សព្វផ្សាយដោយក្រុមហ៊ុន Mozilla នៅថ្ងៃទី៥ ខែកុម្ភៈ ឆ្នាំ២០២១ បន្ទាប់ពីជួសជុលនូវចំណុចខ្សោយនេះរួច។
កម្មវិធីរុករក Firefox Browser ជាកម្មវិធីបើកចំហកូដ និងពេញនិយមសម្រាប់មនុស្សទូទៅដើម្បីប្រើប្រាស់ក្នុងការស្វែងរកព័ត៌មាននៅលើបណ្ដាញអ៊ីនធឺណិត។
កម្មវិធី Firefox ដែលមានកំណែ 85.0.1 និង Firefox ESR កំណែ 78.7.1 គឺរងផលប៉ះពាល់យ៉ាងធ្ងន់ធ្ងរពីចំណុចខ្សោយនេះ ដែលអាចផ្ដល់លទ្ធភាពដល់ក្រុមវាយប្រហារ ឬក្រុមហេគឃឺ (hackers) អាចវាយប្រហារ និងគ្រប់គ្រងម៉ាស៊ីនរងគ្រោះដោយជោគជ័យ។ ក្រុមហ៊ុននេះបញ្ជាក់ថា ចំណុចខ្សោយនេះប៉ះពាល់តែទៅលើអ្នកប្រើប្រាស់ប្រព័ន្ធប្រតិបត្តិការវីនដូរ (Windows Operating System) តែប៉ុណ្ណោះ។
ក្រុមការងារ Tech Khmer សូមណែនាំដល់អ្នកប្រើប្រាស់កម្មវិធីរុករក Firefox ទាំងអស់ ត្រូវតែធ្វើបច្ចុប្បន្នភាពកម្មវិធី (update browser) ជាបន្ទាន់ទៅកាន់កំណែជំនាន់ចុងក្រោយបង្អស់។
ដើម្បីអាប់ដេតកម្មវិធី Firefox Broswer៖
- ចុចលើសញ្ញា ឆ្នូតដេកបី នៅខាងស្ដាំដៃផ្នែកខាងលើ
- ចុចពាក្យ Help
- ជ្រើសយក About Firefox
- រង់ចាំរហូតកម្មវិធីអាប់ដេតរួច ជាការស្រេច។
ទីភ្នាក់ងារ U.S Cybersecurity & Infrastructure Security Agency (CISA) ក៏បានព្រមានអំពីចំណុចខ្សោយនៃកម្មវិធីនេះដែរ ដោយបាននិយាយថា ក្រុមវាយប្រហារអាចប្រើប្រាស់ចំណុចខ្សោយមួយនេះដើម្បីមានលទ្ធភាពគ្រប់គ្រងទៅលើម៉ាស៊ីនដែលប្រើប្រាស់កម្មវិធី Firefox ជំនាន់មុនៗ ហើយក៏លើកទឹកចិត្តឱ្យអ្នកប្រើប្រាស់ធ្វើបច្ចុប្បន្នភាពតាមដែលអាចធ្វើឱ្យបានផងដែរ៕
