នេះជាចំណុចដែលអ្នកមិនត្រូវធ្វើនៅលើអ៊ីនធឺណិតចំនួន ១៨ចំណុច ដែល Tech Khmer ដកស្រង់ចេញពីគោលការណ៍ទី៣ នៃសៀវភៅ «ណែនាំស្ដីពីក្រមសីលធម៌សម្រាប់អ្នកប្រើប្រាស់អ៊ីនធឺណិត»។
នៅក្នុងគោលការណ៍ទី៣ ស្ដីពី «ការប្រើប្រាស់ខ្លឹមសារត្រឹមត្រូវ» មានពីរផ្នែកធំៗ គឺចំណុចត្រូវធ្វើ និងចំណុចមិនត្រូវធ្វើ។ ចំណុចត្រូវធ្វើ Tech Khmer បានផ្សាយរួចមកហើយកាលពីពេលថ្មីៗនេះ។ ប្រសិនបើអ្នកចង់អានចំណុចត្រូវធ្វើ សូមចុចត្រង់នេះ។ ខ្លឹមសារណែនាំទាំងនេះ អាចជួយឱ្យអ្នកជៀសផុតពីពីបញ្ហាប្រឈមនឹងផលវិបាកផ្នែកសីលធម៌ និងផ្លូវច្បាប់ នៅពេលចែករំលែកនៅលើបណ្ដាញសង្គម។
សូមបញ្ជាក់ថា សៀវភៅណែនាំស្ដីពីក្រមសីលធម៌សម្រាប់អ្នកប្រើប្រាស់អ៊ីនធឺណិត គឺត្រូវបានចងក្រងឡើងដោយសមាគមបណ្ដាញយុវជនកម្ពុជា (CYN)។ ចំពោះគោលការណ៍ទី១ និងគោលការណ៍ទី២ គឺក្រុមការងារបានចេញផ្សាយរួចហើយ។
ដូច្នេះ Tech Khmer សូមដកស្រង់ចំណុចមិនត្រូវធ្វើ នៃគោលការណ៍ “ការប្រើប្រាស់ខ្លឹមសារត្រឹមត្រូវ” មកបង្ហាញដូចខាងក្រោម។
ចំណុចមិនត្រូវធ្វើក្នុងការប្រើប្រាស់ខ្លឹមសារត្រឹមត្រូវនៅលើអ៊ីនធឺណិត៖
- មិនត្រូវប្រើប្រាស់ពាក្យពេចន៍អសុរោះ ដូចជាការជេរប្រមាថជាដើម ពីព្រោះការប្រើប្រាស់ភាសាបែបនេះមិនត្រឹមតែប៉ះពាល់ដល់សេចក្ដីថ្លៃថ្នូររបស់អ្នកប៉ុណ្ណោះទេ ប៉ុន្តែវាក៏ប៉ះពាល់ដល់តម្លៃរបស់សង្គមជាតិផងដែរ។ អ្នកដែលប្រើប្រាស់ពាក្យពេចន៍អសុរោះនៅតាមអ៊ីនធឺណិត អាចប្រឈមមុខនឹងវិបាកផ្នែកសីលធម៌ ហើយពួកគេក៏អាចប្រឈមមុខនឹងបណ្ដឹងបរិហារកេរ្តិ៍តាមផ្លូវច្បាប់ផងដែរ។
- មិនត្រូវប្រើពាក្យញុះញង់ ឬអុជអាលដែលនាំឱ្យប៉ះពាល់ដល់ប្រពៃណីទំនៀមទម្លាប់ សណ្ដាប់ធ្នាប់ សុខុមាលភាព សុវត្ថិភាព និងសន្តិសុខជាតិ ព្រោះអ្នកអាចប្រឈមមុខនឹងបណ្ដឹងព្រហ្មទណ្ឌតាមផ្លូវច្បាប់។
- មិនត្រូវប្រើប្រាស់អ៊ីនធឺណិតជាវេទិកាដើម្បីផ្សព្វផ្សាយព័ត៌មានណាដែលនាំឱ្យប៉ះពាល់កេរ្តិ៍ឈ្មោះ ឬបរិហារកេរ្តិ៍អ្នកដទៃ ពីព្រោះមនុស្សម្នាក់ៗតែងតែស្រឡាញ់កេរ្តិ៍ឈ្មោះរបស់ខ្លួន។
- មិនត្រូវប្រើប្រាស់អ៊ីនធឺណិតដើម្បីលាបពណ៌ ឬចោទប្រកាន់នរណាម្នាក់ដោយគ្មានហេតុផល ឬគ្មានភ័ស្ដុតាងត្រឹមត្រូវ និងគ្រប់គ្រាន់ឡើយ។
- មិនត្រូវផ្សព្វផ្សាយរូបភាព វីដេអូ និងសារជាសំឡេងកាត់តមិនពិត ពីព្រោះវាប៉ះពាល់ដល់កេរ្តិ៍ឈ្មោះរបស់អ្នកដទៃ ហើយអ្នកក៏អាចប្រឈមមុខចំពោះបណ្ដឹងតាមផ្លូវច្បាប់ផងដែរ។
- មិនត្រូវយករូបភាព វីដេអូ សារអក្សរ និងសារជាសំឡេងដែលមានលក្ខណៈឯកជន មកផ្សព្វផ្សាយជាសាធារណៈដោយមិនមានការយល់ព្រមពីសាមីជន ពីព្រោះវាប៉ះពាល់ដល់ជីវភាពឯកជន (Privacy) របស់គេ។
- មិនត្រូវផ្ញើ ផ្សព្វផ្សាយ ឬចែករំលែកសារ រូបភាព ឬវីដេអូដែលមានលក្ខណៈគំរាម ការជំរិត សម្លុតធ្វើបាបអ្នកដទៃ ពីព្រោះវាជាទង្វើអសីលធម៌ ហើយវាក៏អាចឈានដល់ទង្វើល្មើសច្បាប់ដែលអ្នកប្រព្រឹត្តិអាចប្រឈមមុខនឹងការប្ដឹងផ្ដល់តាមតុលាការ។
- មិនត្រូវផ្សព្វផ្សាយ ឬចែករំលែករូបភាព ឬវីដេអូនៃជនរងគ្រោះដែលមានសភាពគួរឱ្យរន្ធត់ និងតក់ស្លុត ដូចជានៅក្នុងព្រឹត្តិការណ៍ឃាតកម្ម ឬគ្រោះថ្នាក់ចរាចរណ៍ណាមួយដោយមិនបានបិទបាំងកេរខ្មាស ឬអត្តសញ្ញាណ ពីព្រោះវានាំឱ្យប៉ះពាល់ដល់សេចក្ដីថ្លៃថ្នូររបស់សាមីជន និងសុខភាពផ្លូវចិត្តរបស់អ្នកទស្សនា។
- មិនត្រូវផ្សព្វផ្សាយព័ត៌មានណាមួយដែលអាចធ្វើឱ្យសាធារណជនភាន់ច្រឡំ មានកំហឹង ឬភ័យខ្លាច។
- មិនត្រូវផ្សព្វផ្សាយរូបភាព និងវីដេអូអាសអាភាស ព្រោះវាធ្វើឱ្យប៉ះពាល់ដល់សេចក្ដីថ្លៃថ្នូរ និងវប្បធម៌របស់ជាតិ។
- មិនត្រូវចែករំលែកព័ត៌មានដែលគ្មានប្រភពច្បាស់លាស់ ខ្វះសីលធម៌ ខ្វះការពិត ដែលនាំឱ្យមានការស្អប់ខ្ពើមជាតិសាសន៍ អ្នកកាន់សាសនាណាមួយ និងបុគ្គលមានឋានៈណាមួយនៅក្នុងសង្គមជាដើម។
- មិនត្រូវប្រកាន់ឥរិយាបថជ្រុលនិយមក្នុងការជជែក ឬពិភាក្សាតាមបណ្ដាញសង្គម ពីព្រោះទស្សនៈជ្រុលនិយមអាចបង្កឱ្យមានជម្លោះ។
- មិនត្រូវផ្សព្វផ្សាយព័ត៌មានដែលជំរុញឱ្យប្រើប្រាស់គ្រឿងញៀន គ្រឿងស្រវឹង លេងល្បែងស៊ីសង និងប្រព្រឹត្តអំពើហិង្សាជាដើម។
- មិនត្រូវបង្ហាញអារម្មណ៍ ឬជីវិតផ្ទាល់ខ្លួនច្រើនពេកនៅលើអ៊ីនធឺណិត ពីព្រោះគេអាចយកព័ត៌មានផ្ទាល់ខ្លួនរបស់អ្នកទៅប្រើប្រាស់ដើម្បីធ្វើបាបអ្នកបាន។
- មិនត្រូវផ្សព្វផ្សាយអ្វីដែលបន្ទាប ឬបង្ខូចតម្លៃវប្បធម៌ ឬសេចក្ដីថ្លៃថ្នូររបស់ជាតិអ្នក និងជាតិដទៃ។
- មិនត្រូវផ្សព្វផ្សាយអ្វីដែលប៉ះពាល់ដល់សន្តិសុខរបស់ជាតិ ដូចជាព័ត៌មានសម្ងាត់ទាក់ទងនឹងកងទ័ពការពារទឹកដី ព័ត៌មានស៊ើបអង្កេតរបស់សមត្ថកិច្ចក្នុងការទប់ស្កាត់ចរាចរណ៍គ្រឿងញៀនជាដើម។
- មិនត្រូវផ្ញើ ឬផ្សព្វផ្សាយបន្តព័ត៌មាន សេចក្ដីប្រកាស រូបភាព ឬវីដេអូណាមួយដោយសារតែពាក្យគំរាមថា អ្នកនឹងជួបរឿងអពមង្គល ប្រសិនបើមិនផ្សព្វផ្សាយវាបន្ត ឬសារជំរុញថា អ្នកនឹងជួបរឿងមង្គល ប្រសិនបើអ្នកផ្ញើវាទៅកាន់មិត្តភ័ក្ដិ ឬផ្សព្វផ្សាយបន្តទៀត។
- មិនត្រូវជឿទាំងស្រុងនូវអ្វីៗដែលអ្នកបានឃើញ ឬបានឮនៅលើអ៊ីនធឺណិត ព្រោះអ្វីៗនៅលើអ៊ីនធឺណិតមិនប្រាកដថាពិត និងត្រឹមត្រូវទាំងអស់ឡើយ។
នៅពេលបន្ទាប់ទៀត Tech Khmer នឹងដកស្រង់គោលការណ៍ទី៤ នៃសៀវភៅ «ណែនាំស្ដីពីក្រមសីលធម៌សម្រាប់អ្នកប្រើប្រាស់អ៊ីនធឺណិត» មកបង្ហាញទៀត។
ប្រសិនបើអ្នកចង់យល់ដឹងបន្ថែម សូមចុចត្រង់នេះ ដើម្បីទាញយកសៀវភៅនេះទាំងមូលជាទម្រង់ PDF។
សូមចែករំលែកដំណឹងនេះទៅកាន់មិត្តភ័ក្ដិរបស់អ្នកផង។ សូមអរគុណ…!
កំណត់ចំណាំ៖ ហាមយកអត្ថបទពីគេហទំព័រ www.www.techkhmer.netទៅចុះផ្សាយដោយគ្មានការអនុញ្ញាត៕
