ប្រាកដណាស់ ទូរស័ព្ទឆ្លាតវៃ (smartphone) គឺបានផ្ទុកព័ត៌មានផ្ទាល់ខ្លួនរបស់ម្ចាស់វាជាច្រើននៅក្នុងនោះ។ ដូច្នេះហើយ មុននឹងអ្នកសម្រេចចិត្តផ្លាស់ប្ដូរទូរស័ព្ទថ្មី ឬប្រគល់ទូរស័ព្ទចាស់របស់អ្នកឲ្យទៅអ្នកដទៃនោះ សូមគិតសាឡើងវិញពីរបីដង ថាតើមានព័ត៌មានអ្វីខ្លះបន្សល់ទុកនៅក្នុងទូរស័ព្ទនោះ។
រូបថតសំខាន់ៗ សារអ៊ីមែលឆ្លើយឆ្លងការងារ ឬឯកជន និងសារជាអក្សរ ជាដើម នឹងត្រូវបាត់បង់ ឬធ្លាក់ទៅដល់ដៃជនណាម្នាក់ផ្សេងទៀត ប្រសិនបើអ្នកមិនបានត្រៀមរៀបចំវាឲ្យបានត្រឹមត្រូវ មុននឹងប្រគល់ទូរស័ព្ទ ឬលក់ទូរស័ព្ទនោះឲ្យទៅអ្នកដទៃ។ វាជាការបាត់បង់នូវអនុស្សាវរីយ៍ដ៏មានតម្លៃ និងអាចធ្វើឲ្យអ្នកជួបនូវហានិភ័យលើសុវត្ថិភាព និងឯកជនភាពធ្ងន់ធ្ងរផងដែរ។
ឧទាហរណ៍ថា អ្នកបានលក់ទូរស័ព្ទទៅឲ្យមនុស្សម្នាក់ ហើយអ្នកមិនបានលុបឯកសារសំខាន់ៗចេញពីទូរស័ព្ទទេ អ្នកនឹងមានសំណាងល្អ ប្រសិនបើអ្នកដែលទទួលបានទូរស័ព្ទរបស់អ្នកដែលមានផ្ទុកព័ត៌មានសំខាន់ៗនោះ ជាមនុស្សមានក្រមសីលធម៌ ព្រោះគេនឹងជួយលុបទិន្នន័យទាំងអស់ចេញពីទូរស័ព្ទឲ្យអ្នក។ ផ្ទុយទៅវិញ ជនខិលខូចមួយចំនួននឹងយកទិន្នន័យនេះមកធ្វើបាបអ្នកវិញជាក់ជាមិនខាន។
អានអត្ថបទផ្សេងទៀត៖
- របៀប Factory Reset ទូរស័ព្ទ Alcatel ពេលជាប់លេខកូដ
- គន្លឹះ ៦ចំណុច ការពារទូរស័ព្ទរបស់អ្នកឲ្យកាន់តែមានសុវត្ថិភាព
- តើត្រូវធ្វើដូចម្ដេច នៅពេល iPhone iPad ឬ iPod Touch បាត់ ឬត្រូវចោរលួចយក?
ដើម្បីជៀសវាងបញ្ហាដែលអាចកើតមានឡើង Tech Khmer សូមលើកផ្ដល់អនុសាសន៍ខ្លះៗជូនលោកអ្នក មុននឹងអ្នកលក់ទូរស័ព្ទដែលអាចធ្វើឲ្យអ្នកទទួលបាននូវសន្តិភាពផ្លូវចិត្ត ដូចខាងក្រោម៖
ជំហានទី១៖ រក្សាទុកលេខទំនាក់ទំនងនៅកន្លែងមានសុវត្ថិភាព (Backup Contacts)
ជាក់ស្ដែង លេខទូរស័ព្ទទំនាក់ទំនង (Contacts) ប្រតិទិនកត់ត្រាផ្ទាល់ខ្លួន (Calendar) និងព្រឹត្តិការណ៍ផ្សេងៗ (Events) ដែលអ្នកកត់ត្រាទុក គឺមានសារសំខាន់ណាស់សម្រាប់បម្រើកិច្ចការប្រចាំថ្ងៃរបស់លោកអ្នក។ ប្រសិនបើជាបាត់បង់ព័ត៌មានទាំងនេះ អ្នកប្រាកដជាពិបាកក្នុងការធ្វើការងារបន្ត ឬត្រូវពិបាកប្រមូលវាម្ដងមួយៗមកវិញ។ ដូច្នេះ សូមឲ្យប្រាកដថាព័ត៌មានទាំងអស់នេះនឹងមិនបាត់បង់ទេ បន្ទាប់ពីអ្នកលក់ទូរស័ព្ទទៅឲ្យអ្នកដទៃ។
សំណាងល្អដែល Apple iOS និង Google Android បានផ្ដល់នូវកន្លែងផ្ទុកព័ត៌មាននេះនៅលើ Cloud របស់ពួកគេ។ អ្នកត្រូវប្រាកដថា ព័ត៌មានចុងក្រោយត្រូវបានផ្ទុកនៅក្នុង Cloud ជាមួយនឹង Apple ID សម្រាប់អ្នកប្រើ iPhone iPadនិង Google Account សម្រាប់អ្នកប្រើ Android phone។
ជំហានទី២៖ រក្សាទុក Apps និងទិន្នន័យ (Backup your apps and data)
លោកអ្នកត្រូវ backup កម្មវិធីទូរស័ព្ទ (apps) និងទិន្នន័យរបស់វាឲ្យមានសុវត្ថិភាព។ ប្រសិនជាអ្នកប្រើប្រាស់ទូរស័ព្ទប្រើ Android OS 6.0 ឡើងលើ នោះអ្នកអាច backup ព័ត៌មានរបស់ app នីមួយៗទៅកាន់គណនី Google Drive មិនមែនត្រឹមតែ backup app នោះទេ។ ចំណែកជំនាន់ Android ទាបជាង 6.0 អ្នកត្រូវប្រើប្រាស់កម្មវិធី Helium ដើម្បីអាច Backup ទាំង apps និងទិន្នន័យរបស់ app បាន។
សម្រាប់អ្នកប្រើ iOS វិញ លោកអ្នកអាច Backup app និងទិន្នន័យរបស់ apps នៅលើ iTunes របស់លោកអ្នកបាន។
ជំហានទី៣៖ រក្សាទុកចម្រៀង រូបថត និងវីដេអូ
សេវាកម្ម Apple ID and Google Photos and Music ផ្ដល់ជម្រើសឲ្យលោកអ្នកអាចបញ្ជូនរូបថត វីដេអូ និងចម្រៀងពីទូរស័ព្ទរបស់អ្នកទៅកាន់ online servers បាន។ ប្រសិនបើលោកអ្នកមិនទុកចិត្តថារូបថត វីដេអូ និងចម្រៀងទាំងនោះត្រូវបានរក្សាទុកនៅលើអនឡាញទេ លោកអ្នកក៏អាច backup ទុកក្នុងកុំព្យូទ័របានថែមទៀតដែរ។
សម្រាប់ទូរស័ព្ទ Android លោកអ្នកគ្រាន់តែភ្ជាប់ទូរស័ព្ទទៅកាន់កុំព្យូទ័រតាមរយៈខ្សែ USB ហើយកូពី (copy) រូបថត វីដេអូ និងចម្រៀងទាំងនោះទៅកាន់កុំព្យូទ័ររបស់លោកអ្នកជាការស្រេច។ ករណីអ្នកប្រើប្រាស់កុំព្យូទ័រ Mac ជាមួយទូរស័ព្ទ Android នោះអ្នកត្រូវទាញយកកម្មវិធី Android File Transfer ដំឡើងនៅលើកុំព្យូទ័រ Mac ដើម្បីអាច copy រូបថត វីដេអូ និងចម្រៀងបាន។ ដោយឡែកអ្នកប្រើប្រាស់ iPhone ត្រូវប្រើប្រាស់កម្មវិធី iTunes desktop ដើម្បី backup។
ជំហានទី៤៖ លុបទិន្នន័យក្នុង Smartphone ដែលអ្នកនឹងលក់ ឬប្រគល់ឲ្យអ្នកដទៃ
បន្ទាប់ពីបាន Backup រាល់ឯកសារសំខាន់ៗ និងកម្មវិធីទូរស័ព្ទ (apps) រួចរាល់ហើយនោះ អ្នកអាចសម្អាតទូរស័ព្ទរបស់អ្នកបានហើយ។ គ្រប់ទូរស័ព្ទទាំងអស់ ទាំង iPhone ទាំង Android Phone សុទ្ធតែមានជម្រើសឲ្យលោកអ្នកអាចធ្វើឲ្យទូរស័ព្ទនោះដូចទើបនឹងចេញពីរោងចក្រអ៊ីចឹងដែរ ដែលវិធីនេះគេហៅថា Factory Reset។ មានន័យថា រាល់ឯកសារ ទិន្នន័យ និងកម្មវិធីទូរស័ព្ទទាំងអស់នៅក្នុងទូរស័ព្ទ នឹងត្រូវលុបចោលទាំងអស់ ហើយទូរស័ព្ទនឹងត្រឡប់ទៅរកសុភាពដើមដូចដែលអ្នកទើបនឹងទិញវាយកមកប្រើប្រាស់អ៊ីចឹង។
មកដល់ដំណាក់កាលនេះ លោកអ្នកអាចលក់ទូរស័ព្ទដែលធ្លាប់នៅជាមួយអ្នកយ៉ាងយូរ និងមានអនុស្សាវរីយ៍ជាមួយគ្នាយ៉ាងច្រើនបានហើយ ហើយអ្នកក៏មានសុវត្ថិភាពមិនបារម្ភខ្លាចបែកធ្លាយឯកសារសម្ងាត់ ឬឯកសារសំខាន់ៗទៀតឡើយ។
សូមចែករំលែកដំណឹងនេះទៅកាន់មិត្តភ័ក្ដិរបស់លោកអ្នកឲ្យបានដឹងអំពីព័ត៌មាននេះផង។ សូមអរគុណ!
កំណត់ចំណាំ៖ ហាមយកអត្ថបទពីគេហទំព័រ www.www.techkhmer.net ទៅចុះផ្សាយដោយគ្មានការអនុញ្ញាត៕
