ក្រុមអ្នកជំនាញអវកាស ព្យាករថា ស្ថានីយអវកាសរបស់ចិន ឈ្មោះ Tiangong-1 ឬហៅថា Heavenly Palace នឹងធ្លាក់មកលើភពផែនដីនៅក្នុងរយៈពេលប៉ុន្មានថ្ងៃខាងមុខនេះ។ នេះបើយោងតាមការព្យាករចុងក្រោយបង្អស់របស់ទីភ្នាក់ងារអវកាសអឺរ៉ុប (European Space Agency, ESA) ដែលកំពុងតាមដានការធ្លាក់ចុះរបស់យានអវកាសនេះ។
ការិយាល័យបំបែកកាកសំណល់អវកាសនៃទីភ្នាក់ងារអវកាសអឺរ៉ុប (ESA) ឲ្យដឹងថា យានអវកាសចិន Tiangong-1 នឹងធ្លាក់មកផែនដីនៅចន្លោះពីថ្ងៃទី៣០ ខែមីនា ដល់ថ្ងៃទី២ ខែមេសា ឆ្នាំ២០១៨ ប៉ុន្តែពួកគេបានព្រមានថា ការព្យាករនេះគឺមានការប្រែប្រួលខ្ពស់។
ចំណែកឯការិយាល័យវិស្វកម្មអវកាសចិន បានឲ្យដឹងថា ខ្លួនរំពឹងថាយានអវកាសនោះនឹងត្រឡប់មកបរិយាកាសផែនដីនៅចន្លោះថ្ងៃទី៣១ ខែមីនា ដល់ថ្ងៃទី៤ ខែមេសា ឆ្នាំ២០១៨ ហើយនឹងឆេះនៅពេលនោះ។
ចិន បានប្រាប់អង្គការសហប្រជាជាតិ (The United Nations) កាលពីខែឧសភា ឆ្នាំ២០១៧ ថា យានអវកាសរបស់ខ្លួនឈ្មោះ Tiangong-1 ដែលមានទម្ងន់ ៨,៥តោន ឈប់ដំណើរការនៅថ្ងៃទី១៦ ខែមីនា ឆ្នាំ២០១៦ ប៉ុន្តែមិនបានប្រាប់ពីហេតុផលជាក់លាក់នោះទេ។
អានអត្ថបទផ្សេងទៀត៖
អ្នកជំនាញអវកាសបានលើកឡើងថា គ្រោះថ្នាក់ដែលអាចកើតមានដល់មនុស្ស គឺតិចតួចណាស់។ នេះបើតាមការចុះផ្សាយរបស់សារព័ត៌មាន CNN នៅថ្ងៃទី២៦ ខែមីនា ឆ្នាំ២០១៨។
Tiangong-1 ឬ Heavenly Palace គឺជាមន្ទីរពិសោធន៍អវកាសដំបូងរបស់ចិន ដែលត្រូវបានបាញ់បង្ហោះចូលក្នុងគន្លងផែនដីនៅឆ្នាំ២០១១ ហើយយានអវកាស Tiangong-2 ក៏ត្រូវបានបាញ់បង្ហោះនៅឆ្នាំ២០១៦ បន្ទាប់ពីបាញ់បង្ហោះយានអវកាស Tiangong-1 បានជោគជ័យ។ នេះគឺជាផ្នែកមួយនៃកម្មវិធីអវកាសរបស់ចិន ឈានទៅដល់គោលដៅដើម្បីដាក់ស្ថានីយអវកាសជាអចិន្ត្រៃយ៍មួយដែលមានទម្ងន់ ២០តោននៅគន្លងផែនដីក្នុងឆ្នាំ២០២២។
សូមចែករំលែកដំណឹងនេះទៅកាន់មិត្តភ័ក្ដិរបស់លោកអ្នកឲ្យបានដឹងអំពីព័ត៌មាននេះផង។ សូមអរគុណ!
កំណត់ចំណាំ៖ ហាមយកអត្ថបទពីគេហទំព័រ www.www.techkhmer.net ទៅចុះផ្សាយដោយគ្មានការអនុញ្ញាត៕
 ដែលកំពុងតាមដានការធ្លាក់ចុះរបស់យានអវកាសនេះ។){kind=link}