ក្រុមកុមារីកម្ពុជា ដែលកំពុងស្ថិតនៅក្នុងកម្មវិធីបច្ចេកវិទ្យា World Pitch ថ្នាក់ពិភពលោកនៅសហរដ្ឋអាមេរិក ត្រូវការការបោះឆ្នោតគាំទ្រពីប្រិយមិត្តឥឡូវនេះ ដើម្បីដណ្ដើមយកពានរង្វាន់ប្រជាប្រិយភាព People’s Choice Award ដែលការបោះឆ្នោតនឹងផុតកំណត់នៅត្រឹមថ្ងៃទី១៥ ខែសីហា ឆ្នាំ២០១៩ ម៉ោង ៧ព្រឹក (ម៉ោងនៅកម្ពុជា)។
ពានរង្វាន់ប្រជាប្រិយភាព People’s Choice Award នេះមានក្រុមកុមារីមកពីប្រទេសផ្សេងៗជុំវិញពិភពលោកចំនួន ១២ក្រុម ត្រូវប្រកួតប្រជែងគ្នាដើម្បីដណ្ដើមពានរង្វាន់ថ្នាក់ពិភពលោកនេះតាមរយៈការបោះឆ្នោតនៅលើអនឡាញ។ នេះបើតាមវេបសាយរបស់ Technovation Challenge។
LiterTree ជាឈ្មោះក្រុមរបស់កុមារីកម្ពុជា ដែលមានសមាជិក ៥នាក់ និងបានផ្ដួចផ្ដើមបង្កើតកម្មវិធីទូរសព្ទឈ្មោះ “ណែងណង (Naeng-Norng)” ក្នុងគោលបំណងអភិរក្សកំណាព្យខ្មែរដោយអាចឱ្យអ្នកអាន និងអ្នកនិពន្ធភ្ជាប់ទំនាក់ទំនងគ្នាបាន។ ពួកគេបានជាប់ទៅប្រកួតបន្តនៅសហរដ្ឋអាមេរិក ក្នុងវគ្គផ្ដាច់ព្រ័ត្រជាមួយក្រុមកុមារីជុំវិញពិភពលោក បន្ទាប់ពីជាប់ក្នុងការប្រកួតនៅប្រទេសកម្ពុជា កាលពីពេលកន្លងទៅ។
ដើម្បីគាំទ្រក្រុមកុមារីកម្ពុជា ឱ្យដណ្ដើមបានពានរង្វាន់ប្រជាប្រិយភាពនេះ សូមប្រិយមិត្តចូលរួមបោះឆ្នោតគាំទ្រទាំងអស់គ្នាដោយអនុវត្តតាមជំហានខាងក្រោមនេះ៖
- ចុចលើតំណភ្ជាប់នេះ៖ https://technovationchallenge.org/world-pitch/peoples-choice-award/
- ចុចលើពាក្យ VOTE ឬអូសអេក្រង់ចុះទៅក្រោមរហូតដល់ពាក្យ Cast Your Vote! (មើលរូបភាពខាងក្រោម)
- បន្ទាប់មក សូមជ្រើសរើស (select) យកក្រុម LiterTree (Naeng-Norng)
- បំពេញឈ្មោះ និងបំពេញអ៊ីមែលរបស់អ្នក រួចចុចធីកលើពាក្យ GDPR Agreement
- ចុងក្រោយ ចុចលើប៊ូតុង Submit ជាការស្រេច (មើលរូបភាពខាងក្រោម)។
Technovation គឺជាកម្មវិធីអប់រំសហគ្រិនភាពក្នុងវិស័យបច្ចេកវិទ្យាសម្រាប់ការប្រកួតប្រជែងអន្តរជាតិ ដែលមានគោលបំណងបង្កើនចំនួនស្ត្រីក្នុងវិស័យបច្ចេកវិទ្យា និងសហគ្រិនភាពឱ្យកាន់តែច្រើនបន្ថែមទៀត។ កម្មវិធីនេះជំរុញឱ្យក្មេងស្រីអាយុចន្លោះពី ១០ ដល់ ១៨ឆ្នាំនៅទូទាំងពិភពលោក ស្វែងរកដំណោះស្រាយសម្រាប់សហគមន៍តាមរយៈបច្ចេកវិទ្យា និងការរៀបចំផែនការអាជីវកម្ម។
សូមចែករំលែកដំណឹងនេះបន្តទៅកាន់មិត្តភ័ក្ដិរបស់អ្នកផង។ សូមអរគុណ!
កំណត់ចំណាំ៖ ហាមយកអត្ថបទពីគេហទំព័រ www.www.techkhmer.netទៅចុះផ្សាយដោយគ្មានការអនុញ្ញាត៕
។){kind=link}