ក្រុមហ៊ុន Apple លុបកម្មវិធី (Apps) ជិត ៣ម៉ឺនកម្មវិធីចេញពីហាងរបស់ខ្លួន (App Store) នៅក្នុងប្រទេសចិន ដែលកម្មវិធីទាំងនោះត្រូវបានគេចាត់ទុកថាវាខុសច្បាប់របស់ប្រទេសចិន។
សេចក្ដីរាយការណ៍របស់សារព័ត៌មាន Bloomberg និងត្រូវបានដកស្រង់ដោយសារព័ត៌មាន The Verge នៅថ្ងៃទី២០ ខែសីហា ឆ្នាំ២០១៨ ឲ្យដឹងថា យ៉ាងហោចណាស់ក៏មាន ៤០០០កម្មវិធីដែរត្រូវបានគេដាក់ស្លាកថាជាល្បែងស៊ីសង (Gambling) ខណៈដែលទូរទស្សន៍រដ្ឋរបស់ចិន រាយការណ៍ថាមាន ២៥០០០កម្មវិធី។
ក្រុមហ៊ុន Apple បាននិយាយនៅក្នុងសេចក្ដីថ្លែងការណ៍មួយដែលផ្ញើទៅកាន់សារព័ត៌មាន Bloomberg និងសារព័ត៌មាន The Wall Street Journal ថា «កម្មវិធីល្បែងស៊ីសង គឺខុសច្បាប់ និងមិនត្រូវបានអនុញ្ញាតទេនៅលើ App Store នៅក្នុងប្រទេសចិន។» សេចក្ដីថ្លែងការណ៍ដដែលឲ្យដឹងបន្ថែមទៀតថា «យើង (ក្រុមហ៊ុន Apple) បានលុបចោលកម្មវិធី និងអ្នកអភិវឌ្ឍន៍កម្មវិធីជាច្រើនដែលព្យាយាមចែកចាយកម្មវិធីល្បែងស៊ីសងខុសច្បាប់នៅលើហាងរបស់យើង (App Store) ហើយយើងកំពុងប្រុងប្រយ័ត្នក្នុងការស្វែងរកកម្មវិធីខុសច្បាប់ទាំងនេះ និងបញ្ឈប់កម្មវិធីទាំងនេះចេញពី App Store។»
អានអត្ថបទផ្សេងទៀត៖
- YouTube លុបវីដេអូជាង ៨លានវីដេអូក្នុងរយៈពេល ៣ខែ
- ក្ដារចុចឆ្លាតវៃលែងគាំងទៀតហើយ បើធ្វើតាមរបៀបនេះ
- ត្រូវធ្វើអ្វីខ្លះ មុននឹងលក់ smartphone ឬប្រគលវាឲ្យទៅអ្នកដទៃ
ទោះយ៉ាងណាក៏ដោយ សារព័ត៌មានរដ្ឋរបស់ចិន CCTV បានផ្សាយកាលពីថ្ងៃអាទិត្យ ទី១៩ ខែសីហា ឆ្នាំ២០១៨ ថា «ក្រុមហ៊ុន Apple ខ្លួនឯងហ្នឹងបានបង្កើតច្បាប់ស្ដីពីការអនុញ្ញាតឲ្យកម្មវិធី (apps) នៅលើហាង (app store) របស់ខ្លួន ប៉ុន្តែក្រុមហ៊ុនមិនបានអនុវត្តតាមនោះទេ។ នេះជាលទ្ធផលនៃការរីកសាយនៃកម្មវិធីឆ្នោតក្លែងក្លាយ និងកម្មវិធីល្បែងស៊ីសង។» នេះបើតាមការចុះផ្សាយរបស់សារព័ត៌មាន The Wall Street Journal។
កន្លងទៅ ក្រុមហ៊ុន Apple តែងតែចាត់វិធានការឲ្យស្របតាមអាជ្ញាធរចិន ដែលក្រុមហ៊ុនធ្លាប់លុបកម្មវិធីសម្រាប់សេវាបណ្ដាញឯកជននិម្មិត (VPN) និងកម្មវិធីរបស់សារព័ត៌មាន The New York Times ទៀតផង។
សូមចែករំលែកដំណឹងនេះទៅកាន់មិត្តភ័ក្ដិរបស់លោកអ្នកបានដឹងផង។ សូមអរគុណ!
កំណត់ចំណាំ៖ ហាមយកអត្ថបទពីគេហទំព័រ www.www.techkhmer.net ទៅចុះផ្សាយដោយគ្មានការអនុញ្ញាត៕
 ខណៈទូរទស្សន៍រដ្ឋចិន រាយការណ៍ថាមាន ២៥០០០កម្មវិធី។){kind=link}