Cambodia ICT Awards ពន្យារ​ពេល​ទទួល​ពាក្យ​ដល់​ថ្ងៃ​ទី​៧​មិថុនា

កម្មវិធី​ពាន​រង្វាន់​បច្ចេកវិទ្យា​គមនាគមន៍ និង​ព័ត៌មាន​កម្ពុជា ឆ្នាំ​២០១៨ (Cambodia ICT Awards) ប្រកាស​ពន្យារពេល​កាលបរិច្ឆេទ​ឈប់​ទទួល​ពាក្យ​សុំ​ចូលរួម​ប្រកួតប្រជែង​ក្នុង​កម្មវិធី រហូត​ដល់​ថ្ងៃ​ទី​៧ ខែ​មិថុនា ឆ្នាំ​២០១៨។

2633
កម្មវិធី​ពាន​រង្វាន់​បច្ចេកវិទ្យា​គមនាគមន៍ និង​ព័ត៌មាន​កម្ពុជា ឆ្នាំ​២០១៨ (Cambodia ICT Awards)។
កម្មវិធី​ពាន​រង្វាន់​បច្ចេកវិទ្យា​គមនាគមន៍ និង​ព័ត៌មាន​កម្ពុជា ឆ្នាំ​២០១៨ (Cambodia ICT Awards)។

កម្មវិធី​ពាន​រង្វាន់​បច្ចេកវិទ្យា​គមនាគមន៍ និង​ព័ត៌មាន​កម្ពុជា ឆ្នាំ​២០១៨ (Cambodia ICT Awards) ប្រកាស​ពន្យារពេល​កាលបរិច្ឆេទ​ឈប់​ទទួល​ពាក្យ​សុំ​ចូលរួម​ប្រកួតប្រជែង​ក្នុង​កម្មវិធី រហូត​ដល់​ថ្ងៃ​ទី​៧ ខែ​មិថុនា ឆ្នាំ​២០១៨។

ចូលរួម Telegram របស់ Techkhmer.net ដើម្បី​ទទួល​បាន​គន្លឹះ និង​ដំណឹង​ថ្មីៗ!

Loading...

Cambodia ICT Awards ដែល​មាន​ទឹកប្រាក់​សរុប ២៧,០០០​ដុល្លារ​សហរដ្ឋ​អាមេរិក សម្រាប់​អ្នក​ទទួល​បាន​ជ័យលាភី គឺ​ជា​កម្មវិធី​ប្រកួត​ប្រជែង​ស្នាដៃ​បច្ចេកវិទ្យា​ថ្នាក់​ជាតិ ដើម្បី​បង្ហាញ​ពី​សមិទ្ធផល​ជោគជ័យ​ក្នុង​វិស័យ​បច្ចេកវិទ្យា​គមនាគមន៍ និង​ព័ត៌មានវិទ្យា។ កម្មវិធី​នេះ​រៀបចំ​ឡើង​ដោយ​វិទ្យាស្ថាន​ជាតិ​ប្រៃសណីយ៍ ទូរគមនាគមន៍ បច្ចេកវិទ្យា​គមនាគមន៍ និង​ព័ត៌មាន (NIPTICT) និង​គាំទ្រ​ដោយ​ក្រសួង​ប្រៃសណីយ៍ និង​ទូរគមនាគមន៍។

កម្មវិធី​ប្រកួត​ប្រជែង​ដណ្ដើម​ពាន​រង្វាន់ ICT កម្ពុជា នៅ​ឆ្នាំ​នេះ គឺ​ជា​ការ​ប្រកួត​ថ្នាក់​ជាតិ​លើក​ទី​៤ បន្ទាប់​ពី​កម្មវិធី​នេះ​ត្រូវ​បាន​បង្កើត​ឡើង​កាល​ពី​ឆ្នាំ​២០១៥។

បេក្ខជន​ដែល​អាច​ចូលរួម​ដាក់​ពាក្យ​ប្រកួត​ប្រជែង​ដណ្ដើម​យក​ពាន​រង្វាន់ ICT កម្ពុជា ឆ្នាំ​២០១៨ រួម​មាន សិស្ស​និស្សិត ក្រុមហ៊ុន​ឯកជន​ក្នុង​ស្រុក ក្រុមហ៊ុន​ចាប់ផ្ដើម​ធុរកិច្ច (Start-up) សង្គម​ស៊ីវិល អង្គការ​មិន​មែន​រដ្ឋាភិបាល និង​ស្ថាប័ន​រដ្ឋ​ពាក់ព័ន្ធ​ផ្សេងៗ​ដែល​មាន​ផលិតផល និង​សេវាកម្ម​ច្នៃប្រឌិត​ចេញ​ពី​វិស័យ​បច្ចេកវិទ្យា។

កម្មវិធី​ប្រកួតប្រជែង​នេះ​ចែក​ចេញ​ជា ៦​ប្រភេទ​រួម​មាន៖

  1. វិស័យ​សាធារណៈ (Public Sector)
  2. វិស័យ​ឯកជន (Private Sector)
  3. ការ​រួម​ចំណែក​ទទួល​ខុស​ត្រូវ​ក្នុង​សង្គម (Corporate Social Responsibility)
  4. មាតិកា​ឌីជីថល (Digital Content)
  5. ការ​ចាប់ផ្ដើម​បង្កើត​ធុរកិច្ច (Start-up)
  6. ការ​ស្រាវជ្រាវ និង​ការ​អភិវឌ្ឍ (R&D)

បើ​តាម​សេចក្ដី​ប្រកាស​របស់​ទំព័រ​ហ្វេសប៊ុក​នៃ Cambodia ICT Awards ឲ្យ​ដឹង​ថា បេក្ខជន​ដែល​ជាប់​ក្នុង​វគ្គ​ជម្រុះ​ជុំ​ទី​មួយ នឹង​ត្រូវ​ឡើង​ធ្វើ​បទ​បង្ហាញ​នៅ​វគ្គ​ពាក់​កណ្ដាល​ផ្ដាច់ព្រ័ត្រ​នៅ​ថ្ងៃ​ទី​១៤ ខែ​មិថុនា ឆ្នាំ​២០១៨។ ពួក​គេ​ត្រូវ​បង្ហាញ​អំពី​គម្រោង​របស់​ពួក​គេ​នៅ​មុខ​ចៅក្រម​ដែល​មាន​សមាសភាព​មក​ពី​ស្ថាប័ន​រដ្ឋ សង្គម​ស៊ីវិល ក្រុមហ៊ុន​ឯកជន និង​អ្នក​តំណាង​ឧស្សាហកម្ម​ក្នុង​វិស័យ​បច្ចេកវិទ្យា​គមនាគមន៍ និង​ព័ត៌មាន។ បេក្ខជន​តែ ១២​នាក់​ប៉ុណ្ណោះ នឹង​ត្រូវ​ជ្រើសរើស​ឲ្យ​ចូលរួម​ប្រកួត​បន្ត​នៅ​វគ្គ​ផ្ដាច់ព្រ័ត្រ​នៅ​ថ្ងៃ​ទី​២១ ខែ​មិថុនា ឆ្នាំ​២០១៨។

ការ​វាយ​តម្លៃ គឺ​ផ្អែក​ទៅ​លើ​ការ​ច្នៃប្រឌិត គុណភាព​ទុក​ចិត្ត​នៃ​ផលិតផល កម្រិត​នៃ​ការ​ប្រើប្រាស់​បច្ចេកវិទ្យា​នៅ​ក្នុង​គម្រោង និង​អត្ថប្រយោជន៍​ដល់​សង្គម។

ជ័យលាភី ៦​រូប នឹង​ត្រូវ​ជ្រើសរើស​សម្រាប់​វិស័យ​ទាំង ៦ និង​មាន​តែ​ជ័យលាភី ៣​រូប​ប៉ុណ្ណោះ នឹង​ត្រូវ​ជ្រើសរើស​សម្រាប់​ពាន​រង្វាន់​ធំ​ទាំង​បី​នៅ​ថ្ងៃ​ទី​២១ ខែ​មិថុនា ឆ្នាំ​២០១៨។

សេចក្ដី​ប្រកាស​របស់ Cambodia ICT Awards ពន្យារ​ពេល​ទទួល​ពាក្យ​សុំ​ចុះ​ឈ្មោះ​ចូលរួម​ប្រកួតប្រជែង។ Photo courtesy
សេចក្ដី​ប្រកាស​របស់ Cambodia ICT Awards ពន្យារ​ពេល​ទទួល​ពាក្យ​សុំ​ចុះ​ឈ្មោះ​ចូលរួម​ប្រកួតប្រជែង។ Photo courtesy

ពាន​រង្វាន់​ធំៗ​ទាំង​បី គឺ៖

  • ទឹកប្រាក់​ចំនួន ១​ម៉ឺន​ដុល្លារ​សម្រាប់​ជ័យលាភី​លេខ​មួយ
  • ទឹកប្រាក់​ចំនួន ៣​ពាន់​ដុល្លារ​សម្រាប់​ជ័យលាភី​លេខ​ពីរ
  • និង​ជ័យលាភី​លេខ​បី ទទួល​បាន​ទឹកប្រាក់ ២​ពាន់​ដុល្លារ។

ក្រៅ​ពី​ពាន​រង្វាន់​ធំៗ​ទាំង​បី​នេះ ក៏​នៅ​មាន​ពាន​រង្វាន់​សម្រាប់​ជ័យលាភី​ល្អ​ផ្ដាច់​គេ​ក្នុង​វិស័យ​នីមួយៗ នឹង​ទទួល​បាន​ទឹកប្រាក់​ចំនួន ២​ពាន់​ដុល្លារ​ដែរ ហើយ​ជ័យលាភី​ទទួល​បាន​តែ​រង្វាន់​ធំ​បំផុត​តែ​មួយ​គត់ មាន​ន័យ​ថា​មិន​ទទួល​បាន​រង្វាន់​ផ្ទួន​គ្នា​ឡើយ។ លើស​ពី​នេះ​ទៀត ជ័យលាភី​ទាំង ៣​រូប នឹង​អាច​បន្ត​ចូលរួម​ប្រកួត​យក​ពាន​រង្វាន់​បច្ចេកវិទ្យា​គមនាគមន៍ និង​ព័ត៌មាន​នៅ​ក្នុង​តំបន់​អាស៊ាន​ថែម​ទៀត​ផង (ASEAN ICT Awards)

កាល​ពី​ឆ្នាំ​២០១៧ មាន​ស្ថាប័ន​បី​ដែល​ទទួល​បាន​ជ័យលាភី រួម​មាន៖

  1. ក្រុមហ៊ុន DirexPlay បង្កើត​ហ្គេម JAILBREAK The Game
  2. វិទ្យាស្ថាន Open Institute បង្កើត​សេវាកម្ម​បង្ហាញ​ការងារ​លើ​អនឡាញ Bong Pheak
  3. ក្រសួង​សាធារណការ និង​ដឹក​ជញ្ជូន បង្កើត​ប្រព័ន្ធ​ចុះ​បញ្ជី​រថយន្ត​ស្វ័យប្រវត្តិ​តាម​អនឡាញ

របៀប​ដាក់​ពាក្យ​ចូលរួម​ប្រកួត​ប្រជែង​ដណ្ដើម​ពាន​រង្វាន់ ICT កម្ពុជា (Cambodia ICT Awards)

លោក​អ្នក​ត្រូវ​បំពេញ​ព័ត៌មាន​ស្នើសុំ​ប្រកួត​នៅ​លើ​វែបសាយ Cambodia ICT Awards ព្រម​ទាំង​ដាក់ YouTube Link នៃ​វីដេអូ​បទ​បង្ហាញ​ផង​ដែរ។ នេះ​ជា​តំណ​ភ្ជាប់​ទៅ​កាន់​ពាក្យ​ស្នើសុំ​ប្រកួត

ព័ត៌មាន​បន្ថែម៖

សូម​ចែក​រំលែក​ដំណឹង​នេះ​ទៅ​កាន់​មិត្តភ័ក្ដិ​របស់​លោក​អ្នក​ឲ្យ​បាន​ដឹង​អំពី​ព័ត៌មាន​នេះ​ផង។ សូម​អរគុណ!

សន្និសីទ​សារព័ត៌មាន​ស្ដីពី​ការ​ប្រកួត​ប្រជែង​ពាន​រង្វាន់ ICT កម្ពុជា ឆ្នាំ​២០១៨ (Cambodia ICT Awards) នា​ក្រសួង​ប្រៃសណីយ៍ និង​ទូរគមនាគមន៍ នៅ​ថ្ងៃ​ទី​២១ ខែ​មីនា ឆ្នាំ​២០១៨។ Credit: NIPTICT
សន្និសីទ​សារព័ត៌មាន​ស្ដីពី​ការ​ប្រកួត​ប្រជែង​ពាន​រង្វាន់ ICT កម្ពុជា ឆ្នាំ​២០១៨ (Cambodia ICT Awards) នា​ក្រសួង​ប្រៃសណីយ៍ និង​ទូរគមនាគមន៍ នៅ​ថ្ងៃ​ទី​២១ ខែ​មីនា ឆ្នាំ​២០១៨។ Credit: NIPTICT

កំណត់​ចំណាំ៖ ហាម​យក​អត្ថបទ​ពី​គេហទំព័រ www.www.techkhmer.net ទៅ​ចុះ​ផ្សាយ​ដោយ​គ្មាន​ការ​អនុញ្ញាត៕

Comments

 ឫទ្ធិស័ក្តិ
លោក ឫទ្ធិ ស័ក្ដិ គឺ​ជា​អ្នក​សរសេរ​អត្ថបទ​ផ្នែក​បច្ចេកវិទ្យា និង​គន្លឹះ​ថ្មីៗ​ក្នុង​ការ​ប្រើប្រាស់​ប្រចាំ​ថ្ងៃ​នៅ​ក្នុង​បច្ចេកវិទ្យា។ ស័ក្ដិ ចូលរួម​ចែក​រំលែក​ដំណឹង​ល្អៗ​អំពី​បច្ចេកវិទ្យា​ចាប់​តាំង​ពី​វេបសាយ​មួយ​នេះ​ត្រូវ​បាន​បង្កើត​ឡើង។ គាត់​ចង់​ឱ្យ​ប្រជាជន​ខ្មែរ​កាន់​តែ​ច្រើន​យល់​ដឹង​អំពី​បច្ចេកវិទ្យា​ឱ្យ​ទូលំទូលាយ ពីព្រោះ​បច្ចេកវិទ្យា​អាច​ជួយ​ឱ្យ​ជីវភាព​រស់នៅ​របស់​យើង​កាន់​តែ​ទំនើប​ស្រប​ទៅ​នឹង​ការ​វិវឌ្ឍ​នៃ​សម័យ​កាល។