ក្រុមហ៊ុនផ្ដល់សេវាកម្មអ៊ីនធឺណិត (ISP) ធំៗមួយចំនួននៅកម្ពុជា រងការវាយប្រហារតាមរយៈ DDoS ដែលបណ្ដាលឲ្យល្បឿនអ៊ីនធឺណិតមានល្បឿនយឺតខុសប្រក្រតីក្នុងរយៈពេលពីរបីថ្ងៃនេះ។
ក្រុមហ៊ុន EZECOM ដែលជាក្រុមហ៊ុនផ្ដល់សេវាកម្មអ៊ីនធឺណិតដ៏ធំមួយក្នុងចំណោមក្រុមហ៊ុនផ្សេងទៀតនៅកម្ពុជា ចេញសេចក្ដីជូនដំណឹងនៅថ្ងៃទី៦ ខែវិច្ឆិកា ឆ្នាំ២០១៨ ឲ្យដឹងថា ក្រុមហ៊ុននេះរងការវាយប្រហារតាមរយៈ DDoS កម្រិតធំពីរដងផ្ទួនៗក្នុងរយៈពេលពីរថ្ងៃកន្លងទៅ គឺនៅព្រឹកថ្ងៃអាទិត្យ ទី៤ និងព្រឹកថ្ងៃច័ន្ទ ទី៥ ខែវិច្ឆិកា ឆ្នាំ២០១៨។
ក្រុមហ៊ុន EZECOM បញ្ជាក់នៅក្នុងសេចក្ដីជូនដំណឹងនោះទៀតថា ការវាយប្រហារលើកនេះគឺជាការវាយប្រហារដ៏ធំជាងគេបំផុតនៅក្នុងប្រវត្តិសាស្ត្រអ៊ីនធឺណិតនៅកម្ពុជា ដែលចរាចរណ៍វាយលុកប្រមាណ ១៥០ Gbps ហើយសូម្បីតែប្រព័ន្ធការពារ DDoS កម្រិតខ្ពស់របស់ក្រុមហ៊ុន ក៏ពិបាកនឹងទប់ទល់ដែរ។
អានអត្ថបទផ្សេងទៀត៖
- ប្រយ័ត្ន! គ្រាន់តែគេ add អ្នកទៅជា admin page ណាមួយ នោះអ្នកក៏អាចបាត់បង់គណនីដែរ
- របៀបដកគណនីហ្វេសប៊ុករបស់អ្នកចេញពីទំព័រហ្វេសប៊ុកណាមួយ
- គណនីហ្វេសប៊ុកត្រូវគេលួច អាចដាក់ពាក្យប្ដឹងទៅនគរបាលប្រឆាំងបទល្មើសបច្ចេកវិទ្យា
ទោះយ៉ាងណា ក្រុមការងារនៃក្រុមហ៊ុន EZECOM ទាំងក្នុងប្រទេស និងដៃគូនៅក្រៅប្រទេស កំពុងដោះស្រាយបញ្ហានេះ ហើយក្រុមហ៊ុនរំពឹងថានឹងដោះស្រាយរួចរាល់ក្នុងរយៈពេលមួយ ឬពីរថ្ងៃធ្វើការ ប្រសិនបើមិនមានរលកនៃការវាយប្រហារបន្ថែមទៀត។
ចំណែកមន្ត្រីនៃនាយកដ្ឋានសន្តិសុខព័ត៌មានវិទ្យារបស់ក្រសួងប្រៃសណីយ៍ និងទូរគមនាគមន៍កម្ពុជា ក៏ត្រូវបានចាត់ឲ្យធ្វើការជាមួយក្រុមហ៊ុនផ្ដល់សេវាអ៊ីនធឺណិតដែលរងការវាយប្រហារនេះដែរ បន្ទាប់ពីទទួលបានព័ត៌មានអំពីការវាយប្រហារនេះកាលពីចុងសប្ដាហ៍។ នេះបើតាមអ្នកនាំពាក្យក្រសួងប្រៃសណីយ៍ និងទូរគមនាគមន៍កម្ពុជា លោក ខូវ មករា ថ្លែងប្រាប់សារព័ត៌មាន Fresh News នៅរសៀលថ្ងៃទី៦ ខែវិច្ឆិកា ឆ្នាំ២០១៨ នេះ។
លោក មករា បន្តថា ការវាយប្រហារតាម DDoS នេះគឺគ្រាន់តែធ្វើឲ្យល្បឿនអ៊ីនធឺណិតយឺតប៉ុណ្ណោះ និងមិនមែនជាការវាយប្រហារលួចទិន្នន័យអ្វីឡើយ ហើយក៏មិនមែនជាលើកទី១ នៅកម្ពុជា ដែរ។ លោកបញ្ជាក់ថា សម្រាប់នៅបរទេសវិញ គឺកើតឡើងស្ទើររាល់ថ្ងៃ។
ក្រុមហ៊ុនផ្ដល់សេវាអ៊ីនធឺណិតដែលរងការវាយប្រហារនេះរួមមាន ក្រុមហ៊ុន EZECOM ក្រុមហ៊ុន SI Net ក្រុមហ៊ុន Digi និងក្រុមហ៊ុនអ៊ីនធឺណិតមួយចំនួនទៀត។ នេះបើតាមការចុះផ្សាយរបស់សារព័ត៌មាន Fresh News នៅថ្ងៃដដែលនេះ។
សូមចុច Like និង See First ដើម្បីទទួលបានដំណឹង និងគន្លឹះថ្មីៗអំពីបច្ចេកវិទ្យាមុនគេ
សូមចែករំលែកដំណឹងនេះទៅកាន់មិត្តភ័ក្ដិរបស់អ្នកឲ្យបានដឹងផង។ សូមអរគុណ..!
កំណត់ចំណាំ៖ ហាមយកអត្ថបទពីគេហទំព័រ www.www.techkhmer.net ទៅចុះផ្សាយដោយគ្មានការអនុញ្ញាត៕
 ធំៗមួយចំនួននៅកម្ពុជា រងការវាយប្រហារតាមរយៈ DDoS ដែលបណ្ដាលឲ្យល្បឿនអ៊ីនធឺណិតមានល្បឿនយឺតខុសប្រក្រតីក្នុងរយៈពេលពីរបីថ្ងៃនេះ។){kind=link}