Facebook មានបញ្ហាទៀតហើយដែលធ្វើឱ្យអ្នកប្រើប្រាស់ពេញពិភពលោកមិនអាចផុស ឬមើលឃើញរូបភាព ឬវីដេអូ និងព័ត៌មានផ្សេងទៀតទាំងនៅលើ App និងនៅលើវេបសាយរបស់ខ្លួន នៅយប់ថ្ងៃទី៣ ខែកក្កដា ឆ្នាំ២០១៩ នេះ។
បញ្ហានេះក៏កើតមានឡើងនៅលើបណ្ដាញសង្គម Instagram និង WhatsApp ផងដែរ ដែលបណ្ដាញសង្គមទាំងពីរនេះក៏ស្ថិតនៅក្រោមក្រុមហ៊ុនហ្វេសប៊ុកដែរ។
បើតាមវេបសាយ Down Detector ដែលជាវេបសាយចាំឃ្លាំមើលបញ្ហារបស់ App និង Website នៅលើពិភពលោកនោះ បានឱ្យដឹងថា បញ្ហាផុសរូបមិនបាន ឬមិនអាចចុចមើលរូបភាពនៅលើ News Feed គឺចាប់ផ្ដើមនៅម៉ោងប្រមាណ ៨ព្រឹក (ម៉ោងនៅអាមេរិក)។ កំហុសនេះមិនបានប៉ះពាល់ដល់រូបភាពទាំងអស់នោះទេ មានន័យថា រូបភាពមួយចំនួនអាចមើលឃើញ ប៉ុន្តែរូបភាពមួយចំនួនទៀតមិនបង្ហាញនោះទេ។
Down Detector ក៏បានឱ្យដឹងទៀតថា ខ្លួនក៏បានទទួលរបាយការណ៍ពីអ្នកប្រើប្រាស់អំពីការមិនអាចមើលឃើញសារនៅក្នុង Facebook Messenger ផងដែរ។
អ្នកនាំពាក្យរបស់ក្រុមហ៊ុនហ្វេសប៊ុក (Facebook) ភ្លាមៗនោះបាននិយាយថា ខ្លួនបានដឹងអំពីបញ្ហានេះ ដែលអ្នកប្រើប្រាស់ និងអាជីវកម្មមួយចំនួនកំពុងតែជួបបញ្ហាមិនអាចផុស ឬផ្ញើរូបភាព វីដេអូ និងឯកសារផ្សេងទៀតបានទេនៅលើ apps របស់យើង។
ទោះយ៉ាងណា អ្នកនាំពាក្យហ្វេសប៊ុកបញ្ជាក់ថា ក្រុមហ៊ុនកំពុងតែដោះស្រាយបញ្ហានេះដើម្បីឱ្យបណ្ដាញសង្គមរបស់ខ្លួនត្រឡប់មកសភាពដើមវិញឱ្យលឿនបំផុតតាមដែលអាចធ្វើទៅបាន។
សូមចែករំលែកដំណឹងនេះទៅកាន់មិត្តភ័ក្ដិរបស់អ្នកផង។ សូមអរគុណ!
កំណត់ចំណាំ៖ ហាមយកអត្ថបទពីគេហទំព័រ www.www.techkhmer.netទៅចុះផ្សាយដោយគ្មានការអនុញ្ញាត៕
