ក្រុមហ៊ុនហ្វេសប៊ុក (Facebook) ច្រានចោលចំពោះការអះអាងរបស់នាយករដ្ឋមន្ត្រីថៃ ដែលថានាយកប្រតិបត្តិក្រុមហ៊ុនហ្វេសប៊ុក នឹងទៅជួបពិភាក្សាជាមួយលោកនៅប្រទេសថៃ នៅចុងខែតុលា នេះ។
ការឆ្លើយតបរបស់ក្រុមហ៊ុនហ្វេសប៊ុកនៅពេលនេះ គឺនៅក្រោយរយៈពេល ២ថ្ងៃនៃការប្រកាសរបស់លោកនាយករដ្ឋមន្ត្រីថៃ ប្រាយុទ្ធ ចាន់អូចា (Prayuth Chan-ocha) ប្រាប់អ្នកកាសែតថា លោកនឹងជួបពិភាក្សាជាមួយនាយកប្រតិបត្តិក្រុមហ៊ុនហ្វេសប៊ុក គឺលោក Mark Zuckerberg នៅថ្ងៃទី៣០ ខែតុលា នេះ។
ក្រុមហ៊ុនហ្វេសប៊ុកបានចេញសេចក្ដីប្រកាសព័ត៌មានដ៏ខ្លីមួយថា “បច្ចុប្បន្ន អ្នកគ្រប់គ្រងរបស់យើងគ្មានគម្រោងទៅប្រទេសថៃ នោះទេ“។
អ្នកនាំពាក្យនៃរដ្ឋាភិបាលប្រទេសថៃ លោក Weerachon Sukhondhapatipak មានប្រសាសន៍នៅថ្ងៃព្រហស្បតិ៍ ទី១៩ តុលា ថា លោកនាយករដ្ឋមន្ត្រីថៃ បានប្រកាសពីជំនួបជាមួយប្រធានក្រុមហ៊ុនហ្វេសប៊ុក លោក Mark Zuckerberg ទៅកាន់អ្នកកាសែត គឺក្រោយពីលោកនាយករដ្ឋមន្ត្រីបានទទួលព័ត៌មានសង្ខេបពីក្រុមប្រឹក្សាភិបាលវិនិយោគនៃប្រទេសថៃ។ លោកបន្តថា លោកក៏មិនដឹងប្រាកដដែរអំពីអ្វីដែលក្រុមប្រឹក្សាភិបាលវិនិយោគ បានរាយការណ៍ទៅនាយករដ្ឋមន្ត្រីថៃ នោះ។ នេះបើតាមការចុះផ្សាយរបស់កាសែត ឌឹ ញូវយ៉ក ថាមស៍ (The New York Times)៕
