ប្រុងប្រយ័ត្ន! ទំព័រ​ក្លែង​ជា​កម្មវិធី Messenger បន្លំ​លួច​គណនី​ហ្វេសប៊ុក

2558
ទំព័រ​ក្លែង​ជា​កម្មវិធី Messenger បន្លំ​លួច​គណនី​ហ្វេសប៊ុក
ទំព័រ​ក្លែង​ជា​កម្មវិធី Messenger បន្លំ​លួច​គណនី​ហ្វេសប៊ុក

នៅ​ពេល​ថ្មីៗ​នេះ ក្រុម​ការងារ​ថិចខ្មែរ (TECH KHMER) សង្កេត​ឃើញ​មាន​ផេក​មួយ​ចំនួន​ទើប​តែ​បង្កើត​ឡើង​ថ្មីៗ​នៅ​ចុង​ខែ​មេសា នេះ ហើយ​មាន Boost Page ផង បាន​បន្លំ​ឈ្មោះ​ស្រដៀង​នឹង​ឈ្មោះ​កម្មវិធី Messenger របស់​ហ្វេសប៊ុក ដោយ​ជំរុញ​ឱ្យ​អ្នក​ប្រើប្រាស់​ចុច​អាប់ដេត (update) កម្មវិធី Messenger។

ចូលរួម Telegram របស់ Techkhmer.net ដើម្បី​ទទួល​បាន​គន្លឹះ និង​ដំណឹង​ថ្មីៗ!

Loading...

ទំព័រ​ហ្វេសប៊ុក​ទាំងនោះ​មាន​ឈ្មោះ​ដូចជា “Messenger ubdate” និង​មាន​ទំព័រ​ជា​ភាសា​ខ្មែរ​មួយ​ទៀត​សរសេរ​ថា ធ្វើ​បច្ចុប្បន្នភាព ដោយ​មាន​ដាក់​ឡូហ្គូ (logo) នៃ​កម្មវិធី​ផ្ញើ​សារ​របស់​ហ្វេសប៊ុក (Messenger) ផង។ នៅ​ក្នុង​អត្ថបទ​ផ្សព្វផ្សាយ​របស់​ទំព័រ​ទាំងនោះ​បាន​សរសេរ​បញ្ចុះបញ្ចូល​អ្នក​ប្រើប្រាស់​ហ្វេសប៊ុក​ឱ្យ​ចុច​លើ​តំណភ្ជាប់​ដើម្បី​ធ្វើ​បច្ចុប្បន្នភាព​កម្មវិធី Messenger ដើម្បី​មើល​ឃើញ​អ្នក​ណា​ខ្លះ​ចូល​មើល Profile របស់​អ្នក​ជាដើម។

ក្រុម​ការងារ​ឆែក​មើល និង​តាមដាន​ទំព័រ​ទាំងនោះ យើង​ឃើញ​ថា​វា​ជា​ទំព័រ​ក្លែងក្លាយ ដែល​ត្រូវ​បាន​បង្កើត​ឡើង​ដោយ​ក្រុម​ទុច្ចរិត​ក្នុង​គោលបំណង​បោក​បញ្ឆោត​អ្នក​ប្រើប្រាស់​ហ្វេសប៊ុក​ឱ្យ​ចុច​លើ​តំណភ្ជាប់ និង​បំពេញ​ព័ត៌មាន​ប្រើប្រាស់​គណនី​ហ្វេសប៊ុក​ផ្ទាល់​ខ្លួន (username, password) ចូល​ទៅ​កាន់​ទំព័រ​របស់​ក្រុម​ជន​ខិលខូច​តែ​ប៉ុណ្ណោះ។ នេះ​ជា​វិធីសាស្ត្រ​មួយ​ក្នុង​ចំណោម​វិធីសាស្ត្រ​ជាច្រើន​ទៀត​ដែល​ក្រុម​វាយប្រហារ​ប្រើប្រាស់​ដើម្បី​លួច​យក​គណនី​ហ្វេសប៊ុក ឬ​គណនី​ធនាគារ​នៅ​លើ​បណ្ដាញ​អ៊ីនធឺណិត។

ដូច្នេះ សូម​បងប្អូន​កុំ​ចុច​លើ Link និង​កុំ​ធ្វើ​តាម​ការ​ណែនាំ​របស់​ទំព័រ​ហ្វេសប៊ុក​ទាំងនោះ​ឱ្យ​សោះ។ បើ​មិន​ដូច្នោះ​ទេ គណនី​ហ្វេសប៊ុក​របស់​អ្នក​នឹង​ត្រូវ​ក្រុម​ហេគឃឺ​លួច​យក​ភ្លាមៗ​តែម្ដង។ ប្រសិន​បើ​អ្នក​បាន​ធ្វើ​តាម​ទំព័រ​ទាំងនោះ សូម​ប្រញាប់​ផ្លាស់ប្ដូរ​ពាក្យ​សម្ងាត់​គណនី​ហ្វេសប៊ុក​របស់​អ្នក​ជាបន្ទាន់ និង​ផ្ទៀងផ្ទាត់​ព័ត៌មាន​សំខាន់ៗ​របស់​អ្នក​នៅ​ក្នុង Profile របស់​អ្នក​ផង​ថា​តើ​មាន​ការ​ផ្លាស់ប្ដូរ​អ្វី​ដែរ​ឬ​អត់ ដូចជា​លេខ​ទូរស័ព្ទ និង​អ៊ីមែល​ជាដើម។

បញ្ជាក់៖ ដើម្បី​អាប់ដេត​កម្មវិធី​លើ​ទូរស័ព្ទ​របស់​អ្នក​បាន គឺ​មាន​តែ​វិធី​មួយ​ប៉ុណ្ណោះ នោះ​គឺ​ចូល​ទៅ​កាន់ App Store (សម្រាប់ iOS) និង Google Play Store (សម្រាប់ Android) ហើយ​ឆែក​មើល​ថា​តើ​កម្មវិធី​ណា​មួយ​របស់​អ្នក​ត្រូវការ​ធ្វើ​បច្ចុប្បន្នភាព (Update)។ បើ​សិន​ជា​មាន នោះ​វា​នឹង​បង្ហាញ​ពាក្យ​ថា “Update”៕

Comments

លោក ឫទ្ធិ ស័ក្ដិ គឺ​ជា​អ្នក​សរសេរ​អត្ថបទ​ផ្នែក​បច្ចេកវិទ្យា និង​គន្លឹះ​ថ្មីៗ​ក្នុង​ការ​ប្រើប្រាស់​ប្រចាំ​ថ្ងៃ​នៅ​ក្នុង​បច្ចេកវិទ្យា។ ស័ក្ដិ ចូលរួម​ចែក​រំលែក​ដំណឹង​ល្អៗ​អំពី​បច្ចេកវិទ្យា​ចាប់​តាំង​ពី​វេបសាយ​មួយ​នេះ​ត្រូវ​បាន​បង្កើត​ឡើង។ គាត់​ចង់​ឱ្យ​ប្រជាជន​ខ្មែរ​កាន់​តែ​ច្រើន​យល់​ដឹង​អំពី​បច្ចេកវិទ្យា​ឱ្យ​ទូលំទូលាយ ពីព្រោះ​បច្ចេកវិទ្យា​អាច​ជួយ​ឱ្យ​ជីវភាព​រស់នៅ​របស់​យើង​កាន់​តែ​ទំនើប​ស្រប​ទៅ​នឹង​ការ​វិវឌ្ឍ​នៃ​សម័យ​កាល។