Google លុប​កម្មវិធី​ទូរស័ព្ទ​ចំនួន 19 ដែល​ផ្ទុក Adware និង​ស្នើ​អ្នក​ប្រើ​លុប​ចេញ​ពី​ទូរស័ព្ទ

ក្រុមហ៊ុន Google លុប​កម្មវិធី​ទូរស័ព្ទ​ចំនួន ១៩ (Apps) ចេញ​ពី​ហាង Google Play Store របស់​ខ្លួន​ដែល​ក្រុមហ៊ុន​ចាត់ទុក​ជា​កម្មវិធី​មាន​គ្រោះថ្នាក់​ដល់​អ្នក​ប្រើប្រាស់ ដោយសារ​វា​មាន​បង្កប់ Adware (មេរោគ)។

កម្មវិធី​ទូរស័ព្ទ​ទាំងនោះ ត្រូវ​បាន​គេ​ទាញ​យក​ពី Google Play Store រាប់​លាន​ដង​ដើម្បី​ដំឡើង​នៅ​លើ​ទូរស័ព្ទ​ស្មាតហ្វូន។

ក្រុម​អ្នក​ស្រាវជ្រាវ​សន្តិសុខ​ឌីជីថល​ឈ្មោះ White Ops Satori Threat Intelligence បាន​ស្រាវជ្រាវ និង​រក​ឃើញ​កម្មវិធី​ទាំង ១៩ (Apps) មាន​ភ្ជាប់​ពពួក Adware ដែល​អាច​គ្រប់គ្រង​លើ​កម្មវិធី​ទូរស័ព្ទ​សូម្បី​តែ​នៅ​ពេល​ទូរស័ព្ទ​ចាក់​សោ បើក​សោ ព្រមទាំង​ពេល​ទូរស័ព្ទ​កំពុង​សាក​ថ្ម និង​មិន​សាក​ថ្ម។ លើស​ពី​នេះ ទូរស័ព្ទ​អាច​ត្រូវ​បាន​វាយប្រហារ​ទោះបីជា​កម្មវិធី​ទូរស័ព្ទ​មាន Adware នោះ​មិន​ត្រូវ​បាន​បើក​ដំណើរការ​ក៏ដោយ។

តើ Adware ជា​អ្វី? Adware ត្រូវ​បាន​គេ​ស្គាល់​ថា​ជា​ប្រភេទ​កម្មវិធី (software) ដែល​បង្កើត​ឡើង​សម្រាប់​ផ្សព្វផ្សាយ​ពាណិជ្ជកម្ម។ ការ​បង្កើត​កម្មវិធី​នេះ​ក្នុង​បំណង​ផ្សាយ​ពាណិជ្ជកម្ម ឬ​ជួយ​កម្មវិធី​ផ្សេង​ទៀត​ដើម្បី​ស្វែងរក​ប្រាក់​ចំណេញ​ពី​ការ​ផ្សាយ​ពាណិជ្ជកម្ម។ ប៉ុន្តែ Adware មួយចំនួន​ក៏​ត្រូវ​បាន​បង្កើត​ឡើង​ដើម្បី​បង្កើត​ច្រក​សម្រាប់​កម្មវិធី​គ្រោះថ្នាក់​ផ្សេង​ទៀត​ដែរ (malicious program)។

ក្រុម​អ្នក​ស្រាវជ្រាវ​សន្តិសុខ​ឌីជីថល​រក​ឃើញ​ទៀត​ថា កម្មវិធី​មួយចំនួន​ក្នុង​ចំណោម​កម្មវិធី​ដែល​មាន Adware គឺ​បាន​លាក់​ខ្លួន។ ការណ៍​នេះ អ្នក​ប្រើប្រាស់​មិន​អាច​រក​ឃើញ​កម្មវិធី​ទាំងនោះ​នៅ​ក្នុង​ផ្នែក downloads ដើម្បី​លុប​វា​ចេញ​ពី​ទូរស័ព្ទ​បាន​នោះ​ទេ។

ទោះជាយ៉ាងណា ក្រុមហ៊ុន Google បាន​លុប​កម្មវិធី​ទាំងនោះ​ចេញ​ពី Play Store រួច​ហើយ ប៉ុន្តែ​សម្រាប់​អ្នក​ប្រើ Android សូម​ប្រញាប់​ឆែក​មើល និង​លុប​កម្មវិធី​ទាំងនោះ​ចេញ​ពី​ទូរស័ព្ទ​របស់​អ្នក​ជា​បន្ទាន់។

ខាង​ក្រោម​នេះជា​បញ្ជី​​ឈ្មោះ​កម្មវិធី​ដែល​ត្រូវ​បាន​លុប​ចេញ​ពី Google Play Store៖

1. Auto Picture Cut ត្រូវ​បាន​ទាញ​យក​100,000+
2. Color Call Flash ចំនួន​ទាញ​យក 50,000+
3. Square Photo Blur ចំនួន​ទាញ​យក 500,000+
4. Square Blur Photo ចំនួន​ទាញ​យក 500,000+
5. Magic Call Flash ចំនួន​ទាញ​យក 50,000+
6. Easy Blur ចំនួន​ទាញ​យក 100,000+
7. Image Blur ចំនួន​ទាញ​យក 100,000+
8. Auto Photo Blur ចំនួន​ទាញ​យក 100,000+
9. Photo Blur ចំនួន​ទាញ​យក 500,000+
10. Photo Blur Master ចំនួន​ទាញ​យក 100,000+
11. Super Call Screen ចំនួន​ទាញ​យក 100,000+
12. Square Blur Master ចំនួន​ទាញ​យក 100,000+
13. Square Blur ចំនួន​ទាញ​យក 50,000+
14. Smart Blur Photo ចំនួន​ទាញ​យក 500,000+
15. Smart Photo Blur ចំនួន​ទាញ​យក 500,000+
16. Super Call Flash ចំនួន​ទាញ​យក 100,000+
17. Smart Call Flash ចំនួន​ទាញ​យក 50,000+
18. Blur Photo Editor ចំនួន​ទាញ​យក 5,000+
19. Blur Image ចំនួន​ទាញ​យក 10,000+

បច្ចុប្បន្ន ក្រុម​ស្រាវជ្រាវ​​នៃ White Ops Satori Threat Intelligence ​នៅ​តែ​តាមដាន​ការ​គំរាមកំហែង​មួយ​នេះ និង​កំណត់​អត្តសញ្ញាណ​កម្មវិធី​ផ្សេងៗ​ទៀត៕

Comments