ឥណ្ឌា​ហាមឃាត់​កម្មវិធី​ទូរស័ព្ទ​ចិន ៤៧ បន្ថែម​បន្ទាប់ពី Tik Tok, WeChat

2252
កម្មវិធី​ស្មាតហ្វូន​របស់​ចិន

រដ្ឋាភិបាល​ឥណ្ឌា ហាមឃាត់​កម្មវិធី​ស្មាតហ្វូន (smartphone apps) របស់​ប្រទេស​ចិន​បន្ថែម​ទៀត​ចំនួន ៤៧ Apps នៅ​ថ្ងៃ​សុក្រ សប្ដាហ៍​មុន ដែល​កម្មវិធី​ទាំងនោះ​ជា​កម្មវិធី clones (ចម្លង) ឬ​ជា​កម្មវិធី​ដែល​ជាប់​ពាក់ព័ន្ធ​នឹង​កម្មវិធី​ទូរស័ព្ទ​ដែល​ត្រូវ​បាន​ហាមឃាត់​កាលពី​ខែ​មុន។

ចូលរួម Telegram របស់ Techkhmer.net ដើម្បី​ទទួល​បាន​គន្លឹះ និង​ដំណឹង​ថ្មីៗ!

Loading...

ការ​ហាមឃាត់​កម្មវិធី​ស្មាតហ្វូន​ចំនួន ៤៧ កម្មវិធី​បន្ថែម​ទៀត​នេះ បន្ទាប់​ពី​រដ្ឋាភិបាល​ឥណ្ឌា បាន​ហាមឃាត់​កម្មវិធី​ដ៏​ពេញនិយម​របស់​ចិន គឺ Tik Tok, WeChat និង​កម្មវិធី​ចំនួន ៥៧ ផ្សេង​ទៀត​កាលពី​ខែ​មិថុនា ឆ្នាំ​២០២០។

ក្រសួង​បច្ចេកវិទ្យា​ព័ត៌មាន​នៃ​រដ្ឋាភិបាល​ឥណ្ឌា ឱ្យ​ដឹង​តាមរយៈ​សារព័ត៌មាន The Indian Express ប្រទេស​ឥណ្ឌា​ថា «បញ្ហា​នៃ​ការ​ហាមឃាត់​នេះ​គឺ​ស្ថិត​នៅ​ត្រង់​ក្រមសីលធម៌​ប្រតិបត្តិការ​នៃ​កម្មវិធី​ទូរស័ព្ទ​ទាំងនោះ។ នេះ​គឺជា​ដំណើរការ។ ប្រសិនបើ​កម្មវិធី​មាន​លក្ខណៈ​ក្រោម​មូលដ្ឋាន​នៃ​ក្រមសីលធម៌​ប្រតិបត្តិការ កម្មវិធី​ទាំងអស់​នោះ​នឹង​ស្ថិត​ក្រោម​ការ​ស្កេន (ត្រួត​ពិនិត្យ)»។ ប្រភព​បញ្ជាក់​បន្ថែម​ថា ក្រមសីលធម៌​ប្រតិបត្តិការ​គឺ​សំដៅ​លើ​ទិន្នន័យ​ត្រូវ​បាន​បញ្ជូន​ទៅ​កាន់​រដ្ឋាភិបាល​នៃ​ប្រទេស​ចិន។

ដកស្រង់​ពី «ការ​លេចឡើង​នៃ​ការ​គំរាមកំហែង» ពី​កម្មវិធី​ទូរស័ព្ទ​ដ៏​ល្បីៗ​ដែល​មាន​ប្រភព​ពី​ប្រទេស​ចិន ដូចជា​កម្មវិធី Tik Tok, ShareIt, UCBrowser, Club Factory and CamScanner ឥណ្ឌា​បាន​ហាមឃាត់​កម្មវិធី​ទូរស័ព្ទ​ចំនួន ៥៩ កាលពី​ថ្ងៃ​ទី២៩ មិថុនា ផ្អែកលើ​ព័ត៌មាន​ដែល​ជាប់​ពាក់ព័ន្ធ​ដល់​ឯកជនភាព សុវត្ថិភាព និង​សន្តិសុខ​ជាតិ ក៏ដូចជា​សណ្ដាប់ធ្នាប់​សាធារណៈ។

ប្រធាន​មជ្ឈមណ្ឌល​សម្របសម្រួល​ឧក្រិដ្ឋកម្ម​តាម​អ៊ីនធឺណិត​នៃ​រដ្ឋាភិបាល​ឥណ្ឌា (National Cyber Coordination Center, NCCC) លោក Rajesh Pant ថ្លែង​ប្រាប់​សារព័ត៌មាន The Indian Express បន្ទាប់ពី​ហាមឃាត់​កម្មវិធី​ទូរស័ព្ទ​កាលពី​ខែ​មិថុនា ថា «យើង​មាន​បច្ចេកទេស​ក្នុង​ការ​ស្វែងរក​ថា​តើ​ទិន្នន័យ​វា​ទៅ​ដល់​ណា តើ​កូដ​អ្វី​ដែល​លាក់​ខ្លួន​ក្នុង​កម្មវិធី។ ផ្អែកលើ​ការ​រក​ឃើញ​ទាំងនេះ និង​រួមផ្សំ​ជាមួយ​នឹង​ពាក្យ​បណ្ដឹង រដ្ឋាភិបាល​ក៏​សម្រេច​អនុវត្ត​តាម​គ្រប់​វិធី​ទាំងអស់…»។

រដ្ឋាភិបាល​ឥណ្ឌា ចាប់ផ្ដើម​ហាមឃាត់​កម្មវិធី​ស្មាតហ្វូន​ដែល​មាន​ប្រភព​ពី​ប្រទេស​ចិន បន្ទាប់ពី​កងកម្លាំង​យោធា​ឥណ្ឌា ប៉ះទង្គិច​ជាមួយ​កងទ័ព​ប្រទេស​ចិន ក្នុង​តំបន់​ឡាដាក (Ladakh) ភាគ​ខាងជើង​ប្រទេស​ឥណ្ឌា ដែល​បណ្ដាល​ឱ្យ​យោធា​ឥណ្ឌា​យ៉ាងហោច​ណាស់​ស្លាប់ ២០​នាក់ និង​របួស​ជាង ៧៥​នាក់​កាលពី​ថ្ងៃ​ទី១៥ មិថុនា កន្លង​ទៅ៕

Comments

 ឫទ្ធិស័ក្តិ
លោក ឫទ្ធិ ស័ក្ដិ គឺ​ជា​អ្នក​សរសេរ​អត្ថបទ​ផ្នែក​បច្ចេកវិទ្យា និង​គន្លឹះ​ថ្មីៗ​ក្នុង​ការ​ប្រើប្រាស់​ប្រចាំ​ថ្ងៃ​នៅ​ក្នុង​បច្ចេកវិទ្យា។ ស័ក្ដិ ចូលរួម​ចែក​រំលែក​ដំណឹង​ល្អៗ​អំពី​បច្ចេកវិទ្យា​ចាប់​តាំង​ពី​វេបសាយ​មួយ​នេះ​ត្រូវ​បាន​បង្កើត​ឡើង។ គាត់​ចង់​ឱ្យ​ប្រជាជន​ខ្មែរ​កាន់​តែ​ច្រើន​យល់​ដឹង​អំពី​បច្ចេកវិទ្យា​ឱ្យ​ទូលំទូលាយ ពីព្រោះ​បច្ចេកវិទ្យា​អាច​ជួយ​ឱ្យ​ជីវភាព​រស់នៅ​របស់​យើង​កាន់​តែ​ទំនើប​ស្រប​ទៅ​នឹង​ការ​វិវឌ្ឍ​នៃ​សម័យ​កាល។