តើ Password និង Passphrase ខុស​គ្នា​ដូចម្ដេច? មួយ​ណា​ល្អ​ជាង?

3564
ពាក្យ​សម្ងាត់ (Password) Vs. ឃ្លា​សម្ងាត់ (Passphrase)

ពាក្យ​សម្ងាត់ ឬ​ជា​ភាសា​អង់គ្លេស​ហៅ​ថា Password ត្រូវ​បាន​អ្នក​ប្រើប្រាស់​គណនី​អនឡាញ ឬ​អ្នក​ប្រើ​អ៊ីនធឺណិត​ស្គាល់​ជាទូទៅ​រាប់​សិប​ឆ្នាំ​មក​ហើយ ប៉ុន្តែ​ឃ្លា​សម្ងាត់ ឬ​ភាសា​អង់គ្លេស​ហៅ​ថា Passphrase កំពុង​ត្រូវ​បាន​គេ​លើក​យក​មក​ពិភាក្សា​នា​ពេល​បច្ចុប្បន្ន​នេះ។

ចូលរួម Telegram របស់ Techkhmer.net ដើម្បី​ទទួល​បាន​គន្លឹះ និង​ដំណឹង​ថ្មីៗ!

Loading...

អស់​រយៈពេល​ជាច្រើន​ទសវត្ស​មក​ហើយ​ដែល​អ្នក​ប្រើប្រាស់​អ៊ីនធឺណិត​ស្ទើរ​តែ​ពេញ​ពិភពលោក ត្រូវ​បាន​អ្នក​ជំនាញ​ខាង​សន្តិសុខ​អ៊ីនធឺណិត​ណែនាំ​ឱ្យ​បង្កើត​នូវ​ពាក្យ​សម្ងាត់​ដែល​រឹងមាំ​ឬ​ខ្លាំង​ដែល​អ្នក​ដទៃ​មិន​អាច​ទស្សន៍ទាយ​ដឹង ឬ​បំបែក​បាន​ដោយ​ម៉ាស៊ីន ប៉ុន្តែ​ងាយស្រួល​ចងចាំ​សម្រាប់​ម្ចាស់​គណនី។ មាន​ន័យ​ថា ពាក្យ​សម្ងាត់​ដែល​ខ្លាំង​នោះ​ត្រូវ​តែ​មាន​អក្សរ​ធំ​តូច និមិត្តសញ្ញា និង​លេខ​លាយឡំ​គ្នា ថែម​ទាំង​ត្រូវ​តែ​មាន​ចំនួន​យ៉ាង​តិច​ក៏ ១២​ខ្ទង់​ដែរ។

សព្វថ្ងៃ និន្នាការ​នៃ​ការ​លួច ឬ​បំបែក​ពាក្យ​សម្ងាត់ (password) និង​លួច​អត្តសញ្ញាណ (identity theft) កំពុង​តែ​ល្បី​នៅ​លើ​បណ្ដាញ​អ៊ីនធឺណិត ដែល​ដំណឹង​នេះ​បាន​ធ្វើ​ឱ្យ​អ្នក​ប្រើប្រាស់​អ៊ីនធឺណិត​ជាច្រើន​ចាប់ផ្ដើម​ព្រួយ​បារម្ភ​ពី​សុវត្ថិភាព​គណនី​របស់​ខ្លួន​នៅ​លើ​បណ្ដាញ​អ៊ីនធឺណិត។

ទន្ទឹម​នឹង​នេះ អ្នក​ជំនាញ​បច្ចេកវិទ្យា​បាន​ណែនាំ​ដល់​អ្នក​ប្រើប្រាស់​បណ្ដាញ​អ៊ីនធឺណិត​ឱ្យ​ប្រើប្រាស់​នូវ​ឃ្លា​សម្ងាត់ (Passphrase) ជំនួស​វិញ ប៉ុន្តែ​មិន​មែន​មនុស្ស​គ្រប់​គ្នា​សុទ្ធតែ​ដឹង​អំពី​ករណី​នេះ​ទេ ហើយ​ក៏​មិន​ប្រាកដ​ថា​ការ​ប្រើប្រាស់​ឃ្លា​សម្ងាត់​មាន​សុវត្ថិភាព​ជាង​នោះ​ដែរ។

តើ Password និង Passphrase ខុស​គ្នា​ដូចម្ដេច?

ពាក្យ​សម្ងាត់ (Password) ដែល​អ្នក​បាន​ដឹង​កន្លង​មក គឺ​ជាទូទៅ​ត្រូវ​បាន​បង្កើត​ឡើង​យ៉ាង​តិច​ពី ៨ ទៅ ១០​តួ​អក្សរ​ឬ​សញ្ញា ឬ​ជា​ការ​រួមផ្សំ​គ្នា​នៃ​អក្សរ​និង​និមិត្ត​សញ្ញា​បញ្ចូល​គ្នា។ វា​អាច​ជា​ប្រវែង​នៃ​និមិត្ត​សញ្ញា​ចៃដន្យ (random) ដូចជា “Br0th3R!$$” ឬ​អាច​ជា​ពាក្យ​ដែល​ចាត់​ទុក​ថា​ខ្សោយ​បំផុត​ដូចជា “ឈ្មោះ​របស់​អ្នក ឬ​លេខ​ទូរស័ព្ទ​របស់​អ្នក” ឬ​ជា​ការ​បញ្ចូល​ករណី​ទាំងពីរ​រួម​គ្នា។

ចំណែកឯ​ឃ្លា​សម្ងាត់ (Passphrase) ក៏​ជា​ប្រភេទ​នៃ​ពាក្យ​សម្ងាត់​ដែរ ប៉ុន្តែ​វា​ប្រើ​នូវ​ក្បួន​ថ្មី​ដែល​ជា​ប្រភេទ​ឃ្លា ឬ​ប្រយោគ​មាន​ប្រវែង​វែង​ជាង​ពាក្យ​សម្ងាត់ ហើយ​ថែម​ទាំង​អាច​មាន​ដក​ឃ្លា (space) រវាង​ពាក្យ​នីមួយៗ​ទៀត​ផង ដូចជា “I go to Siem Reap this weekend after work!” ជាដើម។ លើស​ពី​នេះ​ទៀត ឃ្លា​សម្ងាត់​ក៏​អាច​មាន​បញ្ចូល​នូវ​និមិត្ត​សញ្ញា និង​មិន​ចាំបាច់​ជា​ប្រយោគ​ដែល​ត្រឹមត្រូវ ឬ​ត្រូវ​តាម​វេយ្យាករណ៍​នោះ​ទេ។

សរុប​មក ចំណុច​សំខាន់​នៃ​ភាព​ខុស​គ្នា គឺ​ពាក្យ​សម្ងាត់​មិន​មាន​ដក​ឃ្លា ចំណែកឯ​ឃ្លា​សម្ងាត់​មាន​ដក​ឃ្លា និង​វែង​ជាង។

អាន​អត្ថបទ៖ របៀប​បង្កើត​ពាក្យ​សម្ងាត់ (password) ដែល​ខ្លាំង

ហេតុ​អ្វី​បាន​ជា Passphrase ល្អ​ជាង Password?

  • ឃ្លា​សម្ងាត់ (Passphrase) ងាយស្រួល​ចងចាំ​ជាង​ពាក្យ​សម្ងាត់ ដោយសារ​តែ​វា​ជា​ឃ្លា ឬ​ប្រយោគ​ដែល​អ្នក​ងាយស្រួល​ចងចាំ។
  • ពាក្យ​សម្ងាត់ (Password) ងាយស្រួល​គេ​ស្មាន ឬ​បំបែក​បាន​ដោយ​មនុស្ស ឬ​ម៉ាស៊ីន​រូប៉ូត (robot)។
  • ឃ្លា​សម្ងាត់​បាន​បញ្ចូល​នូវ​ក្បួន​ដែល​ពាក្យ​សម្ងាត់​បាន​ប្រើប្រាស់​ជា​យូរ​មក​ហើយ​ដូចជា​និមិត្ត​សញ្ញា អក្សរ​តូច អក្សរ​ធំ និង​លេខ។
  • ស្ទើរ​តែ​គ្រប់​ប្រព័ន្ធ​ប្រតិបត្តិការ (OS) ដូចជា Windows, Linux និង Mac គឺ​បាន​អនុញ្ញាត​ឱ្យ​ប្រើប្រាស់ Passphrase រហូត​ដល់ ១២៧​តួ។
  • ដោយសារ​តែ​ឧបករណ៍​បំបែក​ពាក្យ​សម្ងាត់ (cracking tools) ល្បីៗ​មួយចំនួន​អាច​បំបែក​ពាក្យ​សម្ងាត់​ក្នុង​រង្វង់ ១០​ខ្ទង់ ដូច្នេះ​ការ​ប្រើប្រាស់​ឃ្លា​សម្ងាត់​មាន​ប្រវែង​វែង គឺ​រឹងមាំ និង​មិន​ងាយ​ត្រូវ​បាន​បំបែក។

ទោះបីជា​ការ​ប្រើប្រាស់​ឃ្លា​សម្ងាត់​ត្រូវ​បាន​គេ​ចាត់​ទុក​ថា​វា​មាន​ភាព​រឹងមាំ​ជាង​ពាក្យ​សម្ងាត់​ក៏ដោយ អ្នក​ក៏​ត្រូវ​ប្រាកដ​ថា​ឃ្លា​សម្ងាត់​របស់​អ្នក​មិន​មែន​ជា​ឃ្លា​ដែល​គេ​ពេញនិយម​ដែល​អ្នក​ដទៃ ឬ​អ្នក​ដែល​ស្គាល់​អ្នក​អាច​ប៉ាន់ស្មាន​ដឹង​នោះ​ទេ។ ដូច្នេះ ជៀសវាង​ការ​ប្រើ​ឃ្លា​សម្ងាត់​ដែល​ពេញនិយម ហើយ​យ៉ាងហោចណាស់​ឃ្លា​សម្ងាត់​របស់​អ្នក​ក៏​ត្រូវ​ចាប់​ពី ៥​ឃ្លា ឬ ១៤​តួ​ឡើង​ទៅ​ដែរ។ អ្នក​ត្រូវ​ចាំ​ថា ឃ្លា​សម្ងាត់​មួយ​សម្រាប់​តែ​គណនី​មួយ​ប៉ុណ្ណោះ ដើម្បី​ជៀសវាង​ករណី​ឃ្លា​សម្ងាត់​មួយ​ត្រូវ​បាន​គេ​ស្គាល់ នោះ​គណនី​ផ្សេង​ទៀត​របស់​អ្នក​នៅ​តែ​មាន​សុវត្ថិភាព៕

Comments

ជុំ រ៉ាស៊ី
លោក ជុំ រ៉ាស៊ី គឺ​ជា​អ្នក​សរសេរ​អត្ថបទ​ផ្នែក​បច្ចេកវិទ្យា។ គាត់​ចូលចិត្ត​បច្ចេកវិទ្យា ដូច្នេះ​គាត់​សិក្សា​ពី​វា និង​ចែក​រំលែក​គ្រប់​យ៉ាង​ពី​វា​ទៅ​កាន់​មនុស្ស​ទូទៅ។ គាត់​សង្ឃឹម​ថា​ការ​ចែក​រំលែក​នេះ​នឹង​ក្លាយ​ជា​ដើមទុន​ចំណេះដឹង​សម្រាប់​សិស្ស​ដែល​ចង់​ចាប់​យក​ជំនាញ​បច្ចេកវិទ្យា និង​ជា​ជំនួយ​ក្នុង​ការ​សិក្សា​ស្រាវជ្រាវ​បន្ថែម​របស់​និស្សិត​ផ្នែក​បច្ចេកវិទ្យា ព្រម​ទាំង​ជា​ចំណេះដឹង​ទូទៅ​ដល់​មនុស្ស​សាមញ្ញ​ផង​ដែរ។ ម្នាក់​បន្តិច នោះ​នឹង​បាន​ច្រើន!