ក្រុមហ៊ុន Apple លែងឲ្យក្រុមហ៊ុន Telegram ធ្វើបច្ចុប្បន្នភាពកម្មវិធី (update app) នៅលើហាង App Store រយៈពេល ១ខែកន្លះមកម៉្លេះ គឺនៅពេលដែលនិយតករទូរគមនាគមន៍រដ្ឋរបស់រុស្ស៊ី បញ្ជូនសំណើទៅក្រុមហ៊ុនពីរ គឺ Apple និង Google ឲ្យលុបចោលកម្មវិធី Telegram ចេញពី Store។ នេះបើតាមសាររបស់នាយកប្រតិបត្តិនៃ Telegram។
នាយកប្រតិបត្តិរបស់ Telegram លោក Pavel Durov បានសរសេរនៅលើគណនី Twitter របស់លោកថា Apple បានបិទ (block) មិនឲ្យ Telegram ធ្វើបច្ចុប្បន្នភាពកម្មវិធីទូទាំងពិភពលោក។ នៅពេលកម្មវិធីមិនបាន update នោះមុខងារមួយចំនួនដូចជា stickers នឹងមិនដំណើរការល្អនៅលើ iOS 11.4 ដែលក្រុមហ៊ុន Apple ទើបតែដាក់ឲ្យប្រើប្រាស់ជាផ្លូវការនោះទេ។
ទោះយ៉ាងណាក៏ដោយ ក្រុមហ៊ុន Apple មិនទាន់ឆ្លើយតបនឹងបញ្ហានេះនៅឡើយទេរហូតមកដល់ពេលនេះ។
លោក Durov បានពន្យល់បន្ថែមនៅលើសារ Telegram ថា Apple បានរារាំងមិនឲ្យ Telegram ធ្វើបច្ចុប្បន្នភាពកម្មវិធីរបស់ខ្លួននៅលើ App Store ទាំងមូលចាប់តាំងពីអាជ្ញាធររុស្ស៊ី បញ្ជាឲ្យ Apple លុបកម្មវិធី Telegram ចេញពី App Store។ លោកបន្ថែមថា ខណៈដែលប្រទេសរុស្ស៊ី មានត្រឹមតែ ៧% នៃអ្នកប្រើប្រាស់ Telegram ប៉ុន្តែក្រុមហ៊ុន Apple កំពុងតែរឹតត្បិតការធ្វើបច្ចុប្បន្នភាពសម្រាប់អ្នកប្រើប្រាស់កម្មវិធី Telegram ជុំវិញពិភពលោកចាប់តាំងពីពាក់កណ្ដាលខែមេសា ឆ្នាំ២០១៨។
នាយកប្រតិបត្តិក្រុមហ៊ុន Telegram រូបនេះក៏បានអះអាងផងដែរថា ការមិនបានធ្វើបច្ចុប្បន្នភាពកម្មវិធី គឺមានន័យថា Telegram ក៏មិនមានលទ្ធភាពអនុវត្តពេញលេញនូវច្បាប់ GDPR (General Data Protection Regulation) ឲ្យបានមុនថ្ងៃទី២៥ ខែឧសភា ឆ្នាំ២០១៨ ដែរ។
ការដាក់សំណើទៅក្រុមហ៊ុនធំៗទាំងពីរមានក្រុមហ៊ុន Apple និងក្រុមហ៊ុន Google នេះ បន្ទាប់ពីតុលាការរុស្ស៊ី បានចេញសេចក្ដីសម្រេចឲ្យបិទសេវាកម្មរបស់ក្រុមហ៊ុន Telegram ចេញពីប្រទេសរបស់ខ្លួន ដោយសារតែក្រុមហ៊ុននេះមិនព្រមឲ្យអ្នកជំនាញផ្នែកសុវត្ថិភាពរុស្ស៊ី ចូលទៅឆែកមើលសារសម្ងាត់របស់អ្នកប្រើប្រាស់ Telegram។
កាលពីចុងខែឧសភា និយតករទូរគមនាគមន៍រដ្ឋរបស់រុស្ស៊ី ដែលមានឈ្មោះថា Roskomnadzor ទុកពេល ១ខែឲ្យក្រុមហ៊ុន Apple ដើម្បីលុបកម្មវិធី Telegram ចេញពី App Store និងបានគំរាមក្រុមហ៊ុន Apple ថាអាចប្រឈមមុខនឹងផលវិបាក ប្រសិនបើក្រុមហ៊ុននេះមិនព្រមលុបកម្មវិធីផ្ញើសារ Telegram ចេញពីហាង App Store។
អានអត្ថបទផ្សេងទៀត៖
- រុស្ស៊ី ទុកពេល ១ខែឲ្យ Apple ដើម្បីលុប Telegram ចេញពី Store
- របៀបប្រើប្រាស់ Telegram នៅលើកុំព្យូទ័រ
- មុននឹងលក់ Smartphone ឬឲ្យវាទៅអ្នកដទៃ តើត្រូវធ្វើអ្វីខ្លះ?
បច្ចុប្បន្ន Telegram មានអ្នកប្រើប្រាស់ទូទាំងសកលលោកជាង ២០០លាននាក់ និងត្រូវបានចាត់ថ្នាក់ជាកម្មវិធីផ្ញើសារដ៏ពេញនិយមបំផុតទី៩ លើពិភពលោក។
Telegram គឺជាកម្មវិធីផ្ញើ និងទទួលសារតាមរយៈអ៊ីនធឺណិតដោយផ្ដោតសំខាន់លើល្បឿន និងសុវត្ថិភាពរបស់អ្នកប្រើប្រាស់កម្មវិធី។ កម្មវិធី Telegram ត្រូវបានដាក់ឲ្យដំណើរការនៅឆ្នាំ២០១៣ និងគាំទ្រផ្នែកហិរញ្ញវត្ថុដោយសហគ្រិនបងប្អូនជនជាតិរុស្ស៊ី គឺលោក Pavel Valerievich Durov និងលោក Nikolai Durov។ បច្ចុប្បន្ន ក្រុមអ្នកបង្កើតកម្មវិធី Telegram គឺមានទីតាំងនៅទីក្រុង Dubai បន្ទាប់ពីពួកគេត្រូវចាកចេញពីប្រទេសរុស្ស៊ី ដោយសារតែច្បាប់គ្រប់គ្រងព័ត៌មានវិទ្យា (IT regulations)។
សូមចែករំលែកដំណឹងនេះទៅកាន់មិត្តភ័ក្ដិរបស់លោកអ្នកឲ្យបានដឹងអំពីព័ត៌មាននេះផង។ សូមអរគុណ!
កំណត់ចំណាំ៖ ហាមយកអត្ថបទពីគេហទំព័រ www.www.techkhmer.net ទៅចុះផ្សាយដោយគ្មានការអនុញ្ញាត៕
 នៅលើហាង App Store រយៈពេល ១ខែកន្លះមកម៉្លេះ។){kind=link}