សិក្ខាសាលាបច្ចេកវិទ្យា និងការចាប់ផ្ដើមជំនួញ ឬហៅថាបារខែមអាស៊ានឆ្នាំ២០១៧ (BarCamp ASEAN 2017 Tech & Startup Conference) នឹងប្រារព្ធនៅថ្ងៃទី២១ និងថ្ងៃទី២២ ខែតុលា ឆ្នាំ២០១៧។ សិក្ខាសាលាបច្ចេកវិទ្យានេះចាប់ផ្ដើមពីម៉ោង ៧ព្រឹករហូតដល់ម៉ោង ៥ល្ងាច នៅក្នុងបរិវេណវិទ្យាស្ថានបច្ចេកវិទ្យាកម្ពុជា (Institute of Technology of Cambodia = ITC) ឬហៅថាសាលាតិចណូ រាជធានីភ្នំពេញ។ លោកអ្នកអាចចូលរួមដោយសេរី និងឥតគិតថ្លៃ ប៉ុន្តែត្រូវចុះឈ្មោះជាមុន។
បារខែមអាស៊ានឆ្នាំ២០១៧ នេះ មានក្រុមហ៊ុនបច្ចេកវិទ្យា និង Startup ជាង ៥០ មកពីប្រទេសក្នុងតំបន់ នឹងមកចូលរួមពិព័រណ៍បង្ហាញសេវាកម្ម និងផលិតផលរបស់ខ្លួនជូនដល់អ្នកចូលរួមកម្មវិធីនេះបានឃើញ។
ក្រៅពីការតាំងពិព័រណ៍បច្ចេកវិទ្យា និងសេវាកម្មនេះ កម្មវិធីក៏មានវាគ្មិនជាង ១០០នាក់ នឹងលើកយកប្រធានបទជាច្រើនទាក់ទងនឹងបច្ចេកវិទ្យាថ្មី ការចាប់ផ្ដើមអាជីវកម្ម សហគ្រិនភាព ភាពច្នៃប្រឌិត ទីផ្សារ លើកកម្ពស់អាជីព និងបទវិភាគទាក់ទងនឹងបច្ចេកវិទ្យាអាជីវកម្មជាដើម មកបង្ហាញអ្នកចូលរួមផងដែរ។ វាគ្មិនទាំងនោះ មានមកពីប្រទេសកម្ពុជា និងមកពីតំបន់អាស៊ីអាគ្នេយ៍ ជាដើម។
លើសពីនេះទៀត លោកអ្នកមានឱកាសកសាងបណ្ដាញជាមួយវាគ្មិនជាង ១០០នាក់ និងអ្នកចូលរួមផ្សេងៗទៀតផងដែរ ដែលអាចឲ្យលោកអ្នកទទួលបានចំណេះដឹងថ្មីទាក់ទឹងការធ្វើអាជីវកម្ម និងបច្ចេកវិទ្យាថ្មីៗ ជាពិសេសនោះ លោកអ្នកអាចទទួលបានអាវយឺតបារខែមអាស៊ាន និងវត្ថុអនុស្សាវរីយ៍ផ្សេងៗទៀតពីកម្មវិធីផង។
លោកអ្នកអាចចុះឈ្មោះចូលរួមកម្មវិធីនេះតាមអនឡាញ (Online Registration) តាមរយៈតំណភ្ជាប់នេះ http://barcampasean2017.eventbrite.com/ ឬក៏អាចទំនាក់ទំនងតាមលេខទូរស័ព្ទ ០៩៣ ៣១៦ ៧៨១ ឬមើលព័ត៌មានបន្ថែមតាមរយៈគេហទំព័រ https://barcamp.asia/ ។
កំណត់ចំណាំ៖ ហាមយកអត្ថបទពីគេហទំព័រ www.www.techkhmer.net ទៅចុះផ្សាយដោយគ្មានការអនុញាត៕
