ចាប់ពីថ្ងៃទី១ ខែមេសា ឆ្នាំ២០២២ នេះតទៅ ក្រុមហ៊ុន Meta នឹងចាប់ផ្ដើមអនុវត្តការគិតពន្ធលើរាល់ការផ្សព្វផ្សាយពាណិជ្ជកម្ម ១០% លើតម្លៃដែលអ្នកប្រើប្រាស់ទិញការផ្សព្វផ្សាយពាណិជ្ជកម្មលើហ្វេសប៊ុក (Facebook) ដោយប្រើប្រាស់កាតធនាគារចេញពីប្រទេសកម្ពុជា។
ក្រុមហ៊ុន Meta ជូនដំណឹងដល់អ្នកប្រើប្រាស់នៅកម្ពុជានៅថ្ងៃទី៣១ ខែមីនា នេះថា រាល់ការផ្សព្វផ្សាយពាណិជ្ជកម្មលើសេវាកម្ម Meta ដូចជាហ្វេសប៊ុក ជាដើម នឹងត្រូវគិតពន្ធ VAT ១០% បន្ថែមលើចំណាយសរុបរបស់អ្នកប្រើប្រាស់ដែលប្រើកាតធនាគារចេញពីកម្ពុជា ចាប់ពីថ្ងៃទី១ មេសា នេះ។
VAT ឬហៅថា អាករលើតម្លៃបន្ថែម គឺជាអ្វី? VAT ឬអាករលើតម្លៃបន្ថែម គឺជាប្រភេទពន្ធមួយដែលត្រូវគេគិតបន្ថែមលើតម្លៃដើមនៃផលិតផល ឬសេវាកម្មជាប់អាករ។ និយាយឱ្យខ្លី គឺជាពន្ធលើការចំណាយចុងក្រោយរបស់អ្នកប្រើប្រាស់។
ឧទាហរណ៍ថាអ្នកទិញការផ្សព្វផ្សាយពាណិជ្ជកម្ម (Boost) លើបណ្ដាញសង្គមហ្វេសប៊ុកចំនួន ១០០$ នោះក្រុមហ៊ុន Meta នឹងគិតពន្ធ VAT ១០% លើចំណាយរបស់អ្នក គឺស្មើ ១០$។ ដូច្នេះ អ្នកត្រូវបង់ថ្លៃផ្សព្វផ្សាយឱ្យហ្វេសប៊ុកសរុបចំនួន ១១០$។
Meta បញ្ជាក់ថា ការគិតពន្ធ VAT នេះ គឺអនុវត្តទាំងលើការផ្សព្វផ្សាយពាណិជ្ជកម្មសម្រាប់ក្រុមហ៊ុនអាជីវកម្ម និងបុគ្គល ប៉ុន្តែសម្រាប់ក្រុមហ៊ុនដែលបានចុះបញ្ជីត្រឹមត្រូវ នោះអាចបំពេញលេខអត្តសញ្ញាណសារពើពន្ធ (VAT TIN) នៅប្រអប់ Tax ID Number ក្នុងផ្នែក “Open Payment Settings” ហើយវានឹងបង្ហាញនៅលើវិក្កយបត្រផ្សព្វផ្សាយពាណិជ្ជកម្មរបស់អ្នក។
អគ្គនាយកដ្ឋានពន្ធដារធ្លាប់លើកឡើងនាពេលកន្លងទៅថា កម្ពុជានឹងអនុវត្តការយកអាករលើតម្លៃបន្ថែមចំពោះប្រតិបត្តិការពាណិជ្ជកម្មតាមប្រព័ន្ធអេឡិចត្រូនិក E-Commerce ពីក្រុមហ៊ុនមួយចំនួនដូចជា Facebook, YouTube, Netflix, Amazon និង Alibaba ចាប់ពីថ្ងៃទី១ ខែមេសា ឆ្នាំ២០២២ តទៅ៕
 ដោយប្រើប្រាស់កាតធនាគារចេញពីប្រទេសកម្ពុជា។){kind=link}