ទិន្នន័យ​កម្មវិធី​កក់​តុ eatigo ជិត ៣​លាន​គណនី​ត្រូវ​បាន​លួច​ដាក់​លក់​លើ​អ៊ីនធឺណិត

2588
កម្មវិធី​កក់​តុ eatigo
កម្មវិធី​កក់​តុ eatigo

ទិន្នន័យ​ផ្ទាល់​ខ្លួន​ប្រមាណ​ជិត ៣​លាន​គណនី​របស់​អ្នក​ប្រើប្រាស់​កម្មវិធី eatigo ត្រូវ​បាន​គេ​លួច​យក​ដាក់​លក់​នៅ​លើ​អ៊ីនធឺណិត។ នេះ​បើ​តាម​ការ​ចុះ​ផ្សាយ​របស់​សារព័ត៌មាន Channel News Asia នៅ​ថ្ងៃ​ទី​៣១ ខែ​តុលា។

ចូលរួម Telegram របស់ Techkhmer.net ដើម្បី​ទទួល​បាន​គន្លឹះ និង​ដំណឹង​ថ្មីៗ!

Loading...

កម្មវិធី eatigo ជា​កម្មវិធី​បម្រើ​សេវាកម្ម​កក់​តុ​សម្រាប់​ភោជនីយដ្ឋាន។ គណនី​ប្រមាណ ២,៨​លាន​គណនី​របស់​កម្មវិធី​នេះ​ត្រូវ​បាន​គេ​ប៉ាន់ស្មាន​ថា​បែកធ្លាយ។

ក្រុមហ៊ុន eatigo ផ្ញើ​អ៊ីមែល​ទៅ​កាន់​អតិថិជន​របស់​ខ្លួន​នៅ​ថ្ងៃ​សៅរ៍ ទី​៣១ តុលា ថា «ការ​ស៊ើបអង្កេត​របស់​យើង​បង្ហាញ​ថា​ព័ត៌មាន​ដែល​ត្រូវ​បាន​លួច​ដោយ​ខុស​ច្បាប់ គឺ​ជា​ទិន្នន័យ​ចាស់​មាន​អាយុកាល​ច្រើន​ជាង ១៨​ខែ​កន្លង​ទៅ​ហើយ ហើយ​ទិន្នន័យ​ទាំងនោះ​រួម​មាន ឈ្មោះ អ៊ីមែល និង​លេខ​ទូរស័ព្ទ​របស់​អតិថិជន»។ ក្រុមហ៊ុន​បន្ត​ថា «ពាក្យ​សម្ងាត់​របស់​គណនី​អតិថិជន eatigo បច្ចុប្បន្ន​ត្រូវ​បាន​ការពារ​ដោយ​ធ្វើ​កូដនីយកម្ម (encrypted) ដូច្នេះ​វា​មាន​សុវត្ថិភាព។ យើង​មិន​រក្សា​ទុក​នូវ​ព័ត៌មាន​ក្រេឌីត​កាត (credit card) នោះ​ទេ»

សារព័ត៌មាន Channel News Asia រាយការណ៍​ថា តាមរយៈ​ប្រកាស (post) មួយ​នៅ​លើ​វេទិកា​អនឡាញ​ដែល​លក់​សុទ្ធតែ​ទិន្នន័យ​ផ្ទាល់ខ្លួន​មក​ពី​វេបសាយ​ពាណិជ្ជកម្ម​ជាច្រើន​ជុំវិញ​ពិភពលោក គេ​ឃើញ​ថា​គណនី ២,៨​លាន​គណនី​ចេញ​ពី​កម្មវិធី eatigo ក្នុង​ប្រទេស​សិង្ហបុរី ហុងកុង និង​ប្រទេស​ថៃ ត្រូវ​បាន​ដាក់​លក់។ ជាមួយ​គ្នា​នេះ ទិន្នន័យ​ផ្ទាល់​ខ្លួន ១,១​លាន​គណនី​របស់​វេបសាយ​ពាណិជ្ជកម្ម​អនឡាញ RedMart របស់​ប្រទេស​សិង្ហបុរី ក៏​ត្រូវ​បាន​គេ​ដាក់​លក់​ផង​ដែរ។

ក្រុមហ៊ុន eatigo បញ្ជាក់​ថា​ពាក្យ​សម្ងាត់​របស់​អ្នក​ប្រើប្រាស់​គឺ​ត្រូវ​បាន​ធ្វើ​កូដនីយកម្ម (encrypted) និង​មាន​សុវត្ថិភាព ប៉ុន្តែ​ក្រុមហ៊ុន​ជំរុញ​ឱ្យ​អ្នក​ប្រើប្រាស់​ផ្លាស់ប្ដូរ​ពាក្យ​សម្ងាត់​ថ្មី​ដើម្បី​បង្ការ​ហានិភ័យ។

នៅ​ក្នុង​អ៊ីមែល​ដែល​ក្រុមហ៊ុន​ផ្ញើ​ទៅ​កាន់​អ្នក​ប្រើប្រាស់ ក្រុមហ៊ុន​បាន​សុំទោស​អ្នក​ប្រើប្រាស់ និង​បញ្ជាក់​ថា ក្រុមហ៊ុន​បាន​បង្កើត​ក្រុម​ការងារ​ឱ្យ​អតិថិជន​អាច​ទាក់ទង​ដើម្បី​ដោះស្រាយ​ចំពោះ​បញ្ហា​នេះ​ផង​ដែរ។

ក្រុម​ការងារ ថិចខ្មែរ លើក​ទឹកចិត្ត​ប្រជាជន​កម្ពុជា ព្យាយាម​ប្រើប្រាស់​ពាក្យ​សម្ងាត់​ផ្សេងៗ​គ្នា​សម្រាប់​គណនី​នៅ​លើ​អនឡាញ​នីមួយៗ។ មាន​ន័យ​ថា គណនី​មួយ ត្រូវ​ប្រើ​ពាក្យ​សម្ងាត់​មួយ ហើយ​គណនី​ផ្សេង​ទៀត ត្រូវ​ប្រើ​ពាក្យ​សម្ងាត់​ផ្សេង។ ធ្វើ​ដូច្នេះ អ្នក​នឹង​កាត់​បន្ថយ​ហានិភ័យ​បាន​ច្រើន ប្រសិន​បើ​គណនី​មួយ​របស់​អ្នក​ដែល​បាន​ចុះ​ឈ្មោះ​ប្រើប្រាស់​នៅ​លើ​វេបសាយ​ណា​មួយ​ត្រូវ​បាន​គេ​លួច នោះ​គណនី​ផ្សេង​ទៀត​របស់​អ្នក​នៅ​តែ​មាន​សុវត្ថិភាព​ដដែល៕

Comments

 ឫទ្ធិស័ក្តិ
លោក ឫទ្ធិ ស័ក្ដិ គឺ​ជា​អ្នក​សរសេរ​អត្ថបទ​ផ្នែក​បច្ចេកវិទ្យា និង​គន្លឹះ​ថ្មីៗ​ក្នុង​ការ​ប្រើប្រាស់​ប្រចាំ​ថ្ងៃ​នៅ​ក្នុង​បច្ចេកវិទ្យា។ ស័ក្ដិ ចូលរួម​ចែក​រំលែក​ដំណឹង​ល្អៗ​អំពី​បច្ចេកវិទ្យា​ចាប់​តាំង​ពី​វេបសាយ​មួយ​នេះ​ត្រូវ​បាន​បង្កើត​ឡើង។ គាត់​ចង់​ឱ្យ​ប្រជាជន​ខ្មែរ​កាន់​តែ​ច្រើន​យល់​ដឹង​អំពី​បច្ចេកវិទ្យា​ឱ្យ​ទូលំទូលាយ ពីព្រោះ​បច្ចេកវិទ្យា​អាច​ជួយ​ឱ្យ​ជីវភាព​រស់នៅ​របស់​យើង​កាន់​តែ​ទំនើប​ស្រប​ទៅ​នឹង​ការ​វិវឌ្ឍ​នៃ​សម័យ​កាល។